Gikondena sa National Democratic Front – Bohol ang gihimong pag-aresto sa gikomposar nga tropa sa AFP ug PNP sa usa ka alagad sa simbahang United Church of Christ in the Philippines (UCCP) nga si Reverend Nathaniel Vallente ug sa usa ka konsehal sa Barangay Poblacion, Trinidad, Bohol nga si Carmelo Tabada. Mga aktibista sila sa pagpanalipod sa tawhanong katungod ug kritiko sa mga kahiwian sa rehimeng Duterte, dili sila mga kriminal.

Wala’y motuo sa gihimong pagpamotbot sa militar ngadto sa publiko ginama-gamang mga kasong kriminal ug tinanom nga mga ebidensyang armas, bala ug granada. Luod na kaayo paminawon ang mga bakak nga pangatarungan aron lang mahimong ma-isyuhan og warrant of arrest aron arestohon ang mga aktibista ug gub-on ang ilang maayong kadungganan.

Usa kini ka grabe nga dagway sa pagpangabuso sa militar ug sa NTF-ELCAC ngadto sa mga inosenteng mga biktima. Busa angay nga himuon ang hinanali nga pagbuhi kanila tungod kay wala silay nahimong salaod. Kining mga dinautan nga binuhatan sa AFP ug NTF-ELCAC, usa ka dagway sa desperadong mga lakang sa ilang kontra-insurhensyang kampanya ug nagdugang lamang kini sa basehanan nga labaw pa silang mahimulag sa katawhan sa tibuok kalibutan ug nagduso sa katawhan nga mosukol batok kanila pinaagi sa pagsalmot sa armadong rebolusyon sa katawhan aron ipakigbisog ang ilang mga tawhanong katungod ug kagawasan.

Busa kinahanglan ang katawhan nga maghiusa sa paglihok ug mokondenar sa ingon niini nga binuhatan sa militar ug sa rehimeng Duterte. Dili na hulaton nga aduna pa’y lain nga dugang pang mamahimong biktima.###