Roselyn Jean Pelle Command

Ang Roselyn Jean Pelle Command sang New People’s Army (RJPC-NPA) nagsabat sa panawagan sang pumuluyo sa Don Salvador Benedicto nga warningan kag dis-armahan ang paramilitar nga SCAA ukon Special CAFGU Active Auxilliary nga ginapamunuan sang ila mga lider-lider nga katapu sang bandido nga RPA.

Gani ginpatigayon ini sadtong Marso 21, 2019, alas 5:20 sang kaagahon sa Sityo Mayana, Brgy. Bago, Don Salvador Benedicto. Sa aktwal nga panghitabo, wala nagpati ang nasambit nga grupo sa pag-abiso sa ila sang isa ka team sang NPA nga dis-arma lang ang katuyuan sang hukbo sang banwa. Nagbato ang grupo paagi sa pagpalupok rason nga nagdepensa ang mga operatiba sang NPA kag naigo kag napatay sila Lucio kag Domingo Agravante nga mga myembro sang RPA/SCAA. Ang RJPC-NPA ang responsable sa amo nga insidente kag indi dapat pasibangdan ang sino man nga sibilyan.

Nakumpiska sang NPA ang 3 ka kalibre .357; 1 ka kalibre .38; 1 ka kalibre .45 pistola, mga bala sini dala man ang 2 ka yunit sang cellphone halin sa grupo sang RPA/SCAA.

Ang kaso sang partikular nga grupo sang RPA/SCAA sa DSB, amo ang pag-espiya ukon pagpanilag sa mga giho sang NPA bilang aset sang AFP nga nakabase sa detastment sa Brgy. Marcelo, Calatrava; pagpangawat sa pumuluyo kag landgrabbing ukon pagkuha sang mga uma sa mga tumandok nga nagatalauma, pagpang-harvest sa mga tanum sang mga mangunguma kag paghalit sa tanum sang mga pumuluyo. Ang ini nga mga kaso sang ini nga grupos sang RPA/SCAA nga grupo halin pa sang tuig 2014 kag nasang-at na sang pumuluyo biskan sa lokal nga pamunuan sang barangay sang reaksyunaryong gobyerno.

Ini sila aktibo nga ginasuperbisahan sang mga RPA sa Balasyang, Bagonbon nga ginapamunuan ni Natan Bayog-ang Bagonbon kag upod sila Meliton kag Oding Boli-Boli nga ginasuportahan kag may koneksyon sa kay DSB Vice-Mayor Nehemias Dela Cruz Jr.

Indi matuod nga nakakuha ang mga operatiba sang RJPC-NPA sang P70,000 nga kwarta nga gin-alegar sang isa ka “Roldan” nga katapu sang RPA. Ara sang disiplina ang mga operatiba sang NPA kag amon ginapahayag ang tanan nga nakumpiska sa operasyon. Samtang ang kahimtangan sang ini nga grupo sang RPA/SCAA nagapangawat pa sa tanum sang pumuluyo agud makakaon. Ang ini nga grupo madugay na nga ginareklamo sang pumuluyo sa DSB nga nagapangwat kag nagapamahog sa ila erya, rason nga sila ginpaandaman sang NPA. Wala sila namati kag nangin aktibo pa sila bangud nga ginasuportahan sang kontra-rebolusyonaryo kag dunot nga dinastiya sang mga Dela Cruz sa DSB.

Subay sa International Humanitarian Law o IHL, wala sang may ginalapas ang RJPC-NPA sa pagpanaug sang rebolusyonaryong hustisya sa RPA/SCAA. Bangud nga ginsunod sang NPA ang proseso sa pag-implementar ukon engagement kag ang nasambit nga grupo wala magkooperar sa pag-disarma kag pag-aresto sa ila kag ini nagresulta sa kaswalidad sa ila grupo.

Gani ang RJPC-NPA nagapahayag sa publiko, ilabe na sa mga kontra-rebolusyonaryo kag malaing elemento nga nagapagamit sa mga dunot nga pulitiko kag balayran sang dalagkong agalong may duta nga nagatuga sang dako nga kahalitan sa pumuluyo: ang RJPC indi magpangduha-duha nga magpanaug sang rebolusyonaryong hustisya. Ang RJPC nagapanugyan nga magkooperar kag makipagsugilanon sang matawhay ang mga akusado para maresolbar ang mga kaso nga ginsang-at sang pumuluyo batok sa ila.