Ginapakamalaot sang Mt. Cansermon Command-New People’s Army (MCC-NPA) ang padayon nga militarisasyon sa nabukid nga bahin sang Brgy. Carabalan, Himamaylan City, Negros Occidental kon sa diin sunod-sunod nga nagadugang ang rekord sang pagpanglapas sang tawhanon nga kinamatarung sang Armed Forces of the Philippines (AFP) kag Philippine National Police (PNP) batok sa pumuluyo ilabina sa mga mangunguma.

Masobra isa ka bulan na nga naga-operasyon ang tropa sang 94th IB kag Regional Mobile Force Battalion (RMFB)-6 sa amu nga lugar halin pa sa bulan sang Hulyo.

Ginakundenar sang MCC-NPA ang pagdakop kay Romeo Balsimo, masobra 60 anyos ang edad, isa ka mangunguma, nga nagapuyo sa Sityo Cunalom, Brgy. Carabalan, Himamaylan City sadtong Agosto 7. Ginpasibangdan siya nga katapo sang yunit milisya sang NPA kag imbolbado sa natabo nga engkwentro sa kasikbit nga Sityo Camoag sadtong tuig 2020.

Kabutigan ang ginapasibangud sang 94th IB RMFB-6 kay Romeo Balsimo. Wala sang malain nga rekord si Balsimo batok sa pumuluyo. Kon matuod gid man nga may kaso ang senior citizen nga si Balsimo, dapat respetohan ang iya kinamatarung kag ipaagi sang husto nga proseso kag ipaatubang sa korte. Indi nga pinagusto nalang ginadakup kag ginapato-patoan sang kaso sang mga miltar kag kapulisan ang ila mga ginadudahan nga may angot sa NPA kag rebolusyonaryo nga kahublagan.

Madumduman nga sadtong ulihi nga semana sang Hulyo, biktima man sa pagpangkastigo si Nono Balsimo, anak ni Romeo Balsimo. Ginbaklid kag gingapos si Nono, kag ginbulos-bulosan sang pagkastigo sang 94th IB kag RMFB-6. Ginpilit ini nga mag-ako nga katapo sang NPA ukon yunit milisya kag ginapasibangdan nga upod sa natabo nga engkwentro sa tunga sang militar kag NPA sa katambi nga sityo sadtong tuig 2020. Upod sa lima pa ka mangungum nga ginkastigo sa nasambit nga militar kag kapulisan, dululongan sila nga nagpa-blotter sa Himamaylan Police Station.

Kadungan man sini ang pagdakop kay Lodorico But-ay, masobra 60 man ang pangidaron, isa ka mangunguma sa amu nga sityo. Ginpasibangdan siya nga Commanding Officer (CO) sang yunit milisya.

Ang mga nasambit nga biktima mga myembro sang Indigenous People (IPs) kag Farmers’ Association of Barangay Carabalan-Cunalom Chapter (FABCA-Cunalom), isa ka lokal nga asosasyon sang mangunguma sa lugar.

Ginahangkat sang MCC-NPA ang local government unit sang Himamaylan City nga buligan kag protektahan sini ang iya ginsakopan nga pumuluyo kag pangapinan ang ila kinamatarung batok sa uhaw sa dugo kag berdugo nga bayarang 94th IB kag RMFB-6. Ginpakita lang sang AFP kag PNP ang ila ka desperado nga pukanon ang rebolusyonaryo nga kahublagan nga bisan inosente nga sibilyan ang ginadakop, ginpasibangdan nga katapo sang yunit milisya ukon NPA kag ginpasakaan sang mga pato-pato nga kaso.###