Mabaskog nga ginakondenar sang Leonardo Panaligan Command-New People’s Army (LPC-NPA) ang asud-asod nga pagpangharas sang mga katapo sa 62nd IB sa mga sibilyan kag mangunguma sa banwa sang La Castellana kag syudad sang Guihulngan kahapon nga adlaw, Enero 14.

Pasado alas 4:00 sang hapon kagahapon, Enero 14, desperado nga gintiro sang tatlo ka armado kag nakasibilyan nga mga tawo si Cerilo Bagnoran Jr. Nagamaneho sang iya motorsiklo si Bagnoran halin sa iya trabaho padulong sa ila puluy-an sang ginpara kag gilayon ginpa-arakan luthang sang nasambit nga tatlo ka tawo sa Crossing Cordova, Barangay Manghanoy, La Castellana, Negros Occidental. Nakaluwas ang biktima, apang nagtuga sang kakugmat sa pamilya Bagnoran.

Sa inisyal nga pagpangusisa sang LPC-NPA sa mga residente, mga katapo sang 62nd IB Charlie Company ang tuyo nga magpatay kay Bagnoran.

Kilala sa ila lugar si Bagnoran Jr nga isa ka mamumugon sa kampo. Antes pa man sini nga insidente, sadtong Enero 7, may duha na ka tawo nga nagpakilala nga mga katapo sang Philippine National Police (PNP) nga nagpangita sa iya sa lugar. Pagka-bwas, Enero 8, liwat man nga ginpangita si Bagnoran Jr sa 24 ka tropa sang 62nd IB nga naga-operasyon sa Sityo Mandayao-4, Barangay Kamandag, La Castellana.

Samtang, puguso nga ginransak sang 40 ka tropa sang berdugong 62nd IB ang puluy-an sang pamilya Carreon sa Sityo Bonbon, Barangay Hinakpan, Guihulngan City, Negros Oriental, alas 11:30 sang aga kagahapon, Enero 14. Ginpang-ukay sang pasistang tropa ang mga kagamitan sang pamilya Carreon kag ginpangita si Bimbo Carreon, tagbalay kag mangunguma. Ginpahug ang mga tawo sa sulod sang balay lakip na ang mga gagmay nga kabataan sang nasambit nga pamilya.

Ang pagpanglagas kag paghingabot sang 62nd IB sa mga inosenteng sibilyan sa pagpanguna ni William Pesase Jr, 62nd IB Commanding Officer, ang klaro nga paglapas sang tawhanon nga kinamatarung, sa Comprehensive Agreement on Respect for Human Rights and International Humanitarian Law (CARHRIHL) kag rules of war.

Ini ang isa ka mahigko nga taktika sang reaksyonaryong gyera nga ginalunsar sang AFP indi pa batok sa NPA kundi sa mga mangunguma nga ginapasibangdan nga mga supporter sang NPA. Bangud sang pasulit-sulit nga pagtalana sang dedlayn, ini man ang desperado nga tikang sang berdugong tropa sa pagwasak sang rebolusyonaryong kahublagan ilabe na ang NPA sa Central Negros.

Ihatag ang nagakaigo nga hustisya sa mga biktima sang 62nd IB! Pabayaron sang dako ang berdugo kag pasistang 62nd IB paagi sa lapnagon kag madinalag-on nga taktikal nga opensiba sang Bag-ong Hangaway sang Banwa!