Sukad pa niadtong Oktubre 12, wala nay undang ang pagpanghasi sa kumbinadong tropa sa 11th IB, CAFGU, ug Philippine National Police sa habagtnan nga bahin sa Negros Oriental. Niining ulahing semana sa Nobyembre, gipasamotan pa sa mga pasistang kriminal ang ilahang pag-atake sa mga mag-uuma, lumad, mamumuo sa uma, ug uban pang kabus nga katawhan sa lugar.

Sa Bayawan City, Negros Oriental, unom ka barangay ang gisakop sa ilahang operasyon militar. Niadtong Nobyembre 26 hasta 28, masobra 60 ka tropa ang nakita gikan sa gym sa proper Barangay Tayawan ug dayon nilakat pa padulong sa Sitio Dita; sa petsa 26 pud nisulod ang upat ka military truck sa Pamari, boundary sa Negros Oriental ug Occidental. Pagka Nobyembre 27, may tulo ka kolum nga nasayran sa Sitio Kanggabi, Mansidlot, Tigbao, ug Tigso nga sakop sa Barangay Narra; sa Sityo Manlubid ug sa mga kasikbit nga sityo sulod sa Barangay Ali-is, nag-operasyon pud ang militar kuyog ang mga traydor sa rebolusyon nga surrenderees; sa petsa 29 sa Barangay Tayawan; ug anaa usab mga tropa militar sa Barangay Villasol, Dawis ug Kalumboyan ani nga mga adlawa.

Kadungan ani, ang presensya sa militar sa Barangay Sto. Niño, Tanjay City, ilabi na sa proper ug sa Sityo Kayawkaw. Ang mga reaksyunaryong tropa nagpakanaog og curfew gikan sa alas 8:00 sa gabii hangtod alas 4:00 sa buntag, samtang gipugos ang mga tawo nga mo-report sa ila kung adunay mga dili mailhan nga tawo sa ilahang mga lugar.

Dugang ani, namatngonan sa mga residente nga naay artillery (kagamitan pangbomba) sa detatsment sa Barangay Calicanan, Pamplona, Negros Oriental.

Kung sumahon, susama ra sa irong buang ang mga pulis ug militar sa ilahang pagpanghasi sa mga komunidad ug kinaiyahan. Bisan nagpalanog na sa ilahang hinambog nga ‘dismantled’ na ang larangan sa Southeast Negros, ang kini nga sustenidong operasyon nagpamatuod lang sa ilahang bakak ug kapakyasan nga pildihon ang rebolusyonaryong kalihukan nga nakaugat sa masa.

Tungod suluguon sa mga dalagkong agalong yutaan ug komprador burgesya, naga-operasyon ang mga mersenaryong AFP ug PNP para depensahan ang interes sa ilahang mga adunahang amo ug komander. Atong mahinumduman nga ang Bayawan City nalangkob sa sunod nga phase sa Tamlang Valley Zone of Peace, ang neoliberal nga proyekto sa probinsya para sistematiko nga mailog ang yuta sa mga mag-uuma.

Gawas ani, target pud sa magun-ubong mina ang Bao-bao Peak sa Barangay Tayawan, Bayawan City, samtang ang lasang sa Pamari nga anaa sa maong barangay target pud sa pagpatanom sa pang-export nga oil palm ug rubber tree.

Taliwala niini, magpabiling determinado ang Rachelle Mae Palang Command-New People’s Army (RMPC-NPA) isip sundalo sa kabus. Kadungan sa pagkundena sa panghasi, pasismo, ug terorismo sa estado, anaa nagpabilin ang kalayo sa rebolusyon nga siguradong mukuyanap pa sa tibuok habagtnang Negros Oriental, tungod mismo sa gipanghimo sa reaksyunaryong gobyerno ug sa mga irong buang niya nga mga tropa.

Andam nga muatubang ang mga pwersa sa larangan sa tanang hagit ug sakripisyo para sa pagduso sa dugay nang handom sa katawhan nga tinuod nga kagawasan ug demokrasya.