Nikabat na sa 18 ka adlaw ang kuyanap nga operasyon sa sakop sa Guihulngan ug Canlaon City, Negros Oriental ug La Castellana ug Moises Padilla, Negros Occidental. Nag-abot sa 11 ka baryo ang ilang operasyon nga nagmugna og kalisang ug kakuyaw sa mga sibilyan sa mao nga mga lugar tungod sa ilang pagpang-imbestigar, pagpangsulahog og pangpanghasi sa mga mangunguma. Gimobilisa niini ang halos tibuok pwersa ilalom sa 62nd IB ug mga CAA detachments isip mga force multipliers.

Marso 5 sa kaadlawon: Giransak sa dili moubos sa 20 ka tropa militar ilawom sa 62nd IB Bravo Company ang balay sa usa ka mangunguma nga nailhang si Melchor Fat sa Sityo Kantawad-Libas, Barangay Imelda, Guihulngan City samtang wala diri ang tagbalay. Giutingkay sa mga militar ang kagamitan sa maong panimalay.

Dugang niini, giyatak-yatakan sa maong tropa ang mga pananom sa mga mangunguma sa mga sityo sa Libas, Suhi, Kantawad, Lumurang ug Li-ong sa magkasikbit nga baryo sa Hinakpan ug Imelda sakop sa syudad sa Guihulngan. Hangtod karon, naa gihapon ang presensya sa mga militar sa sakop sa boundary niini nga Sityo Suhi ug Kantawad nga dili moubos sa 40 ka tropa.

Marso 3: Nag-operasyon usab ang dili momenos sa 40 ka tropa ilalond IB Delta Coy sa sakop sa mga barangay sa Cabagnaan ug Kamandag. Nagpundo sa tunga sa komunidad ang 16 ka tropa sa proper sa Barangay Kamdandag gikan sa ilang pagpangsulahog sa Purok Kalubihan ug Purok Tulo-tulo sa maong baryo. Samtang anaa usab sobra 20 ka tropa nga nagpundo sa proper sa Barangay Cabagnaan.

Pebrero 17: Nagsugod ang operasyon sa gibana-bana nga dili momenos sa 80 ka tropa ilalom sa 62nd IB ug CAA sa sakop sa Barangay Quintin Remo, Moises Padilla. Nakit-an ang 20 ka tropa sa Sitio Binataan nga nagpundo sa balay sa usa ka mangunguma nga si Ledia Catacio. Nakita usab ang dili moubos sa 40 ka tropa nga nagpundo sa simbahan ug sa balay sa mangunguma nga si Felix Sibungga sa Lower Tios. Samtang anaa usab sa Tibobong sa eskwelahan sa elementarya.

Gireklamo sa mga lumulupyo ang ila pagpanghulga sa mga mangunguma ug pagpundo niini nila sa mga sibilyan nga institusyon sama sa simbahan. Hantod karon, anaa gihapon ang presensya sa mga militar sa maong dapit.

Pebrero 17: Dili usab moubos sa 40 ka tropa ang nakita nga nagpundo sa balay sa usa ka mangunguma nga naila nga si ‘Asmad’ sa Sityo Maluy-a, Barangay Sandayao, Guihulngan City. Tungod niini, nahadlok na nga magpanglawig sa ilang mga khayopan ang mga mangunguma sa maong lugar tungod sa kahadlok nga maimbestigaran og makulatahan. Hangtod karon, anaa gihapon ang maong kasundaluhan sa maong sityo.

Pebrero 21-29: Nagpundo sa balay sa mga mangunguma nga sila “Juanting” ug Pemyo Balbuena sa Sityo Agogolo, Barangay Macagahay, Moises Padilla ang 44 ka tropa ilalom sa 62nd IB Charlie Coy ug CAA sa Alingasaw detachment. Nagpang-imbestigar ang maong tropa sa mga sibilyan nga mag-agi sa dalan ug nagtuga kini og kahadlok sa mga mangunguma.

Pebrero 21: Nagapangbalay-balay usab ang gabuak sa upat ka kolum nga tropa militar ilalom sa 62nd IB Charlie Coy ug CAA Budlasan ug Buyon detachments sa mga sityo sa Hinumayan, Banderahan, Katugisan ug Natuling. Kini nga mga sityo boundary sa Guihulngan og Canlaon City.

Samtang anaa usab nag-operasyon ang dili moubos sa tulo ka kolum sa Sityo Gusa, Barangay Budlasan, Canlaon City ug Panagtugas, Kambawugon ug Tuko sakop sa Barangay Trinidad, Guihulngan City. Hangtod karon anaa gihapon ang maong tropa sa panimalay ni Maria Macalua sa Sityo Kambawugon.

Pebrero 27: Nag-abot og unom ka kolum ang nag-operasyon nga tropa ilalom sa 62nd IB Bravo ug Alpha Company ug mga pwersa sa CAA Sandayao, Binobohan ug Kasingan detachment ang mga Sitio sa Punong, Kandalanon ug Manlibod sakop sa Barangay Trinidad; mga sityo sa Titip, Kapudlusan, Matandugo, Kalubasa, sakop sa Barangay Sandayao; Sitio Tulingon ug Agpapataw sa Barangay Binobohan ug Sityo Somil, Barangay Tacpao; tanan sakop sa Guihulngan City.

Nagapundo kini sa mga panimalay sa mga sibilyan sa sobra semana na nila nga operasyon hangtod karon.