LPC-NPA nga Opensiba sa Central Negros, Hustisya sa mga Biktima sang Tawhanon nga Kinamatarung

Ang Leonardo Panaligan Command-New People’s Army (LPC-NPA) lubos gid nga nagapanginbulahan sa mga yunit sang NPA nga naglunsar sang mga opensiba batok sa pasistang tropa sang 62nd IB sa Central Negros. Karun nga adlaw, Nobyembre 1, 2022, duha ka opensiba ang madinalag-on nga natigayon sang NPA.

Nobyembre 1 alas 12:00 sa udto ginharas sang NPA ang PNP substation nga nahamtang sa sityo Parkingan, Trinidad, Guihulngan. Nagresulta ini sang pagkasamad sang 2 ka katapo sang PNP-Guihulngan. Alas 4:00 sang hapon sang amo nga adlaw, liwat naman nga gin-snipe sang NPA ang Brgy Budlasan Army Detachment sa Canlaon City. Suno sa mga residente, isa (1) naman ang pilason sa tropa sang 62nd IB.

Taktikal nga opensiba ang nagapanguna nga sabat sang NPA batok sa padayon nga paglapas sang tawhanon nga kinamatarung sa Guihulngan kag iban pa nga lugar nga sakop sang prenteng gerilya kaangay sa natabo nga indiscriminate bombing sa Mount Cansanda sa Guihulngan City kahapon nga adlaw Oktubre 31, 2022. Naghalit ini sa pumuluyo sa lugar diin nakugmat ang mga mangunguma ilabe na ang mga gagmay nga kabataan. Ang iban nagbakwit nga wala sang direksyon bangud sang halos 12 ka dalagko nga lupok ang ila nabatian. Naghalit man ini sa ila pananom, wala labot pa sa ginapanglapak sang militar ang ila mga kamaisan, ginapangkawat pa ang ila mga kasapatan kaangay sang manok, kanding kag iban pa.

Padayon nga maghiliusa ang pumuluyo kag NPA batok sa aton kaaway sa sahi. Ibagsak ang imperyalismo, burukrata kapitalismo kag pyudalismo! Isulong ang inaway banwa tubtob sa kadalag-an!

LPC-NPA nga Opensiba sa Central Negros, Hustisya sa mga Biktima sang Tawhanon nga Kinamatarung