Wala kag tuo nga mga reklamo ang ginpadangat sang mga residente sa Barangay Marcelo sakop sang Calatrava, Negros Occidental sa lapnagon nga mga kaso sang pagpanglugos sa amo nga erya kag kaingod nga mga lugar. Nagakahingawa ang mga ginikanan para sa ila mga asawa, utod kag anak nga babaye basin sila naman ang mangin dasun nga biktima. Kini nga mga reklamo ang gin-aksyunan gilayun sang Roselyn Jean Pelle Command – Northern Negros Guerilla Front sang New People’s Army (RJPC-NPA).

Alas 5:00 sang nagligad nga kaagahon, sang ginsilotan sang isa ka yunit sang RJPC-NPA si Delberto Aurita, 62 ang panuigon kag isa ka lupon, sa Sityo Palala sa nasambit nga barangay. Pila ka beses niya nga ginlugos ang pipila niya ka kapamilya, lakip ang mga menor de edad. Nakilala siya sa lugar bilang isa ka manuggamit sang iligal nga droga. Ginareklamo man siya sa mga rebolusyonaryo nga masa bilang tigpanilag sa hulag sang ginpatihan niya nga supporter sang rebolusyonaryo nga kawsa kag sa hulag sang NPA sa lugar.

Sadtong Disyembre 10, ginsilotan man sang mga operatiba sang RJPC-NPA si Angelo Dela Cruz, isa ka barangay tanod, mga alas 5:00 sang kaagahon sa Sityo Kamao sa amo gihapon nga barangay. Madugay nga ginareklamo si Dela Cruz sa pagpanglugos sa iya mga kadugo, lakip man ang menor de edad.

Kini nga mga rapists ang madugay na nga ginareklamo sa mga residente nga may kabalaka bangud nagaobra sila sa barangay. Indi ang ila obra ang ginhimuan sang aksyon sang NPA kundi ang ila sala batok mismo sa ila mga kapamilya nga nagpinta sang kahingawa sa ila malinong kag luwas nga pangabuhi.

Sa lain nga operasyon, ginsilotan sa isa ka team sang RJPC-NPA sadtong Disyembre 2 sa Sityo Kabalagnan, Barangay Laga-an sakop sang nasambit nga banwa si Welfredo Brasona, isa ka chainsaw operator sang Barangay Anie sang amo gihapon nga banwa.

Madugay na nga target si Brasona bangud sa iya utang nga dugo kag aktibo nga pagpang-espiya batok sa pumuluyo. Isa siya sa mga napamatud-an nga nagpanilag sa mga kaupod sadtong dekada 80 nga niresulta sa pagka-reyd sa maong yunit kag pagkamartir sang isa ka kaupod didto sa lugar kun sa diin siya ginsilotan. Sini nga mga tinuig, si Brasona man ang ginareklamo sa pagpanudlo sang mga ordinaryo nga mangunguma bilang supporter sang hublag. Gingamit niya ang iya obra bilang operator sang chainsaw sa pagapanilag sa hulag kag temporaryong tiniranan/besingan sa mga NPA.

Human sa aksyong pagsilot, narekober sa mga operatiba sang RJPC-NPA ang isa ka .45 nga armas-luthang, magasin kag mga bala sini halin kay Brasona.

Ginkalipay kag ginpalakpakan sang mga pumuluyo ang asud-asod nga aksyon sang RJPC-NPA batok sa mga kontra-rebolusyonaryo kag notoryus nga kriminal nga naghawan sa dalan para amat-amat malab-ot ang luwas kag malinong nga panimuyo.###