Mensahe iti amin nga alyado ken gagayyem iti maika-50 anibersaryo ti NDFP

EnglishHiligaynonBisayaChinesePilipino

Iti nagan ti sibubukel a kamkameng ti Partido Komunista ng Pilipinas (PKP), agraman ti amin a Nalabbaga a mannakigubat ken kumander ti Bagong Hukbong Bayan (BHB), ipadpadanun ti Komite Sentral ti PKP ti militante a rebolusyonaryo a kablaaw iti amin nga alyado ken gagayyem ti National Democratic Front of the Philippines (NDFP) iti istorikal ken naragsak nga okasyon ti maika-50 anibersaryo na.

Isingsingasing mi iti Nailian a Konseho nga idanun ti NDFP ken amin nga alyado nga organisasyon daytoy ti sumagannad a tema iti makatawen a panagrambak:

Papigsaen ti NDFP! Pagkaykaysaen ti umili a Pilipino tapno ilaban ti nailian a wayawaya iti tengnga ti kumarkaro a gangannaet nga agresyon ken dumakdakkel a pangta ti imperyalista a gubat. Iyabante dagiti militante a dangadang tapno ilaban ti nailian ken demokratiko nga interes laban iti pasista a rehimen US-Marcos! Iyabante ti nailian-demokratiko a rebolusyon agingga’t balligi!

Iti daytoy nga okasyon, lagipen tayo ken padayawan ti amin a banwar ken martir ti rebolusyon a Pilipino. Ited tayo ti naisangsangayan a pammigbig kada Ka Jose Maria Sidon, Benito Tiamzon, Wilma Austria, Fidel Agcaoili, Antonio Zumel, Julius Giron ken dadduma pay a kangrunaan a dadaulo ti Partido ken NDFP, karaman dagiti konsultant para iti kappia na pimmusayen wenno pinapatay dagiti reaksyunaryo a terorista ti estado. Pagyamanan tayo dagiti saan a mabilang nga alyado ti NDFP nga agtultuloy nga agserserbi iti nailian-demokratiko a rebolusyon.

Adda ti madagdagus a pakasapulan a papigsaen ken ad-adda pay a paregtaen ti NDFP gapu ta sangsanguen ti umili a Pilipino ti kumarkaro a krisis ti agar-ari a sistema ken dumakdakkel a pangta a maigup iti allawig dagiti imperyalista a gera ita nga ar-aramaten ti US ti rehimen Marcos ken AFP iti panangsugsog iti gubat, bayat nga agtaltalinaed a takrot iti panangsango iti agresyon ti China.

Iti sumarsaruno a panawen, rumbeng a nasaknap nga igaed ti NDFP nga itandudo ti patriyotiko a kapanunotan ti umili, ken pagkaykaysaen, allukoyen ken patignayen ti kalalawaan nga intar da tapno salakniban ti pagilyan laban iti umir-irteng a risiris dagiti imperyalista ken pangta ti gubat. Iti sango ti pumigpigsa a militar a pannakibiang ti US ken kumarkaro a langa ti panangidadanes ken panaggundaway iti sidong dagiti neoliberal a patakaran, kasapulan nga agpinget ti NDFP nga ad-adda pay a naregta nga iyabante ti nailian-demokratiko a rebolusyon ken ti tartarigagayan a nailian a wayawaya ken demokrasya.

Ti PKP ken ti NDFP

Iti inisyatiba ti Partido, nabukel ti NDFP idi Abril 24, 1973, awan pay makatawen kalpasan nga ideklara ti pasista a diktadura a US-Marcos ti linteg-militar. Idiay nga aldaw, inparuk-at ti NDFP Preparatory Commission ti manipesto nga “Agkaykaysa Tapno Dupraken ti Diktadura a US-Marcos” a nakaipaunegan ti 10-punto a programa. Manipud idi, iggem ti umili a Pilipino ti tallo a nabileg nga igam: ti Partido, ti BHB ken ti NDFP.

Iti sibubukel a panawen ti dangadang kontra iti diktadura, nagserbi ti NDFP ken ti programa daytoy kas maysa kadagiti kabilegan a silaw a timmarabay iti nalawa a masa ti umili iti panagmartsa da laban iti pasista a rehimen ken panagabante ti kabuklan a rebolusyonaryo a dangadang. Babaen ti NDFP, nabukel ti maysa a nalapad nga iket dagiti limed a nailian-demokratiko a pwersa a nagserbi a landok a bugas dagiti dangadang ti masa laban iti diktadura.

Napaspas a kimmapet ti manipesto ken 10-punto a programa ti NDFP iti nalawa nga intar ti umili a Pilipino ken riniing daytoy ti umili nga agkaykaysa ken agtignay laban iti pasista a rehimen. Ti NDFP ket umuna a binukel ti sumagmamano nga organisasyon dagiti agtutubo ken estudyante, kababaihan, mannalon ken dadduma pay a dasig ken sektor nga inkapilitan a nagtignay a limed idi naiyatnag ti sipaparang a pasista a panagari. Manipud 1973, tuloy-tuloy a nagpalawa ti NDFP ken iti agdama ket bukbuklen ti sumagannad nga 18 a limed nga organisasyon: Partido Komunista ng Pilipinas, Bagong Hukbong Bayan, Revolutionary Council of Trade Unions, Katipunan ng mga Samahang Manggagawa, Pambansang Katipunan ng Mag- bubukid, Malayang Kilusan ng Bagong Kababaihan, Kabataang Makabayan, Katipunan ng Gurong Makabayan, Makabayang Samahang Pangkalusugan, Liga ng Agham para sa Bayan, Lupon ng Manananggol para sa Bayan, Artista at Manunulat para sa Sambayanan, Makabayang Kawaning Pilipino, Artista at Manunulat para sa Sambayanan, Makabayang Kawaning Pilipino, Revolutionary Organization of Overseas Filipinos and their Families, Christians for National Liberation, Cordillera People’s Democratic Front, Moro Resistance and Liberation Organization and Revolutionary Organization of Lumads.

Ti NDFP ti pinakakonsolidado nga organisasyon ti nagkaykaysa a prente ti umili a Pilipino. Repreppeten daytoy ti amin a progresibo a dasig ken sektor tapno sumuporta iti demokratiko a rebolusyon ti umili babaen ti naunday a gubat ti umili. Daytoy ti pulitikal a sentro de grabidad ti nadumaduma a tukad ken langa dagiti nagkaykaysa a prente nga organisasyon laban iti imperyalismo, pyudalismo ken burukrata kapitalismo.

Iti panangiyabante ti naunday a gubat ti umili, dagiti organo ti bileg iti pulitika iti tukad baryo wenno interbaryo, kasta met iti tukad munisipal wenno intermunisipalidad, ken uray ti tukad distrito ket naibangon basar iti organisado a pigsa dagiti rebolusyonaryo nga organisasyon ti masa, dagiti lokal nga organisasyon ti Partido ken panangipaay ti hustisya ken armado a pigsa ti Bagong Hukbong Bayan. Ak-akmen daytoy dagiti rebbengen a pang-estado, karaman ti panangipatungpal kadagiti patakaran ken programa iti reporma iti daga, panangited ti hustisya ken panangresolba kadagiti kontradiksyon iti intar ti umili, ken panangted iti serbisyo iti edukasyon ken salun-at. Or-organisaen ken patpatignayen dagitoy ti umili tapno iyabante ti armado a panaglaban iti reaksyunaryo nga estado.

Nu pagdadagupen, amin dagitoy ket mangbukbukel ti bin-i ti Demokratiko a Gubyerno ti Umili ti Pilipinas (DGP) iti masanguanan, maysa a nagkaykaysa a prente ti amin a progresibo ken patriyotiko a dasig a nakabatay iti basaran nga alyansa dagiti mangmangged ken mannalon ken adda iti sidong ti panangidaulo ti proletaryado. Agingga a saan pay a naitakder iti intero a pagilyan, ti DGP ket ibagbagi ti NDFP.

Iti panangibagi na iti DGP, nakabukel ti NDFP ti relasyon a pampulitika, pang-ekonomoya, pangmilitar ken proto-diplomatiko iti dadduma nga entidad. Aktibo nga itantandudo daytoy ti sangalubongan a panagkaykaysa iti intar dagiti pwersa nga anti-imperyalista. Direkta man wenno saan, ti NDFP ket bigbigbigen ti dadduma a gubyerno wenno internasyunal a taripnong.

Iti agdama, dua a gubyerno ti agraraira iti kaaw-awayan iti Pilipinas: ti Gubyerno ti Republika ti Pilipinas (GRP) ken ti Demokratiko a Gubyerno ti Umili (DGU) nga ibagbagi ti NDFP. Ti DGU ket Nalabbaga ken rebolusyonaryo, bayat a ti GRP ket puraw ken reaksyunaryo. Isuda ti mangbukbukel ti dua a benneg ti gera sibil iti napalabas a 54 a tawen.

Manipud pay 1987 ti NDFP ket makinegnegosasyonen para iti kappia iti GRP. Natibker ken nakasaysayaat nga inbagi na ti nailian ken demokratiko nga interes ti umili a Pilipino, ken pinaay daytoy dagiti iskema ti GRP nga aramaten ti saritaan iti kappia kas instrumento ti panangallilaw ken pasipikasyon. Nakapataud ti negosasyon ti napapateg a katulagan, kangrunaan ti Comprehensive Agreement on Respect for Human Rights and International Humanitarian Law (CARHRIHL). Nalawag met a naipakita ti NDFP ti kinapudno daytoy iti panangrisut iti sosyo-ekonomiko ken pampulitika a ramut ti gera sibil, iti kasta, naala na ti suporta ti nalapad a paset ti gimong iti tarigagay para iti nainkalintegan ken mataginayon a kappia.

Kaipapanan ken kinapateg ti 12-punto a programa ti NDFP

Ti 12-punto a programa ti NDFP ket ti sistematiko a panangilanad ti kolektibo a tarigagay ti umili a Pilipino para iti nailian a wayawaya ken demokrasya, Daytoy ti pinakasuperyor iti amin a programa dagiti pampulitika a partido ken organisasyon iti Pilipinas.

Ti programa ti NDFP ket kabaliktad ti neoliberal, kontra-Pilipino ken kontra-demokratiko a patakaran ken programa ti agar-ari nga aso-aso ken pasista a rehimen Marcos, ken amin nga immuna a rehimen, nagpammarang man a demokratiko wenno agdadata a tiraniko. Ibagbagi daytoy ti interes dagiti mangmangged, mannalon ken amin a dadduma pay a magungundawayan ken maidadanes a dasig iti gimong a Pilipino, kasta met, ti amin a dadduma pay a progresibo ken patriyotiko a pwersa, a napeklan a kontra iti interes ti imperyalismo a US, ken ti lokal nga agar-ari a dasig ti dadakkel a burgesya kumprador ken dadakkel nga apo’t daga.

Ti tumadtadem a krisis ti agar-ari a malakolonyal ken malapyudal a sistema ket agtaltalmeg iti kaipapanan ken kinapateg ti pannakaipatungpal ti 12-punto a programa ti NDFP. Nasurok- kumurang limapulo a tawen manipud idi nabukel ti programa ti NDFP, saan a nagbaliw ti kalidad ti malakolonyal ken malapyudal a kundisyon ti Pilipinas. Kumarkaro laeng daytoy iti kantidad, nu sadino ket agsagsagaba ti umili a Pilipino ti nakarkaro a kundisyon ti pannakaidadanes ken pannakagundaway.

Iti kaaw-awayan, kimmaro ti parikut ti kinaawan daga iti nadumaduma a wagas ti panag-agaw ken panangipaidam ti daga dagiti daan ken baro a tipo ti apo’t daga, dadakkel a burgesya kumprador ken korporasyon a multinasyunal kadagiti pagminasan, plantasyon, imprastruktura, real estate ken dadduma pay. Iti intero a pagilyan, ad-adda a saan a maibturan ti nalawa a masa ti dumakdakes a sosyo-ekonomiko a kasasaad iti tengnga ti nababa a sueldo, panangipaidam ti pagbiagan, panagtayok ti presyo ti langis, taraon ken dadduma a basaran a kasapulan, kinaawan trabaho ken panaggamrud. Ti agar-ari a reaksyunaryo nga estado ket agar-aramat ti kumarkaro a brutal a pasista nga addang tapno lapdan ti panaglaban ti pagilyan ken ipreserba ti agar-ari a sistema.

Iti tengnga ti nakaro a pang-ekonomiya a kasasaad ken pampultika a represyon, tuloy-tuloy a maguyguyugoy ti umili a Pilipino iti 12-Punto a Programa ti NDFP kas kasamayan ken direkta a solusyon dagiti madagdagus a parikut da. Ti pukkaw para iti pudno a reporma iti daga ken nailian nga industriyalisasyon ket ad-adda a napigsa iti tengnga ti nasaknap a pannakadadael dagiti pwersa a produktibo agpada iti kasyudadan ken kaaw-awayan. Ti kadawatan a kumprehensibo ken progresibo a programa iti gimong ket ad-adda a napateg iti tengnga ti kumarkaro a krisis ti pampubliko a salun-at ken pampubliko nga edukasyon. Tunggal punto iti programa ti NDFP ket nalatak a maiduma iti amin a kinabulok ti agar-ari a sistema.

Ti tantan-awan a panangibangon ti baro a pagilyan nu sadino nga agsagsagrap ti umili ti pudno a wayawaya ken pudno a demokrasya, nu sadinno a ti umili mismo ti agsagsagrap ti bunga ti panagpinget da, ket mangpappapudot iti rebolusyonaryo a determinasyon ken optimismo, ken mangpappapinget kadakuada nga iyabante ti rebolusyon.

Ti programa ti NDFP ket kabuklan a sarming ti programa ti Partido Komunista ng Pilipinas (PKP) para iti demokratiko a rebolusyon ti umili. Iti panagabante ti dangadang ti umili a Pilipino para iti pudno a nailian a wayawaya, ti 12-Punto a Programa ti NDFP ket addaan istorikal a silpo iti rebolusyonaryo a demokratiko a programa ti Katipunan. Panggep daytoy a kumpletuen ti burges demokratiko a rebolusyon, iti kasta, parnuayen ti kundisyon tapno iyabante ti rebolusyon ken sosyalista a konstruksyon.

Agdama a nababara nga isyu iti sidong ti pasista ken aso-aso a rehimen Marcos

Ti agraraira nga aso-aso a rehimen Marcos ti agdama a konsentrasyon ti bulok nga agar-ari a sistema a malakolonyal ken malapyudal. Ibagbagi daytoy ti interes ti imperyalismo a US ken ti mangidadanes nga agar-ari a dasig; iti partikular, ti interes ti agar-ari a gunglo a Marcos-Duterte. Iti tengnga ti krisis ti agar-ari a sistema, pagmamauyongan tatta ti agar-ari a gunglo a Marcos-Duterte ti panangmonopolyo iti bileg iti ekonomiya ken pulitika, nga agituntunda ti ad-adda pay a pannakaisina iti umili, ken agparparnuay ti saan a panagkikinnaawatan ken kumpitensya iti uneg daytoy.

Ad-adda a pakpakaruen ti agdama a rehimen US-Marcos ti krisis iti ekonomiya ken pulitika ti agar-ari a sistema. Dagiti kontra-nasyunal ken kontra-demokratiko a patakaran ket nalawag a makita iti sumagannad nga uppat a kangrunaan nga usapin:

(a) Kumarkaro a pannakibiang militar ti US iti Pilipinas. Pakaitampukan daytoy ti plano ti US nga agibangon ti saan a bumaba iti uppat a nayon a base ken pasilidad militar ti US iti sidong ti Enhanced Defense Cooperation Agreement (EDCA). Daytoy ket nayon iti liman a base ken pasilidad militar ti US nu sadinno a maipuspusisyon dagiti armas ken maiyis-istasyon dagiti tropa nga Amerikano iti Pilipinas. Dagiti baro a base militar ti US ket paset ti plano daytoy nga agibangon ti $27.1 bilyon nga iket dagiti missile station iti naawagan a “First Island Chain” dagiti pagilyan a kaasitgan iti China. Paset daytoy ti agtultuloy a panangsugsog na iti gera kontra iti China, a nakapaturong iti panangbale-awan iti One China Policy ken panangsugsog iti awag para iti “Taiwan Independence.”

Kagiddan daytoy, pakpakaruen ti US ti kontra-rebolusyonaryo a gera na iti Pilipinas tapno lapdan ti nailian-demokratiko a rebolusyon, babaen ti panang-armas, panangpondo ken panangsuporta iti operasyon a kontra-insurhensiya ti AFP. Ti awan mamaay na a panggep ti US ket rebbeken ti rebolusyonaryo nga armado a dangadang tapno naan-anay a maaramat ken mamaksimisa na ti aso-aso nga armado a pwersa para iti posible nga armado a kumprontasyon iti imperyalista a karibal na a China.

(b) Kumarkaro a pasista a represyon ken terorismo ti estado iti sidong ti kontra-insurhensiya nga operasyon nga iturturong ti US. Nasaknap ti panaglabsing ti AFP ken Philippine National Police (PNP) kadagiti karbengan-tao ken internasyunal a makatao a linteg, karaman ti panaghamlet kadagiti komunidad, panagblokeyo iti taraon, aglablabes a panagpappaputok kadagiti armas, panangitennag ti bomba manipud iti ere ken panagkanyon, ekstrahudisyal a pammapatay, dagiti panagdukot, kaniwas iti linteg ken saan a nainkalintegan a panag-aresto, panagtortyur ken dadduma pay a brutalidad laban kadagiti sibilyan wenno saan a kombatant.

(c) Pumigpigsa a panagiduron kadagiti neoliberal a patakaran ken addang a mangpakpakaro iti nasaknap a kinakurapay ken sosyo-ekonomiko a kundisyon ti umili. Ti pinairteng a panagpalawa kadagiti operasyon dagiti korporasyon a multinasyunal ket agresresulta iti nasaknap a panagkamkam manipud kadagiti mannalon ken mangngalap ken dislokasyon ken pannakaperdi dagiti produktibo a pwersa. Ad-adda a papaunegen daytoy ti atrasado, agraryo ken pre-industriyal a kasasaad ti ekonomiya ti Pilipinas, nga agresresulta iti nakaro a disempleyo, nababa a sweldo iti tengnga ti pangato a pangato a presyo, panagsanggir iti panag-angkat, gangannaet a panagutang ken dadduma pay.

(d) Umad-adalem a krisis ti agar-ari a pampulitika a sistema. Iti duron a maan-anay ti burukratiko a pribilehiyo, agresibo nga idurduron ti gunglo a Marcos-Duterte dagiti addang a bukodan ti bileg iti pulitika ken ekonomiya. Ti plano da nga amyendaran ti konstitusyon 1987 ket nalawag a paset ti iskema da nga ikkaten dagiti lapped iti panagaramat ti bileg ti linteg militar ken agpaatiddog pay ti turay ti agar-ari a pangkat. Dagitoy nga iskema ket mangpapauneg iti risiris iti baet ti nadumaduma a pangkat ti agar-ari a dasig. Kagiddan daytoy, umad-adalem ti nagbabaetan dagiti Marcos ken Duterte iti panagriribal da iti burukratiko kapitalista a panagtakaw, karaman ti kontrol iti militar, pulis ken dadduma pay a kangrunaan nga ahensya ti gubyerno, panagibulsa ti pasuksok manipud kadagiti kontrata iti gubyerno, panagkulekta iti kotong manipud iti ismagling ken linnakuan ti droga ken dadduma pay.

Dagitoy nga isyu ket mangitaltalmeg iti bulok a kasasaad ti agar-ari a ssistema a malakolonyal ken malapyudal. Aniaman, wenno kumbinasyon ti sumagmamano kadagitoy ket mabalin a sentro ti panagsikko ti krisis iti ekonomya ken pulitika, nga isu met ti mabalin a makariing iti nalawa a masa ti umili ken mangpairteng ti demokratiko ken militante a tignay masa.

Lumatlatak met ti dakkel a potensyal dagitoy nga usapin a bumtak ken mangperdi iti konteksto ti agtultuloy a krisis ti sangalubongan a krisis ti kapitalismo ken ti dumakdakkel a posibilidad ti baro a ronda ti krisis iti pinansiya, resesyon ken depresyon iti ekonomya. Iti sangalubongan, inut-inot nga agdaldalluyon ti dadakkel a demonstrasyon agpada kadagiti pagilyan a kapitalista ken kadagiti atrasado a pagilyan a malakolonyal, iti sango ti panaglaban ti maidadanes ken magungundawayan a dasig laban iti kumarkaro a patakaran ken imperyalista a gubat..

Ti papel ti NDFP iti panagpigsa ti rebolusyonaryo a dalluyon

Agtultuloy nga idadauluan ti Partido Komunista ng Pilipinas ti umili a Pilipino iti panangiyabante ti nailian-demokratiko a rebolusyon babaen ti naunday a gubat ti umili. Pakaragsakan daytoy a makaalyado dagiti organisasyon ken kamkameng a nakapauneg iti NDFP.

Iti tengnga ti napaspas a panagsuwek ti agar-ari a sistema, umir-irteng ti ribalan ken dumakdakkel a posibilidad ti gera nga inter-imperyalista, makitkita ti Partido ti masanguanan a panawen ti panagdalluyon ti rebolusyonaryo nga armado a dangadang, tignay masa agpada iti kasyudadan ken kaaw-awayan, ken panangbukel ti NDFP ken dadduma pay nga organisasyon ti nagkaykaysa a prente. Nalawag ti masakbayan tapno makapagpapigsa dagiti rebolusyonaryo a pwersa tapno makapagpapigsa iti umay a panawen ti panagabante.

Inton kaanuman iti napalabas, determinado ti Bagong Hukbong Bayan nga iyabante ti naunday a gubat ti umili iti kaaw-awayan. Nakapreserba ken nakapagpinget daytoy iti dana ti rebolusyonaryo nga armado a dangadang, ken agtultuloy a mangiyab-abante ti nasaknap ken nairteng a gubat a gerilya basar iti lumawlawa ken umun-uneg a base a masa.

Sigurado ti dana ti panagabante ti rebolusyonaryo a tignay masa kadagiti umay a bulan ken tawen. Kalpasan ti panawen ti militarista a lockdown idi pandemya, nalawag tatta a ngumatngato ti tukad ti dangadang iti ekonomiya ken pulitika ti nadumaduma a sektor. Rumegregta dagiti welga ken aksyon masa dagiti mangmangged nga agdawdawat ti nangatngato a suweldo, agkedkedked iti nalabes a mangirurumen a kundisyon iti trabaho ken lumablaban iti kontraktwalisasyon ken dadduma pay a mangidadanes a pleksible a sistema iti panagpatrabaho. Ti panawagan a gibusan ti liberalisasyon iti agrikultura ken dadduma pay a mangidadanes a neoliberal a patakaran nga agresresulta iti panagkamkam ti daga, pannakabangkrap iti kaaw-awayan ken dislokasyon iti ekonomiya ket ad-adda a mangrepreppet ken mangririing kadagiti dangadang ti masa a mannalon kagiddan dagiti kadawatan da para iti pudno a reporma ti daga. Umir-irteng ti dangadang laban kadagiti dam ken dadduma pay a proyekto iti imprastruktura iti nadumaduma a rehiyon. Agtitimpuyog ti nalawa a masa dagiti mangngalap laban iti managdadael a plano dagiti gangannaet a kumpanya ti reklamasyon ken panagminas iti uneg ti baybay nga agresresulta iti dislokasyon iti ekonomiya. Palpalataken dagiti welga dagiti drayber ti dyip itay nabiit ken dadduma pay a pampubliko a transportasyon ti panaglaban ti masa a mala-proletaryado kadagiti mangidadanes a patakaran ken sosyo-ekonomiko a programa a mangipapaidam iti pagbiagan da. Pumigsa ti militante ken patriyotiko a tignay estudyante ken agtutubo iti sango ti panagngato ti gastos iti matrikula ken panangtallikod ti estado iti edukasyon, kasta met, laban iti kumarkaro nga imperyalista a pannakibiang.

Ti pampulitika a represyon ken dagiti panaglabsing kadagiti sibil ken pulitikal a karbengan ket patuloy a mangpabpabettak iti pungtot, panagsupyat ken panaglaban ti umili. Ti papel ti imperyalista a US iti gera a represyon ket naan-anay a maibunbunannag. Ti pungtot ti umili a Pilipino ket agtultuloy a kumarkaro laban iti gangannaet a panaggamrud ken panagdadael dagiti multinasyunal ken dagiti ahente da iti aglawlaw ken pagbiagan ti umili, ken laban iti nasaknap a korapsyon ti dadakkel a burukrata kapitalista iti panangiyuna ti gunglo a Marcos-Duterte.

Ti NDFP ken amin nga alyado daytoy nga organisasyon ket rumbeng nga agserbi a bugas ti naan-anay a panagpinget a pagkaykaysaen, organisaen ken patignayen ti amin a rebolusyonaryo, progresibo ken positibo a puwersa tapno buklen ti kalalapadan a nagkaykaysa a prente laban iti rehimen US-Marcos kas pinakakonsentrado iti amin a kinadakes iti gimong a pagsagsagabaan ti umili a Pilipino, ken tapno iyabante ti gubat ti umili para iti pannakawayaya ti pagilyan ken kagimongan.

Al-allukoyen mi ti NDFP ken dagiti alyado nga organisasyon ken dagiti kamkameng daytoy nga iyaramid dagiti sumagannad a rebbengen, kampanya, dagiti dangadang ken aktibidad iti umay a tawen, nga addaan panggep a papigsaen ti nagkaykaysa a prente nga anti-pasista, anti-imperyalista ken anti-pyudal:

a) Itakder ti kalalapadan nga alyansa laban iti pasista a rehimen US-Marcos. Ibunannag ken labanan ti panagug-ugali nga adipen ni Marcos iti ekonomiko nga interes ti gangannaet. Ibunannag, labanan ken isina ti agar-ari a gunglo a Marcos-Duterte kadagiti gandat daytoy a bukodan ti bileg iti ekonomiya ken pulitika. Ibunannag ti korapsyon ti agar-ari a gunglo, karaman dagiti iskema a subboten ti tinakaw a kinabaknang ti dinastiya a Marcos, panagaramat ti pondo iti publiko para iti operasyon dagiti dadakkel a burgesya kumprador, ismagling iti abbong ti liberalisasyon iti panag-import ken dadduma pay nga iskema.

b) Iyabante ti kampanya tapno ibunannag ken ipaganetget ti panangduprak kadagiti base militar ti US iti Pilipinas, panangpaawid kadagiti tropa ti US, ken pananggibus iti pannakibiang militar ken dagiti ehersisyo militar, panangdurog iti gera kontra iti China ken panangpondo kadagiti brutal nga operasyon ti kontra-insurhensiya a gera a manglablabsing iti prinsipyo ti saan a pannakibiang kadagiti pang-uneg a pakaseknan ti pagilyan. Ipaganetget ti panagwaswas iti EDCA, Visiting Forces Agreement, Mutual Defense Treaty ken dadduma pay a saan a patas a katulagan militar iti US. Ipaganetget ti panangduprak kadagiti pasilidad militar ken panangpaawid kadagiti puersa militar ti China, ken pananggibus iti pananggamrud iti gameng ti kabaybayan ti Pilipinas.

c) Urnongen ti nalawa a suporta para kadagiti dangadang iti ekonomiya laban kadagiti neoliberal a patakaran ti liberalisasyon, deregulasyon ken pribatisasyon, nangruna para iti dangadang dagiti mangmangged para iti umento ti sueldo. Urnongen ti nalawa a suporta para iti dangadang para iti pudno a reporma iti daga iti kaaw-awayan, ken laban iti panagserrek dagiti kumpanya ti minas, panagpalawa kadagiti plantasyon, ekoturismo, dagiti dam ken dagiti proyekto iti enerhiya, ken dadduma pay a programa a mangperperdi iti aglawlaw ken pagbiagan ti umili. Labanan ti panangipataw ti padagsen a buwis ken padagsen a panagbayad iti gangannaet a pautang.

d) Itakder ti nalapad nga anti-pasista a nagkaykaysa a prente. Ibunannag ti nasaknap a terorismo ti estado, dagiti panaglabsing iti karbengan-tao ken panag-atake kadagiti sibilyan ken dagiti sibilyan a komunidad kaniwas iti internasyunal a makatao a linteg, nangruna dagiti panaglabsing iti karbengan ti kababaihan ken ubbing. Ipaganetget ti panaggibus iti aglablabes a panagbomba iti ere ken panagkanyon a mangipegpeggad iti biag dagiti sibilyan. Ibunannag ti silpo ti kumarkaro a pasista a represyon ken ti agresibo a neoliberal a duron a ruk-atan ti dalan iti pananggamrud dagiti gangannaet a kumpanya iti kinabaknang ti pagilyan, panangguyod ti sueldo pababa, panangkamkam ti daga ken panangipaidam iti pagbiagan ti umili.

e) Sireregta nga itandudo ken iyabante ti 12-Punto a Programa ti NDFP iti amin a posible a langa ken benyu—manipud iti akademya agingga kadagiti barung-barong, dagiti pabrika ken lugar ti pagtrabahuan agingga iti kaaw-awayan. Aktibo a padur-asen ti maysa a tignay pang-edukasyon, pangpropaganda ken pangkultura tapno nalawa a danunen ti minilyon-milyon a masa. Ingato ti pannakariing ken kaamuan ti umili kadagiti balligi a nagun-od iti napalabas a 54 tawen ti rebolusyonaryo a dangadang, ken kinapateg ti panangiyabante pay iti nailian-demokratiko a rebolusyon agingga iti balligi tapno gibusan ti panagsagaba da.

f) Padur-asen ti naregta a tignay iti panag-organisa tapno gun-oden ti awan kapada na a panagpalawa ken panaglangto ti amin nga alyado nga organisasyon ti NDFP, ken agitakder ti dadduma pay nga timpuyog a mangibagi kadagiti dadduma pay a maidadanes a dasig ken sektor. Iyaramid dagiti innadal ken espesyal a kumperensya ken ibangon dagiti istruktura iti organisasyon da. Agpataud kadagiti baro a lider masa nga addaan kabaelan a mangriing iti adu nga umili. Patibkeren ti limed a rebolusyonaryo a tignay ken siguraduen ti panangbukel kadagiti komite a pangdepensa tapno siguraduen ti kinatalged ti amin a pwersa a rebolusyonaryo.

g) Papigsaen ti NDFP kas alyansa. Ingato ti pannakariing ti kamkameng ken dagiti alyado nga organisasyon babaen ti pang-uneg nga edukasyon panggep ti NDFP, iti pakasaritaan ken trabaho daytoy. Padur-asen ti koordinasyon ken panagtitinnulong dagiti alyado nga organisasyon ti NDFP. Papigsaen ti silpo dagitoy iti upisina ti NDFP iti ballasiw-taaw tapno suportaran ti trabaho dagiti internasyunal a representatibo daytoy.

h) Palawaen ti pulitikal ken materyal a suporta para iti Bagong Hukbong Bayan. Aktibo nga agrekrut kadagiti Nalabbaga a mannakigubat manipud iti intar dagiti mangmangged, estudyante, kababaihan ken dadduma pay a sektor. Patignayen dagiti yunit iti depensa tapno agipadanun ti tulong a materyal, pulitikal ken paniktik kadagiti lokal a yunit dagiti milisyang bayan ken yunit gerilya ti BHB.

i) Agtultuloy nga itandudo ken ibagian ti Demokratiko a Gubyerno ti Umili. Iyaramid ti internasyunal a kampanya tapno itag-ay ti NDFP kas mangibagi ti umili a Pilipino. Agtultuloy nga urnongen ti internasyunal a suporta para iti dangadang ti umili a Pilipino para iti wayawaya ti pagilyan ken kagimongan. Agtultuloy a padur-asen dagiti relasyon a proto-diplomatiko kadagiti pagilyan ken dadduma pay nga internasyunal nga ahensya. Agtultuloy nga itag-ay ti panangitandudo ti NDFP iti nainkalintegan ken mataginayon a kappia.

j) Tulungan nga itakder ken palawaen dagiti internasyunal a network ken alyansa iti basaran nga anti-mperyalista a panagkaykaysa. Tulungan nga itakder dagiti nalapad nga alyansa kontra kadagiti imperyalista a gubat. Ited ti suporta kadagiti dangadang ti masa ti mangmangged, mannalon ken dadduma pay a masa nga anakling-et, agraman dagiti rebolusyonaryo nga armado a panaglaban iti sabali a pagilyan.

Mamati ti Komite Sentral ti PKP nga akemen ti NDFP ti nakapatpateg a papel iti umadani a panawen ti balbaliw a panagdlluyon ti rebolusyon. Agtalek kami nga amin a pwersa ti NDFP ket agtuloy nga agpinget iti panangriing iti umili ken mangibaklay ti nadadagsen a rebbengen iti panangisayangkat ti amin a langa ti patriyotiko ken demokratiko a dangadang, agurnong ti nalawa a suporta para iti gubat ti umili ken agiyabante ti nailian-demokratiko a rebolusyon.

Agbiag ti National Democratic Front of the Philippines!

Agbiag ti Bagong Hukbong Bayan!

Agbiag ti Partido komunista ng Pilipinas!

Agbiag ti umili a Pilipino!

Mensahe iti amin nga alyado ken gagayyem iti maika-50 anibersaryo ti NDFP