Ipinararating ng Partido Komunista ng Pilipinas ang mainit na rebolusyonaryong pakikiisa sa Liga ng Agham para sa Bayan (LAB) sa paggunita ng kanyang ika-50 anibersaryo sa buwang ito. Kasama ninyo ang Partido sa pagdiriwang ng marami at hindi matatawarang nakamit ng LAB sa nagdaang limang dekada ng paglahok sa demokratikong rebolusyon bayan.

Lubos na pinahahalagahan ng Partido ang inyong naging mga ambag sa matagalang digmang bayan. Sumasaludo kami sa mga bayani at martir na nagmula sa hanay ng mga alagad ng agham na walang pag-iimbot na nag-alay ng kanilang talino at kaalaman sa siyensya sa interes ng sambayanan. Lagi nating alalahanin ang kanilang sakripisyo at paghalawan ng inspirasyon ang kanilang mga nagawa.

Napakainam na pagkakataon ang inyong anibersaryo para magbalik-tanaw at kilalanin ang naging malaking papel ng LAB at ng mga naunang henerasyon ng mga siyentista, inhinyero at teknolohista sa pagsusulong ng rebolusyong Pilipino sa nagdaang mga dekada. Kasabay nito, dapat na masugid na alamin ang kasalukuyang mga hamon sa pagsulong ng rebolusyon, upang magkakaroon ang LAB ng malinaw na pagtanaw sa gagampanang papel nito sa hinaharap.

Nakatala na sa kasaysayan ang malaking papel ng mga siyentista sa naging pagbangon ng makabayan at demokratikong kilusang masa noong dekada sisenta, sa pagpapaalab ng patriyotiko at demokratikong diwa ng sambayanang Pilipino. Matingkad sa kanilang karanasan kung papaanong ang kaalaman sa siyensya ay nilulustay ng mga naghaharing uri at papet na estado sa mga patakaran kontra sa industriyalisasyon at tunay na reporma sa lupa, alinsunod sa interes ng dayuhang malalaking kapitalistang na manatiling atrasado at palaasa ang ekonomya ng bansa.

Matingkad ang naging papel ng mga naunang salinlahi ng makabayang siyentista sa mga martsa sa lansangan ng mga kabataan. Matapang silang nakipagkapit-bisig sa mga rali sa kongreso at Mendiola na marahas na binuwag ng mga pasistang pwersa ng estado. Ginamit nila ang kanilang kaalaman sa kemika at pisika sa paglikha ng mga kagamitang ginamit noon para sa pagtatanggol at paglaban ng mga kabataan laban sa mga batuta, tirgas at bala ng mga utusang pulis at sundalo.

Kabilang ang mga siyentistang naging komunista at rebolusyonaryo sa mga sumapi sa Partido matapos ito muling itatag noong 1968 at tumulong sa pagpupundar ng Bagong Hukbong Bayan nang itinatag ito noong 1969. Malaking ambag ang sinimulan ng mga rebolusyonaryong siyentista na kilusang pasabog o explosives movement na nag-imbento ng iba’t ibang mga sandata na nagamit ng masa at ng mga unang yunit ng hukbong bayan. Sa paglipas ng mga taon, marami pa silang naging ambag sa iba’t ibang larangan ng pagsusulong ng digmang bayan.

Sadyang may makasaysayang kabuluhan ang pagdiriwang ninyo ng ika-50 taon ng LAB. Isinasagawa ninyo ito sa gitna ng nagkakaisang pagsisikap ng Partido, hukbong bayan at lahat ng rebolusyonaryong pwersa na matatag na palakasing muli ang digmang bayan. Matapos na ilang taon dumanas ng mga pinsala bunga ng mga panloob na kahinaan at kakulangan, at ng walang habas na pasismo at armadong pananalakay ng kaaway, nakatanaw tayo ngayon sa landas ng pagsulong.

Ang sumisidhing krisis ng naghaharing sistema ay matabang lupa kung saan umuusbong ang mga pakikibakang masa at dumadaluyong ang kilusang protesta sa iba’t ibang panig ng bansa. Nitong nagdaang humigit-kumulang dalawang taon, kahit pa mayroong ilang bahaging napinsala, patuloy na nakapagpapanatili ng lakas ang hukbong bayan sa pagpupunyagi nitong palalimin at palawakin ang pag-ugat nito sa masa.

Matapos ang halos walong dekada sa ilalim ng malakolonyal na paghahari ng imperyalismong US, nananatiling atrasado, hindi industriyalisado at agraryo ang ekonomya ng Pilipinas. May pagbabago man sa antas at mga larangan ng agham sa bansa, kasabay ng mga pag-unlad sa mundo ng syensya at teknolohiya, nananatili itong nagsisilbi sa interes ng mga dayuhang malalaking korporasyon na pagsamantalahan at dambungin ang likas-yaman at lakas-paggawa sa bansa, at sa pasistang pagsupil sa mamamayan. Lalong tumindi ang pagkasaid ng mga siyentistang Pilipino na inaakit ng mga monopolyong kapitalista ng mataas na sweldo at oportunidad sa ibang bansa. Ang iba naman, katulad ng mga inhinyero sa Department of Public Works and Highways (DPWH), ay binubulok sa katiwalian.

Nakasadlak sa pamalagiang krisis ang malakolonyal at malapyudal na sistema sa Pilipinas. Lalong lumalaki ang agwat ng hindi pagkakapantay-pantay. Mayorya ng mamamayang Pilipino ay lugmok sa paghihirap dahil sa tuluy-tuloy na pagtaas ng presyo ng mga bilihin, mababang sahod, kawalan ng trabaho, pang-aagaw ng lupa at mga pinagkakabuhayan, at pagkabaon sa utang ng masang anakpawis. Samantala, lumalangoy sa karangyaan ang maliit na minorya ng mga naghaharing uri ng malalaking burgesyang komprador, mga panginoong maylupa at burukratang kapitalista na bumubuo ng isang porsyento.

Higit kailanman sa nakaraan, mahigpit ang pangangailangan para sa pambansa-demokratikong rebolusyon upang baguhin ang kasaysayan ng bansa at ipihit ito sa bagong landas ng pag-unlad at pagsulong. Nananatiling nag-aalab ang hangarin ng sambayanan na lumaya mula sa bilangguan ng kaapihan at pagsasamntala, at kamtin ang pambansa at panlipunang paglaya.

Higit kailanman sa nakaraan, mahigpit ang pangangailan para sa paglahok ng mga makabayang siyentista sa pagsusulong ng rebolusyonaryong pakikibaka, katuwang ang manggagawa at magsasaka at masang anakpawis. Napakalaki ng inyong maiaambag sa iba’t ibang larangan at anyo ng rebolusyonaryong pakikibaka.

Dapat gamitin ang inyong kaalaman sa teknolohiya sa pagbubuo ng mga hakbang at pagtuturo sa mamamayan ng mga pamamaraan ng pag-iingat at pagdaig sa malawakang pagsasarbeylans (state surveillance) at armadong panggigipit ng pasistang estado laban sa mamamayan. Napakahalaga din ng inyong papel sa paglaban sa pambabaluktot sa katotohanan na ginagawa ng US at naghaharing sistema upang linlangin ang mamamayan, pagtakpan ang kanilang mga krimen at imbing mga pakana at ilayo ang mamamayan sa rebolusyon.

Hamon din sa inyong mga makabayang siyentista na lumahok sa pagsulong ng armadong pakikibaka sa kanayunan. Malaki ang maiaambag ninyo sa paggamit ng teknolohiya sa pagpapaunlad ng bagong mga kagamitan at sandata, kasama ang simpleng mga kagamitan at kaalaman ng masa, para sa pakikidigmang gerilya ng malawak na masa at ng kanilang hukbong bayan.

Sa pakikikiisa sa inyong anibersaryo, muling pinagtitibay ng Partido ang pinakamataas na pagkilala at pagpapahalaga sa syensya at sa siyentipikong pag-iisip bilang susi sa lahat ng kanyang pagpupunyagi. Itinataguyod ng Partido ang ideolohiya ng Marxismo-Leninismo-Maoismo, isang buong sistema ng pag-iisip, para pag-aralan ang kasaysayan at lipunan na may siyentipikong katumpakan. Katulad ninyong mga alagad ng agham, ginagamit ng Partido ang syensya sa pagsusuri, laging nagsisimula sa pagsisinop ng datos, upang mailarawan ang kongkretong kalagayan ng maka-uring lipunan, tuklasin ang mga batas ng tunggalian, at gawin ang kailangan para matamo ang rebolusyonaryong pagbabago.

Nagtitiwala kami na patuloy na magpapalakas at magpapalawak ang LAB sa harap ng malaking hamon na lumahok at mag-ambag sa pagsusulong ng demokratikong rebolusyong bayan. Kasabay nito, hinihikayat namin kayo na mag-aral ng Marxismo-Leninismo-Maoismo at pandayin ang mga sarili bilang mga proletaryong rebolusyonaryo sa pagbagtas ninyo sa apoy ng rebolusyonaryong pakikihamok.

Mabuhay ang Liga ng Agham para sa Bayan!
Ibagsak ang imperyalismo, pyudalismo at burukratang kapitalismo!
Mabuhay ang sambayanang Pilipino!
Isulong ang demokratikong rebolusyong bayan!
Isulong ang matagalang digmang bayan!