Masobra sa tatlo ka bulan (halin Hulyo-Oktubre 7, 2022) nga nagperwisyo sa pumuluyo sang Central Negros ang masingki nga battalion operations sang kontra-pumuluyo kag berdugo nga tropa sang 62nd IBPA idalum sa 303rd BdePA sa pagpamuno ni B/Gen. Inocencio Pasaporte kag Maj. Gen Benedict Arevalo sang 3IDPA upod sa pila ka yunit sang PNP kaangay sang SAF kag 7th RMFBn. Masami kapin sa 200-300 ka pasistang tropa ang ginamobilisa sang 303rd Bde kag 3ID. Halos 44 ka baryo halin sa pito ka banwa kaangay sang Binalbagan, Isabela, Moises Padilla, La Castellana sa Occidental nga bahin, kag Vallehermoso, La Libertad, Jimalalud kag duha ka syudad nga amo ang Guihulngan City kag Canlaon City sa Negros Oriental. Naka-eksperyensya kag nag-agum ang mga pumuluyo sang madata nga pagbayolar sang tawhanon nga kinamatarung kag pag-ipit sang ila demokrasya kag pungsodnon nga kahilwayan.

Pagterorisa, pagpamahug, pagpanginto kag pagpatalang ang masami ginahimo sang nasambit nga tropa militar batok sa pumuluyo. Ginapunggan ang pagkadto sa uma kag iban pa nga kinaiya sa pagtrabaho sang pumuluyo lamang mapakaon kag mabuhi ang pamilya. Ginsaka ang ila mga puluy -an sa dis-oras sang kagab-ihon samtang mahamuok ang mga ini nga nagakatulog. Wala permiso sa ila nga ginakuhaan sang litrato ang mga indibidwal o balay man nga ginadudahan sang militar nga mga suporter sang CPP-NPA. Ginatamnan sang armas, mga subersibong dokumento kag ginahimu-himuan sang mga kaso kriminal. Malawig nga nagatiner ang militar sa ila mga puluy -an, nagapahubog kag nagapanahor pareho sang pagtari kag baraha. Nagadisturbo sa ila pagpahuway bangud sang pagsininggit kag videoke. Halos kada adlaw ginapatawag kag ginapahug ang mga sibilyan, indibidwal man ukon katapo sang pamilya nga ginadudahan sang militar nga mga suporter sang NPA. Ginahalitan kag ginakawat sang militar ang ila mga tanum, kwarta kag personal sini nga mga pagkabutang.

Muklat nga naglapas sa kasugtanan sa CARHRIHL ang militar sa pagtiner sa mga eskwelahan nga nagdisturbo sa mga manunudlo kag mga kabataang-estudyante sa pihak sang pagpamatok sang mga manunudlo, estudyante kag mga ginikanan. Subong man ang pagtiner sang mga ini sa mga simbahan, barangay hall kag iban pa nga pampubliko nga mga lugar dira man sa pagpamatok sang taong-simbahan kag iban pa nga sektor.

Mabaskog nga ginakondenar sang Leonardo Panaligan Command-New People’s Army Central Negros Front (LPC-NPA) ang pasistang AFP kag PNP partikular na ang 62nd IBPA, PNP-SAF kag 7th RMFBn sa madata sini nga pagpamatay kag iban pa nga porma sa paglapak sang tawhanon nga kinamatarung. Kaangay sa wala kaluoy nga pagpatay sa lima tanan ka inosenteng sibilyan nga sanday Pompeo Landisa, Greg Cantela kag pagmasaker sa pamilya Jacolbe diin patay si Cristina Jacolbe-daycare worker kag Everly Kee Jacolbe-16 anyos nga babaye kag estudyante nga anak ni Cristina, sini nga hitabo patay man si Rodan Montero tanan residente sang Brgy Trinidad, Guihulngan. Ginakawat man ang pagkabutang sang pamilya Jacolbe lakip na ang masobra P40,000.00-personal nga kwarta sang nasambit nga pamilya.

Dugang pa ang tuyo nga pagpatay-pagrapido kay Boyet Cezar, Marjun Mahinay sang Brgy Trinidad Guihulngan. Pagpaarak sang armas-luthang kay Onil Gonzaga kag Jerecel Gonzaga sang Brgy Maniak, Guihulngan kag ilegal nga pag-aresto, pagtanum sang armas kag pagpasaka sang himu-himo nga kaso kanday Macario Pat Sr., Ronald Baydal sang Brgy.Trinidad Guihulngan kag Ramonito Mahinay sang Brgy Tabon, Vallehermoso, Negros Oriental. Subong man pagpatigayon sang pasistang tropa sang “illegal search” sa mga puluy-an sang pamilya Gelacio sa sityo Bayabasan, Brgy Montilla, Moises Padilla, pamilya Ababa, Recisio, Pasibog sang Brgy Bucalan, Canlaon City kag pamilya Nelles sang Brgy Trinidad, Guihulngan.

Ang pagkastigo kay alyas Solon kag Jim Paul Perolino-lunsay mga mangunguma sang sityo Cabulay, Brgy Budlasan siyudad sang Canlaon, Negros Oriental. Paghalit kag pagpangawat sang tanum nga mais sang pamilya Tiin sang Sityo Binil-iwan, Brgy Calupaan sadtong Septyembre 24, 2022. Direkta nga ginkomiter ini sang 22 ka tropa sang 62nd IB. Kadungan man sini ang pagpatigayon sang 62nd IB sang curfew, pagpalupad sang mga drone, pag-iskandalo, pagsininggit kag pagpahubog sa tion sang kagab-ihon, pagpamahug kag pagpanaka-saka sa mga kabalayan sa dis-oras sang kagab-ihon dira sa mga kaumahan sa Central Negros.

Ang LPC-NPA lubos man nagakondenar sa mga katapo sang 62nd IBPA kag PNP Vallehermoso sa pilit nga pagpatawag sa mga pumuluyo sang Sityo Bay-ang, Brgy Tabon, Vallehermoso, Negros Oriental sadtong Septyembre 27, 2022. Gin-into ang pumuluyo nga kuno may ipanagtag nga mga ayuda, apang antis pa man ginpapirma, ginpasumpa kag ginpasunog sang hayahay sang CPP-NPA ang kutob tanan nga nagtambong. Ginkabig sang militar ang nasambit nga pumuluyo bilang mga “NPA surrenderees”.

Sa pihak nga bahin, lubos man nagapanginbulahan ang LPC-NPA sa tanan nga mga kadre, isganan nga mga Pulang kumander kag hangaway sang banwa dira sa padayon nga pagpasulong sang armadong paghimakas paagi sa hugot nga pag-angot kag pag-alagad sa masa. Nagpakita sang kaisog sa pagdepensa sa kabuhi kag pangabuhian sang pumuluyo sa sakop sang prenteng gerilya. Naglunsar sang integradong hilikuton (pagtukod sang baseng masa, agraryong rebolusyon kag pagsulong sang armadong paghimakas).

Madinalag-on nga nakalunsar sang apat ka serye sang taktikal nga opensiba (2- sniping operations, 1-harassment ka 1-partisan/punitive operation) sa paghatag hustisya sa mga biktima sang berdugong militar. Sa aktwal nga pagpangusisa sa lugar, lima (5) ang patay (3-AFP, 1-PNP kag 1-CAFGU) kag tatlo (3) ang pilason sa 62nd IB, PNP (1-PNP kag 2-AFP) lakip na ang pagsilot-patay kay CAFGU Joselito Raboy sang Brgy Montilla Patrol Base. Madinalag-on man nga natigayon ang pagkonsolida pulitiko-militar sa mga yunit sang bag-ong hangaway sang banwa batok sa pagpang-atake sang pasistang AFP kag PNP sa masa kag pulang hangaway.

Samtang likom sa mata sang kaaway ang pagtigayon sang NPA sang mga libre kag sosyal nga serbisyo sa pumuluyo. Malapit sa 1,500 ang nalab-ot sa edukasyon masa kag hilikuton propaganda lamang pataason ang kamuklatan pampulitika sang masa kag hangaway, malapit man sa 1,000 ang nahatagan sang libre nga serbisyo medikal, madinalag-on nga aksyon masa kaangot sa pagpataas sang presyo sang produkto sang masang mangunguma kag pagpataas kag pagpadasig sang produksyon paagi sa simple nga kooperasyon nga amo ang dagyaw-alayon.

Ipadayon ang hugot nga paghili-usa! Magpaka-isog kag magbato batok sa pasismo sang rehimeng US-Marcos Jr!

Bungkagon ang NTF-Elcac kag paslawon ang pagpang-atake sang berdugong AFP kag PNP!

Magpasakop sa New People’s Army kag i-angat ang inaway banwa sa mataas pa nga halintang!