Sa tumang kalipay, atong saulugon ang ika-57 nga anibersaryo sa dungganong Partido Komunista ng Pilipinas! Niining makasaysayanong okasyon, gipaabot sa Komite Sentral ang mainiton niining pagtimbaya sa tanang kadre ug myembro sa Partido, sa mga myembro sa mga kaalyadong rebolusyonaryong organisasyon sa National Democratic Front, sa mga higala, sa mga kaalyadong komunista, pwersang rebolusyonaryo ug anti-imperyalista sa lain-laing bahin sa kalibutan, ug sa tibuok katawhang Pilipino.

Niining adlawa, atong handumon ug pasidunggan ang tanang bayani ug martir sa rebolusyong Pilipino. Mobarog kita aron taas-kamaong pasidunggan si Kaubang Jose Maria Sison, nangulo sa pagtukod sa Komite Sentral sa Partido, nga nagsilbing giya ug iwag sa Partido ug sa daghang henerasyon sa mga komunista ug rebolusyonaryong aktibista. Ato usang pasidunggan ang tanang mga bayani ug martir sa katawhang Pilipino, lakip ang atong labing minahal nga mga lider nga nagsilbi sa Komite Sentral, mga Pulang manggugubat sa Bagong Hukbong Bayan, ug tanang mga kadre ug myembro nga tibuok kasingkasing nga gihalad ang ilang tibuok kinabuhi alang sa kaayuhan sa paglingkawas sa tanang dinaugdaug.

Saluduhan nato silang Kaubang Luis Jalandoni, kanhing nangulo sa internasyunal nga representante sa NDFP ug sa NDFP panel sa panaghisgot kalinaw, nga namatay niadtong Hunyo sa The Netherlands; ug si Kaubang Maria Malaya (Myrna Sularte), nga gipatay sa kaaway sa usa ka panagsangka sa kabukiran sa Butuan City niadtong Pebrero. Gihatag usab nato ang pagsaludo kang Kaubang Basavaraju, kanhing kinatibuk-ang kalihim sa Komite Sentral sa Communist Party of India (Maoist) ug si Kaubang Madvi Hidma, kumander sa People’s Liberation Guerrilla Army sa India, ug sa tanang uban pang rebolusyonaryo sa lain-laing bahin sa kalibutan nga naghalad sa ilang kinabuhi alang sa internasyunal nga proletaryado. Mokuha kita og inspirasyon sa ilang mahimayaong kinabuhi.

Ato usab nga gitimbaya niining adlawa ang tanang bag-ong myembro sa Partido, ilabina ang mga batan-ong kadre gikan sa han-ay sa masang anakpawis, mga intelektwal ug uban pang saray sa katilingban. Kamo ang kaugmaon sa Partido ug sa rebolusyong Pilipino. Magtuon pag-ayo, mangayo og giya, hashasan ang hunahuna ug magmapahiubsanon sa pag-atubang sa mga hagit sa pagpangulo sa lain-laing natad sa rebolusyonaryong gimbuhaton sa Partido. Kaabag ninyo sa pagpas-an sa mabug-at nga tahas ang mga beterano ug taas nag kasinatian nga mga kadre ug myembro sa Partido nga andam magtambag ug magpaambit sa ilang kasinatian.

Atong ibayaw ning adlawa ang Marxismo-Leninismo-Maoismo, ang lig-ong teoretikal nga pundasyon diin nakabarog ang Partido. Kini ang unibersal nga teorya alang sa pagpalingkawas sa hut-ong mamumuo ug tanang hut-ong dinaugdaug. Palig-onon nato ang mga batakang prinsipyo sa Partido ug ang programa niini alang sa demokratikong rebolusyon sa katawhan pinaagi sa malungtarong gubat sa katawhan, aron tapuson ang madaugdaugong sistemang semikolonyal ug semipyudal, ibagsak ang tulo ka batakang problema nga imperyalismo, pyudalismo ug burukrata-kapitalismo, ug kab-oton ang demokrasya ug nasudnong paglingkawas aron mugnaon ang kundisyon alang sa sosyalistang kaugmaon.

Nagasulod kita karon sa ikatulong tuig sa atong kalihukang pagtul-id, nga nag-una, usa ka Marxista-Leninista-Maoistang kalihukang pagtuon. Sa diwa sa kalihukang pagtul-id, nagtuon kita balik sa atong kasinatian ug kritikal-sa-kaugalingong giila ang atong mga kahuyangan ug kasaypanan. Gikalipay sa Komite Sentral nga itaho nga padayon ang pagbunga sa atong kalihukang pagtul-id ug nakabaton og makahuluganong mga pag-abante sa ideolohiya, pulitika ug organisasyon. Masaligon kita nga sa padayong paningkamot sa tanang kadre ug myembro sa Partido, sa pagpangulo sa Komite Sentral, atong makab-ot ang mas dakung kadaugan sa umalabot nga mga tuig.

Sa iwag sa Marxismo-Leninismo-Maoismo, hait natong tukion ang nag-unang mga kontradiksyong naglangkub sa kasamtangang giatubang nga sitwasyon sa nasud ug tibuok kalibutan. Atong huptan ang malahutayong krisis sa semikolonyal ug semipyudal nga sistema sa Pilipinas, ug ang dugay nang istagnasyon sa kalibutanong sistemang kapitalista. Nag-abli kini sa daghan ug dagkung oportunidad aron iasdang ang tinguha sa hut-ong mamumuo ug tanang dinaugdaug ug pinahimuslang hut-ong alang sa paglingkawas.

Sa sinugdanan sa kasamtangang tuig, gidahum nato ang pag-ulbo sa krisis sa nagharing sistema ilalum sa rehimeng US-Marcos. Apan, nalabngan kini sa paspas nga paghinog ug pag-ulbo sa sitwasyon sukad sa tunga-tunga sa tuig. Timaan kini, dili lamang sa lalum nga krisis sa ekonomiya ug katilingban, apan sa mas nag-awas-awas nga kasilag sa katawhang Pilipino sa pagpangdaugdaug ug pagpaantus kanila sa mga mapahimuslanon ug makawkawong nagharing hut-ong.

Siguradong magpadayon pa sa umalabot ang walay kasulbarang krisis atubangan sa malukpanong korapsyon, pagsabwag og pasistang terorismo ug sa tumang pagpakaitoy sa rehimeng Marcos sa US. Ang rehimeng US-Marcos karon ang pinakakonsentradong dagway sa pagpangdaugdaug ug pagpaantus sa katawhang Pilipino. Sa umalabot nga tuig, siguradong modaku ug molapad pa ang kalihukang protesta nga misulbong sa miaging mga bulan aron panubagon ug palagputon sa poder silang Marcos ug Duterte nga maoy nagrepresenta karon sa labing reaksyunaryong paksyon sa mga nagharing hut-ong. Dungan niini, siguradong moulbo usab ang malukpanong mga pagsukol sa kabanikanhan atubangan sa walay puas nga pagpangilog og yuta ug pagkawkaw sa bahandi sa nasud.

Haum kaayo ang sitwasyon karon sa Pilipinas aron pangulohan sa Partido ang dugang nga pag-abante sa demokratikong rebolusyon sa katawhan pinaagi sa malungtarong gubat sa katawhan. Atong sakmiton ang higayon aron labaw pang palapdon ug pakusgon ang Partido ug ang tibuok rebolusyonaryong kalihukan, ug lantawon ang mga dagkung pag-abante sa umalabot.

I. Nagkagrabeng mga panagbangi atubangan sa dili masulbad nga krisis sa kalibutanong sistemang kapitalista

Gitay-og ang tibuok kalibutan sa upat ka nag-unang kontradiksyon: tali sa monopolyong burgesya ug hut-ong mamumuo, tali sa imperyalismo ug katawhang nilupigan sa tibuok kalibutan, tali sa mga imperyalistang gahum ug mga nasud nga nanghingusog alang sa nasudnong kaugalingnan, ug tali sa mga nanagbanging mga imperyalistang nasud. Sa kasamtangan, ang nagkagrabeng mga bangi sa pulitika, pinansya, ekonomiya, pamatigayon, ug militar tali sa pinakadakung imperyalistang nasud ang prinsipal nga kontradiksyon, ilabina atubangan sa walay undang nga pagpahamtang sa imperyalistang US sa iyang hegemonya sa tibuok kalibutan. Kini ang prinsipal nga kontradiksyon nga naghulma sa kasamtangang sitwasyon sa tibuok kalibutan.

Nagaulbo sa lain-laing bahin sa kalibutan ang mga armadong panagbangi, nag-una tungod sa agresibong aksyon sa imperyalismong US. Hugot kining nakasumpay sa milungtad na nga istagnasyon sa ekonomiya sa nag-unang mga kapitalistang nasud nga dili kayang sulbaron sa monopolyong burgesya. Resulta kini sa nagpadayon nga krisis sa sobrang produksyon sa halos tanang industriya, ug nagkadakung imbentaryo sa dili mabaligya nga mga produkto. Subra-sobra ang produktibong kapasidad, ilabina sa mga nag-unang industriyalisadong nasud. Tungod kini sa pag-apas sa magkakumpetensya nga kumpanya nga lupigon ang usag usa sa produksyon sa pinakadaghang igbabaligya.

Adunay sobrang produksyon sa halos tanang industriya tungod sa padayon nga pagpalambo sa mga pwersa sa produksyon, partikular na ang mga pag-abante sa teknolohiya (lakip ang paggamit og artificial intelligence o AI). Adunay subra-sobra kapasidad sa produksyon sa mga kagamitang elektroniko, semikonduktor, mga baterya, sakyanang de-kuryente ug de-gasolina, mga solar panel, puthaw, lana ug petrolyo, kemikal, barko, komersyal nga transportasyon, eroplano, ug daghan pang uban. Adunay sobra-sobrang produksyon sa halos tanang produktong agrikultural (bugas, mais, soya, trigo ug uban pa), ilabina sa mga kapitalistang nasud.

Ginaguba o ginasayang ang mga pwersa sa produksyon. Tungod sa sobrang produksyon, daghang mga industriya ang ginapadagan nga mas ubos kaysa kapasidad sa produksyon. Sa US, pananglitan, 60%–70% lamang sa kapasidad niini sa produksyon sa mga sakyanan ang gakagamit. Sa Germany, anaa sa 70% lamang sa kapasidad sa kinatibuk-ang produksyon ang gakagamit, hinungdan nga wala nangagamit ang binilyong dolyar nga mga kagamitan sa produksyon. Sa China, may kapasidad ang mga pabrika dinhi nga magprodyus og hangtud 45 milyong sakyanang elektrik (e-vehicle), apan dili kini hingpit nga gakagamit tungod kay ang baligya sa kalibutanong merkado anaa sa 16–18 milyon lamang. Nagkadaghan ang mga kumpanyang nangalugi o gilamoy atubangan sa grabeng kapitalistang kumpetisyon.

Paspas karong nagkadaku ang bula sa AI nga gikabuangan sa dagkung monopolyong burgesya. Pipila ka trilyong dolyar ang ginabubo sa natad sa AI sa mga mosunod nga tuig, sa wala pay susamang gidak-on sa pamuhunan sa imprastruktura ug bono, mas labaw pa sa gilaumang demand ug ganansya niini. Ginatandi kini karon sa bula sa “dotcom” niadtong dekada 1990 nga mibuto sa ngadto-ngadto ug nagresulta sa usa ka krisis sa pinansya.

Labaw nga migrabe ang problema sa dinaghang pagpanangtang sa mga mamumuo, pagkibhang sa adlaw sa trabaho o pagsirado sa mga pabrika. Sa US, halos 560,000 kumpanya ang nabangkrap sa usa ka tuig gikan Setyembre 2024, kapin 10% pagdaghan kumpara sa miaging tuig, pinakataas gikan 2010; lakip ang 32 nga adunay sobra sa $1 bilyong ang kantidad, nga nagsirado sa 12 ka bulan gikan Setyembre 2024. Sa milabayng napulo ka tuig, dili moubos sa 100,000 ka kapitalistang umahan sa US ang nahagba tungod sa padayon nga pag-ubos sa presyo sa ilang produkto. Sa Germany, gilaumang moabot sa kinatibuk-ang 22,000 ang magsirado nga kumpanya sa tibuok tuig (60 kada adlaw), pinakataas sa usa ka dekada. Sa UK, kapin 2,000 kumpanya ang nagsirado kada bulan karong tuig, samtang anaa sa 50,000 ka empresa ang anaa sa kritikal nga sitwasyon. Sa China, gilaumang 15 ka kumpanya na lang (gikan 129 ka kumpanya) ang mabiling nakabarog sa industriya sa e-vehicle sa mosunod nga lima ka tuig.

Padayon nga nagkagrabe ang disempleyo sa tibuok kalibutan. Sa sektor sa teknolohiya, gibanabanang mokabat sa kapin 200,000 ang matangtang nga mamumuo hangtud sa katapusan sa tuig (70% niini sa US), lakip ang 24,000 sa Intel, 14,000 sa Amazon, 13,000 sa Verizon ug 9,000 sa Microsoft. Sa industriya sa sakyanan sa US, mokabat sa 15,000 (20% mas taas kumpara sa miaging tuig) ang gianunsyong mawad-an og trabaho karong tuiga. Gibanabanang hangtud 60,000 ka mamumuo sa sektor sa sakyanang elektrik sa China ang gitangtang sa trabaho gikan 2024. Kapin 48,000 empleyado usab sa United Parcel Service ang gisipa sa trabaho tungod sa pag-ubos sa mga deliberi.

Naglunang sa istagnasyon hangtud sa hinay nga paglambo ang kalibutanong ekonomiya. Nag-atubang sa nagkadakung hulga sa resesyon ang mga ekonomiya sa tanang sentro sa kapitalismo. Kini nga laraw sa hinay nga paglambo sa mga ekonomiya magduha ka dekada na, sukad nahitabo ang krisis sa pinansya niadtong 2008. Miuntol ang kalibutanong ekonomiya niadtong 2022 human mitiurok niadtong pandemyang 2020–2021. Karong tuiga, adunay mga banabana, lakip ang sa World Bank ug IMF, nga dili molambo ang kalibutanong ekonomiya lapas sa 2.3%, mas ubos kumpara sa ubos usab nga 2.5% paglambo niadtong 2024, atubangan sa malukpanong pagsirado sa mga empresa, pagpanangtang sa mga mamumuo ug ubos nga demand tungod sa taas nga tantos sa implasyon, ilabina sa mga produktong pangkonsumo.

Nagpabiling anaa sa risgo sa resesyon ang ekonomiya sa US nga gibanabanang molambo lang sa 1.7%–2% karong tuiga. Halos katunga (o 22) sa mga estado sa US ang anaa na sa resesyon. Ilalum sa palisiyang “America First” sa gubyernong Trump, gipatuman ang mga desperadong lakang nga kuno aron subling palagsikon ang ekonomiya ug industriya. Lakip dinhi ang pagsaka sa taripa sa halos tanang ginaimport nga produkto sa US nga adunay deklaradong laraw nga proteksyunan ug suportahan ang lokal nga industriya ug manupaktura. Ingonman, sa milabayng 11 ka bulan, nagpabiling nagpundo o hinay pa ang produksyong industriyal, lakip ang puthaw ug mga sakyanan, atubangan sa sobrang kalibutanong produksyon ug sobrang na imbentaryo.

Gilauman usab nga molambo lang og 1.3% ang ekonomiya sa mga nasud sa European Union, lakip ang nahagba nga ekonomiya sa Germany nga mokabat lamang og 0.2% (gikan -0.3% niadtong 2024). Anaa usab sa risgo sa resesyon ang United Kingdom gikan pa niadtong milabayng tuig. Mihagba sa -2.3% ang Japan niadtong ikatulong kwarto sa tuig, ug wala gilaumang molambo lapas sa 1% sa tibuok tuig. Padayon usab nga mihinay ang pagdaku sa ekonomiya sa China nga gilaumang mokabat lamang sa 5% (gikan kapin 10% paglapad niadtong 2000–2010), atubangan sa pagkalugi sa mga natanggong nga proyektong real estate (lakip ang subra-sobrang mga kondominyum ug bilding nga pang-upisina), natipun-og nga dili mabayarang lokal nga utang ug pagtiurok sa pamuhunan sa manupaktura ug imprastruktura.

Sa kinatibuk-an, gibanabanang adunay 40–60 nasud ang anaa sa ngilit karon sa resesyon. Gawas sa mga nag-unang sentro sa kapitalismo, lakip usab dinhi ang pipila ka abanteng ekonomiya sa Europe sama sa Austria, Germany, Italy, France ug Switzerland nga parehong negatibo o sero ang tantos sa paglambo sa ekonomiya, dugang pa sa daghang atrasadong nasud.

Labawng nagpagrabe ang grabeng krisis sa sistemang kapitalista sa pagkaguba sa kinaiyahan ug krisis sa klima. Dayag nga mibalibad ang dagkung kapitalistang nasud nga magpapugong sa pagkawkaw sa natural nga bahandi ug mga hilaw nga materyales, hinungdan sa nagkagrabeng polusyong industriyal ug pagsaka sa temperatura sa tibuok kalibutan. Walay pulos ang tinuig nga pagpakaaron-ingnong “climate change conference” nga gipangunahan sa UN, lakip ang gilunsad ning bag-o sa Brazil.

Taliwala sa krisis sa kalibutanong sistemang kapitalista, labaw nga mius-us ang dili industriyalisado, agraryo ug atrasadong ekonomiya sa mga kolonyal, semikolonyal ug semipyudal nga nasud. Kini nga mga nasud giparalisa sa pipila ka dekadang mga palisiyang neoliberal nga nag-abli sa maong mga nasud isip han-ukanan sa langyawng sobrang produkto ug pagpangawkaw sa langyawng kapitalistang pamuhunan. Tungod sa dili patas nga bayloay, nakasinati ang maong mga nasud sa malahutayong depisito sa pamatigayon, krisis sa pinansya ug pagsalig sa utang. Samtang nagkakusog ang kumpetisyon sa mga monopolyong burgesya alang sa tinubdan sa pinakabaratong mga hilaw nga materyales, samot nga giilugan ang maong mga nasud sa mga imperyalistang gahum. Nag-antus ang pipila ka bilyong katawhan atubangan sa malukpanong disempleyo, ubos nga suhulan, pagpangilog og yuta ug panginabuhian, ug uban pang porma sa pagpaantus ug pagpangdaugdaug.

Padayon nga nagsalig sa pagpangutang ang mga nasud sa pagsulay nga labngan ang krisis sa ilang mga ekonomiya, suportahan ang mga subsidyo sa estado alang sa mga nabangkrap nga kumpanya, pondohan ang mga imprastruktura ug nagkadakung gasto sa depensa. Sulod lamang sa unang unum ka bulan sa 2025, misaka og $21 trilyon ang kalibutanong utang ug sa halos $340 trilyon sa tunga-tunga sa tuig. Gilangkuban sa kinatibuk-ang kalibutanong utang ang halos 290% sa kinatibuk-ang kalibutanong produksyon, nga halos katugbang sa pinakataas nga naabot niadtong 2023. Mayorya sa kalibutanong utang gunit sa US, Japan, China ug pipila ka mayor nga nasud sa Europe. Dinhi, 1/3 ang utang sa US. Ang pangpublikong utang gilaumang modaku gikan $102 trilyon niadtong katapusan sa 2024 ngadto sa $115 trilyon sa katapusan sa tuig. Mikabat sa $31 trilyon ang pangpublikong utang sa mga atrasadong nasud, dobleng pagdaku sa milabayng 15 ka tuig. Dili moubos sa 35 ka nasud ang anaa sa risgong dili makabayad sa ilang mga utang.

Ginasugnuran sa nagkagrabeng kalibutanong krisis sa kapitalismo ang grabeng panagbangi sa mga imperyalista ug mga kaguliyang sa kalibutan. Gipahamtang ni Trump ang dugang nga mga taripa sa halos tanang nasud aron makakuha og mga konsesyon sa pamatigayon (lakip ang pagpasulod sa mas daghang produkto gikan sa US, ug pakontrata sa pagbaligya sa mga sarplas nga kagamitang militar). Sa iyang gihimo, labaw niyang gipagrabe ang kumpetisyon sa ekonomiya ug pamatigayon sa mga imperyalista ug gipalalum ang mga sentimyentong anti-US sa tibuok kalibutan.

Labaw pang nagkadaku ang hulga sa pag-ulbo sa mga mayor nga armadong kaguliyang sa lain-laing bahin sa kalibutan, dungan sa nagkadakung pondong gibubo sa mga imperyalista sa militar ug depensa. Misaka kini og 9.4% niadtong 2024 ngadto sa $2.72 trilyon, mas paspas ang pagsaka sa milabayng kapin tulo ka dekada. Padayon ang maong pagsaka karong 2025. Mokabat sa $1 trilyon ang gasto sa militar sa US karong tuiga. Sa gambalay sa bag-ong National Security Strategy (2025) sa US (nga nag-unang nakapukos sa China ug Russia), gideklara niini ang laraw nga palambuon ang “pinakagamhanan, pinakalambo, ug pinakaabante sa teknolohiya” nga pwersang militar.

Ginaduso sa US nga angayan niining labwan sa mas dakung pwersa ang China sa kadagatan ug “first island chain” sa palibot sa nasud. Tumong kuno niini nga “likayan ang kumprontasyon,” apan labaw lamang niining gipadaku ang posibilidad nga masugnuran ang armadong panagbangi ug gubat. Sa kaugalingong bahin niini sa kalibutan, ginalunsad karon sa US ang planong sulungon ang Venezuela (sa South America) sa takuban sa “pagbatok sa drug cartel” aron pahagbaon ang anti-imperyalistang gubyerno ni Maduro, ug tukuron ang usa ka papet nga gubyerno. Human ang naglungtad nga gyera sa Ukraine nga gisulsulan sa US ug NATO, ginaduso karon sa US ang usa ka kasabutan aron bahinon ang rekurso ug kayutaan sa nasud. Sa Middle East, padayon nga kaabag sa US ang Zionistang estado sa Israel sa gyerang henosidyo batok sa Palestine nga mipatay sa dili moubos sa 67,000 ka Palestino sa duha ka tuig nga pagpamomba sa Gaza gikan Oktubre 2023. Taliwala sa “hunong-buto” nga gipatung-an sa US niadtong Oktubre, padayon ang mga pag-atake sa mga pwersang Zionista nga nagresulta sa pagpatay sa dili moubos sa 400 na ka Palestino. Ginakasa sa US ang plano niining kontrolon ang pipila ka bahin sa Gaza Strip, bisan og sukwahi kini sa plano sa Israel nga ilugon ang tibuok yuta. Gitabangan sa US ug Israel sa pagbomba ang Iran, nga nanalipud sa nasud pinaagi sa mga kontra-atake.

Padayon ang pagpakusog sa “komprehensibong estratehikong kooperasyon” sa Russia ug China sa dagway sa gipakusog nga pamatigayon (ilabina sa lana ug enerhiya) ug kooperasyong militar. Padayon nga gipalapad ang alyansang BRICS (Brazil, Russia, India, China ug South Africa) nga karon aduna nay napulo ka myembrong nasud human ang pagpamyembro niining tuiga sa Indonesia (human ang Egypt, Ethiopia, Iran, United Arab Emirates).

Sa duso niini, ug isip balos sa mga taripa ni Trump, padayon ang paningkamot sa daghang nasud nga molayo sa paggamit sa dolyar sa mga transaksyong pangpinansya, bisan og nagpabilin kining dominante. Lakip dinhi ang merkado sa lana sa Saudi Arabia ug uban pang nasud sa Middle East (ilabina sa China), pamatigayong yuan-ruble sa China ug Russia, ug gamit ang lokal nga kwarta sa ASEAN. Gikan sa halos wala ayha ang 2022, mokabat na karon sa 20% sa kinatibuk-ang pamatigayon sa kalibutan ang di gagamit og dolyar, hinungdan sa pag-us-us sa bili niini, ug sa nagkakusog nga baligya sa bulawan. Nagsugod niadtong 2022–2024 ang kapin 1,000 ka toneladang baligya, gikan sa kasagarang tinuig nga baligya nga 450–500 tonelada niadtong 2010–2021.

Ang nagpadayong krisis sa mga kapitalistang nasud nagbunga sa nagkagrabeng panagbangi sa mga hut-ong. Padayon nga nagkagrabe ang mga pakigbisog sa mamumuo sa mga sentrong kapitalista, lakip ang welga sa mga mamumuo sa Amazon sa US ug sa lain-laing nasud. Miulbo usab niining tunga-tunga sa tuig ang malukpanong mga welga sa mga mamumuo sa China alang sa umento sa suhulan, partikular sa kumpanyang BYD (nagahimo og sakyanang elektrik). Miulbo usab ang lapad nga mga welga ug lihok protesta sa mga mamumuo sa mga pantalan sa Japan niadtong Marso hangtud Mayo. Sa Europe, miulbo karong Disyembre ang mga pangkinatibuk-an o dungan-dungan nga welga sa mga mamumuo ug katawhan sa Belgium, The Netherlands, Portugal, Italy ug France, batok sa mga palisiyang austerity o pagdaginot, nga nag-unang moigo sa pensyon, suhulan ug mga katilingbanong serbisyo. Miulbo usab ang mga mayor nga welga sa mga milabayng bulan sa Germany, Spain, United Kingdom ug uban pang nasud.

Tubag sa nagkakusog nga pagsukol sa mga mamumuo ug katawhan ang talamayong dayag nga pasistang mga palisiya sa estado. Sa US, labawng nagkagrabe ang awtoritaryanismo ni Donald Trump sa dayag nga paglapas sa mga balaod ug ligal nga proseso sa ginahimong bangis nga crackdown batok sa mga imigrante sa US, nga naglangkub sa dakung bulto sa hut-ong mamumuo. Sa sulsol sa monopolyong burgesya, nagkakusog ang mga partido ug kalihukang pasista ug konserbatibo, ug adunay mga napili sa gubyerno. Padayon nga nagkagrabe ang mga atake batok sa mga Muslim ug Arabo (pinakagrabe sa US sa milabayng tulo ka dekada, dungan sa pagsumpo sa gubyernong Trump sa mga protestang maka-Palestine), mga Black ug Latino sa US, mga LGBT, ug mga migrante sa Europe. Kabahin sa nagkakusog nga pasistang laraw, ginapatuman ang mga balaod ug palisiya nga malukpanong nagasumpo sa mga katungod sibil, sama sa pagpakusog sa mass surveillance, paggamit og mga drone, AI ug uban pang teknolohiya nga nagalapas sa mga katungod sa pribasiya. Human ang kapin tulo ka tuig, walay puas pa gihapon ang gyerang henosidyo sa Zionistang Israel sa Gaza. Sa duso nag-una sa US, gupahuyang ang United Nations pinaagi sa paghikaw dinhi sa pondo, ilabina sa mga ahensya niini alang sa tawhanong katungod.

Ang nagkakusog nga pasisasyon o pasistang laraw sa mga estado sa US ug uban pang nasud nagtukmod sa mga katawhan nga pakusgon ang mga pakigbisog sa anti-pasista sa lain-laing bahin sa kalibutan. Gilunsad ang mayor nga mga rali ug protestang anti-pasista, lakip ang 7-milyon katawong rali sa kapin 2,700 ka panagtapok sa US batok sa paghari-hari ni Trump. Sa Europe, gilunsad ang dagkung raling anti-pasista sa Netherlands, France, Germany, UK, Norway, ug uban pang mga nasud. Nagpadayon ang malukpanong mga demonstrasyon sa milyun-milyong katawhan sa lain-laing bahin sa kalibutan batok sa nagpadayong henosidyo sa US ug Zionistang estado sa Gaza.

Nagaulbo usab ang mga pakigbisog sa masa sa mga atrasadong nasud, atubangan sa kanunayng pagsaka sa presyo sa mga palaliton, ubos nga suhulan, pagtiurok sa istandard sa kinabuhi, pagpangilog og yuta ug panginabuhian, korapsyon ug haruhay nga kinabuhi sa mga upisyal sa gubyerno, paantus nga mga buhis, pag-usik-usik sa kwarta sa gubyerno sa mga pangtapal nga proyekto, pagkadunot sa mga katilingbanong serbisyo, ug grabeng walay kaangayan; ug mga protesta batok sa korapsyon sa Kenya, Nepal, Indonesia, Morocco, Madagascar, Peru, Pilipinas ug uban pang mga nasud. Daghan dinhi gitawag og mga “protestang Gen-Z” tungod sa lapad nga ispontanyong protesta sa mga kabatan-onang nag-antus taliwala sa lalum nga krisis sosyo-ekonomiko. Adunay pipila kanila nga gigamit sa mga reaksyunaryo o repormistang partido, apan daghan usab ang nakonsolida sa ngadto-ngadto isip mga progresibo ug rebolusyonaryo.

Haum kaayo ang kundisyon sa kalibutan aron magpakusog ang mga proletaryong rebolusyonaryo sa lain-laing bahin sa kalibutan, ug tukuron ang mga partido komunista, aron magsilbing iwag sa masang mamumuo ug uban pang dinaugdaug ug pinahimuslang hut-ong. Sa lain-laing nasud, nagpakusog ang mga proletaryong rebolusyonaryong grupo ug partido sa ideolohiya, sa pagbalik-tuon ug pagpalalum sa pagsabot sa Marxismo-Leninismo-Maoismo, ug pagdapat niini sa giatubang nilang kongkretong kahimtang. Salamin sa maong paningkamot ang nalunsad nga lima na ka teoritikanhong kumperensya sa NDFP gikan lang niadtong Oktubre 2023, nga gisalmutan sa daghang partido komunista ug uban pang organisasyong rebolusyonaryo aron hisgutan ang lain-laing mahinungdanong isyu nga giatubang sa proletaryo sa tibuok kalibutan.

Sa mga nasud diin nakabarog ang mga partido komunista, anaa sa ubod ug unahan ang proletaryo sa lain-laing porma sa mga demokratikong pakigbisog sa masa, pagtukod sa lapad nga nagkahiusang prente alang sa pagpanalipud sa interes ug kaayuhan sa lapad nga masa batok sa mga imperyalistang palisiyang neoliberal, programang paantus, korapsyon ug pasismo sa reaksyunaryong estado. Sa India, Turkey, Peru, Colombia, Pilipinas ug uban pang nasud, padayon nga nanglimbasog ang mga partido komunista sa pagsukol sa teroristang todo-gerang pagpanumpo, ug pagpangulo sa rebolusyonaryong armadong pakigbisog.

Hinog kaayo ang sitwasyon alang sa pagtumaw ug paglambo sa mga partido komunista ug alang sa pagpasubsub sa mga rebolusyonaryong pakigbisog sa tibuok kalibutan. Ang kundisyon sa krisis nga gimugna sa kapitalistang sistema tabunok nga yuta alang sa pagkaylap sa mga rebolusyonaryong ideya ug malukpanong protesta sa masa. Sentral ang papel sa mga partido komunista sa pagpangulo sa hut-ong mamumuo ug uban pang hut-ong dinaugdaug, sa pakigbisog alang sa kagawasan, demokrasya ug sosyalismo.

II. Nagkagrabeng krisis sa ekonomiya ug pulitika ilalum sa rehimeng US-Marcos

Labaw nga nag-ilaid sa krisis ang nagharing sistemang semikolonyal ug semipyudal ilalum sa paghari sa rehimeng US-Marcos. Labaw nga nangalisngaw ang sistemang dunot sa lintunganay, atubangan sa hinakog nga korapsyon ni Marcos ug sa susama niyang burukrata-kapitalistang kawatan, sa paghakop sa daku kaayong bahandi sa pinapaburang mga burgesya-kumprador, sa nagkagrabeng pagkawkaw sa mga langyawng kapitalista sa bahandi sa nasud, sa malukpanong pagpangilog og yuta ug panginabuhian sa masa, ug sa nagkagrabeng pag-antus ug pagpangdaugdaug nga nasinati sa katawhang Pilipino. Hinanaling gipangayo sa sitwasyon ang rebolusyonaryong kausaban aron isalikway ang karaang kundisyon ug dalhon ang nasud sa dalan sa kagawasan, demokrasya ug kalambuan.

Atubangan sa nagpadayong krisis sa kalibutanong sistemang kapitalista, ginabira sa mas lalum nga krisis ang lokal nga ekonomiya sa Pilipinas. Padayon nga ginapugngan sa imperyalismong US ug mga nagharing hut-ong ang paglambo sa mga pwersa sa produksyon, hinungdan nga nagpabilin kining agraryo, atrasado ug dili industriyalisado.

Wala pa gihapoy kapasidad ang lokal nga ekonomiya nga tubagon ang panginahanglan sa katawhan ug palambuon ang nasud. Ang lokal nga produksyon nagsalig sa pag-import sa mga produtong pangkonsumo ug pangproduksyon, ug nakapukos sa pag-eksport sa mga hilaw o semi-prosesong mga materyales, ug mga igbabaligya nga giasembol gikan sa giimport nga mga piyesa. Ang ekonomiya sa nasud padayong nagsalig sa langyawng kapital ug pagpangutang, bisan og ginaduso sa World Bank nga padak-on ang bahin sa lokal nga pagpangutang.

Tungod sa dili patas nga pamatigayon, nagpabiling nakasinati og dakung depisito o pagkalugi sa pamatigayon, nga mikabat sa $54 bilyon niadtong 2024 (gikan $52 bilyon niadtong 2023). Gilaumang magpabilin kini sa ingon usab nga ang-ang sa 2025. Mitiurok sa kapin 83% ang sarplas sa balance of payments o balanse sa langyawng transaksyon (pamatigayon, kita ug remitans gikan sa ubang nasud, langyawng pautang, ayuda o pamuhunan) sa Pilipinas, gikan $3.7 bilyon niadtong 2023 ngadto sa $609 milyon niadtong 2024, taliwala sa pagsulod sa dakung remitans nga $38.34 na bilyon sa mga migranteng mamumuong Pilipino.

Misaka ang pagpangutang sa gubyernong Marcos ngadto sa ₱17.5 trilyon niadtong Oktubre 2025 (lakip ang ₱5.5 trilyon o $93 bilyong langyawng utang), 40% pagdaku sukad nilingkod si Marcos niadtong 2022, aron pondohan ang depisito sa pamatigayon, bayran ang balance of payments, ug pondohan ang daku apan dili produktibong mga proyektong pang-imprastruktura.

Padayon nga mihinay ang lokal nga manupaktura tungod sa paggamay sa order o paghinay sa baligya sa kalibutanong merkado. Lakip dinhi ang halos 5% pagbaba sa eksport sa mga produktong elektroniko sama sa mga semikonduktor sa unang bahin sa tuig, nga naglangkub sa dakung bahin sa langyawng pamuhunan sa Pilipinas ug 55%–60% sa ginaeksport sa nasud.

Nagpabiling ubos ang produksyon sa agrikultura, bisan og adunay gamayng pagbawi karong 2025 kumpara sa 2.2% pagsigpit niadtong milabayng tuig. Nag-unang hinungdan niini ang pagpabiling atrasado sa mga kagamitan, ginagmay nga ang-ang sa produksyon, ug bulnerabilidad sa mga bagyo ug baha. Labaw nga migrabe ang lokal nga produksyon sa agrikultura tungod sa liberalisasyon sa importasyon sa bugas (nga mikabat og 4.8 milyong tonelada niadtong 2024) ug uban pang mga produkto nga nagresulta sa pagkalugi sa mga mag-uuma ug paghinay sa produksyon. Susamang sitwasyon ang nasinati sa sektor sa pangisda, manukan ug babuyan.

Markado ang pagdaku sa ihap sa mga nawad-an og trabaho. Gikan Abril 2024 hangtud Abril 2025, gibanabanang mokabat sa 500,000 ka trabaho sa manupaktura ang nawala, lakip ang 76,000 trabaho sa sektor sa semikonduktor ug elektroniks. Karong tuiga, nahanaw ang kapin 300,000 ka trabaho. Gatusan usab ka libong mga drayber sa dyip, mananadagat, manindahay sa merkado ug uban pang gaymayng nanginabuhi ang giilugan sa panginabuhian ilalum sa mga programang gipahimuslan sa langyaw ug lokal nga mga kapitalistang.

Sa kabanikanhan, milyun-milyon ang nawad-an og trabaho sa milabayng mga tuig tungod sa pagpangilog og yuta, pagpalayas, kumbersyon sa liboan ka ektaryang yuta ngadto sa real estate, mga minahan, plantasyon, mga proyektong “renewable energy” ug uban pa. Napugos silang mahimong mamumuong-panguma, mangita og lain-laing panginabuhian sa agraryo o natural nga ekonomiya, o magtrabaho sa mga sentrong lungsod. Dugang nga paantus sa masang mag-uuma ang mga palisiya sa pasistang pagpamig-ot, ilabina ang pagtakda sa limitadong oras sa pagtrabaho sa umahan nga ginapahamtang sa mga nag-operasyong sundalo sa AFP.

Pugos gitabunan sa gubyernong Marcos ang grabeng problema sa kawalay trabaho. Aron ipagawas nga ubos lang ang tantos sa disempleyo (kapinkun-kulang 95%), wala gilakpip sa “pwersa sa pamuo” ang 10–15 milyong kababayen-ang walay trabaho (nga mayorya anaa sa kabanikanhan) ug nagahimo sa walay bayad nga trabaho sa mga panimalay, gawas pa sa pipila ka milyong gikategoryang “dismayadong mamumuo” nga wala na nangita og trabaho. Sa pikas bahin, apil sa “adunay trabaho” bisann ang mga “self-employed” ug mga “unpaid family workers” (nga kung buut hunahunaon, mga walay makita nga trabaho) nga sa kinatibuk-an naglangkub sa 13–16 milyon o hangtud 34% sa ginaingong adunay trabaho.

Kung ilakip ang minilyong kababayen-ang gitangtang sa “pwersa sa pamuo” nga gikategoryang “asawa sa panimalay” ug tangtangon sa ihap sa “adunay trabaho” nga sa aktwal walay trabaho, ang tinuod nga tantos sa disempleyo sa Pilipinas dili moubos sa 52% o kapin kalahati sa pwersa sa pamuo sa nasud. Dili pa apil dinhi ang dakung ihap sa “kulang ang trabaho” o underemployed, nga sa taas nga panahong wala usay trabaho, partikular sa kabanikanhan.

Atubangan sa grabe kaayong problema sa disempleyo, mikabat sa 2.47 milyong Pilipino ang mi-abroad para magtrabaho niadtong 2024, pinakataas sa milabayng lima ka dekada, ug gilaumang sama ka daku madugang sa mga migranteng mamumuong Pilipino. Kapinkunkulang 10 milyon usab ang mga “gig worker” nga tugbang sa 22% sa kinatibuk-ang adunay trabaho. Lakip dinhi ang halos 200,000 mga “platform worker.” Langkub dinhi ang halos 90,000 mga delivery rider, nga adlaw-adlaw naglumba sa limitadong mga order o pasahero, ug nag-antus sa sobrang trapik, samtang ginakibhangan ang gamay nilang kita sa mga kapitalistang tag-iya sa mga “app.”

Labawng mitiurok ang ang-ang sa kinabuhi sa mayorya sa katawhan, atubangan sa padayon nga pagsaka sa presyo sa mga palaliton, ilabina sa lana ug pagkaon. Nagpabiling taas ang presyo sa bugas nga anaa sa ₱40–₱50 kada kilo. Nagkataas ang gasto sa edukasyon, transportasyon, panglawas, abang sa balay, tubig, kuryente ug uban pang serbisyo, nga dakung bahin negosyo sa dagkung kapitalista.

Gibanabanang anaa na sa ₱1,225 kada adlaw ang suhulan aron mabuhing disente ang lima-katawong pamilya. Kapinkunkulang katunga lamang niini ang minimum nga inadlawang suhulan nga ₱695 (gikan Hulyo) sa National Capital Region, ug labaw nga layo ang mas ubos nga minimum nga suhulan sa lain-laing rehiyon. Naglunang sa kalisud ang masang mamumuo nga minimum lamang nga suhulan ang kita. Nag-antus sila sa piot nga barungbarong sa mga syudad, ug nag-atubang sa hulga nga mapalayas sa ilang mga puluy-anan. Minilyonng walay trabaho ang nagalinya ug andam nga modawat og mumho sa mga trabahong kontraktwal o sesonal.

Anaa sa kabanikanhan ang masang mag-uuma. Sila ang naglangkub sa mayorya sa mga produktibong hut-ong sa nasud, apan ang ilang gidaghanon gitago sa mga upisyal nga estadistika sa reaksyunaryong gubyerno. Aron hatagag rason ang pagpasagad sa kabanikanhan ug ipagawas nga dili na agraryo ang ekonomiya, wala ginalakip sa upisyal nga estadistika sa reaksyunaryong estado ang dakung bahin sa produktibong populasyon sa kabanikanhan lakip ang mga mag-uumang babaye ug mga bata nga apil sa produksyon.

Mayorya kanila walay kaugalingong yuta o adunay gamay lamang nga parselang ginaugmad, o nakig-uma lang isip kasamá o tenante, o nagatrabaho isip mga mamumuong-panguma. Nakasinati sila sa nagkagrabeng mga porma sa pyudal ug semipyudal nga pagpahimulos ug pagpangdaugdaug, partikular na sa porma sa taas nga abang sa yuta ug ubos kaayong suhulan. Gabreng hago nila sa pagtrabaho ug ginapas-an ang mahal nga gasto sa produksyon, taas nga interes ug pagkalubong sa utang, ubos nga pagpalit sa ilang mga produkto, ug taas nga presyo sa palaliton. Labaw nga migrabe ang ilang kahimtang tungod sa liberalisasyon sa pag-import nga nagresulta sa pagbaha sa imported nga bugas, sibuyas, ahos ug uban pang mga produktong agrikultural, ug pagbaha sa ilang mga umahan tungod sa pag-upaw sa mga kabukiran.

Gatusan ka libo ang ginapalayas sa kaugalingong yuta tungod sa malukpanong pagpangilog og yuta sa mga agalong yutaan, burgesyang kumprador ug mga burukratang kapitalista, gamit ang mga korte ug lain-laing ahensya sa reaksyunaryong gubyerno ug ang pwersa sa militar ug pulis, aron hatagag-dalan ang pagpalapad sa mga plantasyon, minahan, mga proyektong ekoturismo, real estate, “renewable energy” (sama sa lapad nga solar farms) o proyekto nga alang kuno sa “climate change mitigation” (sama sa mga plantasyon sa kawayan).

Ginailugan usab og panginabuhian ang gaymayng mananagat sa pagsulod sa dagkung komersyal nga trawler o barko sa 15-kilometrong municipal waters, sukwahi sa gitakda sa reaksyunaryong balaod nga eksklusibong gamit sa gaymayng mangingisda. Gihikawan usab sila og panginabuhian sa ginahimong reklamasyon sa yuta, ug kung nagalunsad ang US ug AFP sa ilang inadlaw o sinemanang ehersisyong militar sa mga baybay. Nag-atubang usab sila sa hulga sa pagtukod og mga “coastal wind energy projects.” Gipas-an usab nila ang dautang epekto sa liberalisasyon sa importasyon sa isda, taas nga gasto sa pagpangisda ug interes sa utang.

Nasinati sa tibuok nasud ang grabeng epekto sa pag-usab sa klima. Tungod kini sa pagkaguba sa bukid ug sapa nga pipila ka dekada nang gikawkaw sa mga hakog nga langyawng kapitalista ug kakunsabang lokal nga nagharing hut-ong. Dili masukod ang pag-antus sa masang anakpawis pareho sa kasyudaran ug kabanikanhan atubangan sa grabeng pagbaha ug pagdahili sa yuta, nga nagresulta sa pagkaguba sa mga tanum ug tinubdan sa panginabuhian, pagkasira sa mga balay ug dinaghang pagkamatay.

Aron masustini ang ilang relatibong alibyong kinabuhi, taas nga oras usab nga nagatrabaho ang mga magtutudlo, mga ordinaryong empleyado, gaymayng propesyunal, mga tag-iya sa sakyanang pangpasada, gamay nga tindahan o pwesto sa merkado, mga freelancer o gig worker, mga call-center agent, ug uban pang sektor nga naglangkub sa hut-ong petiburges. Taliwala sa grabeng krisis sa katilingban, ang mayorya kanila walay ikatigum aron makaangkon og kaugalingong balay o makapalambo sa kapital, ug daghan paspas nga mitiurok ang istatus ngadto sa kinabuhi sa masang anakpawis. Milyun-milyong mga kabatan-onan ang wala na makahuman sa kolehiyo tungod sa taas sa singil ug mga galastuhon.

Langit ug yuta ang gintang sa kinabuhi sa masa sa katawhang Pilipino ug sa pipila ka nagharing hut-ong. Samtang mius-us o mitiurok ang kinabuhi sa masang Pilipino, nagkadaku usab ang ginakawkaw nga bahandi sa dagkung burgesyang kumprador, agalong yutaan ug burukratang kapitalista. Sukad nga makalingkod si Marcos, ang giusang bahandi sa tulo ka labing adunahan sa Pilipinas—silang Enrique Razon, Manuel Villar ug Ramong Ang—midaku og 56% gikan ₱485.6 bilyon ngadto sa ₱1.3 trilyon, samtang ang sa 50 pinakadatu midaku og 25% gikan ₱979 bilyon ngadto sa ₱4.9 trilyon, layo sa gihatag nga 7.5% pagsaka sa suhulan sa mga mamumuo sa National Capital Region karong tuiga.

Samtang naglunang sa kalisud ang masang anakpawis, nabuhi nga haruhay ug luho ang mga nagharing hut-ong. Giwaldas nila ang bahandi ngadto sa ilang mga mansyon, mahalong sakyananan, pribadong resort ug mga yate, bulawang mga relo ug alahas, pagkasino ug paglulinghayaw sa ubang nasud sakay sa ilang kaugalingong mga eroplano.

Nagakawkaw sila og daku kaayong bahandi sa pakigkunsabo sa mga langyawng dagkung kapitalista ug bangko, isip mga ahente sa pag-eksport sa mga hilaw nga materyales (mga mineral, prutas, kopra, bahandi sa dagat, goma), pag-import og mga human-daang produkto ug kagamitan, ug isip mga manedyer sa mga langyawng namuhunan sa mga kumpanyang nagpahimulos sa baratong kusog-pamuo alang sa asembliya para sa pag-eksport. Sila ang nagpaluyo sa pagpangilog og yuta ug pagpribado ug pagnegosyo sa mga serbisyong publiko sama sa kuryente, tubig, telekomunikasyon ug transportasyon. Gunit nila ang pinakadagkung bangko, mga kumpanya ug konglomereyt lakip ang International Container Terminal Services (ICTS), SM Investments, BDO, SM Prime, Meralco, BPI, San Miguel Corporation, Ayala Land, PLDT, China Bank ug uban pang dagkung korporasyon. Sila ang nagpondo ug nagasuporta sa pinakadakung partidong pangpulitika, ug nakapahimulos sa pabor sa gubyerno sa mga kontrata, balaod, proyektong pang-imprastruktura ug mga desisyon sa korte.

Kaabag ang nagharing hut-ong sa imperyalismong US sa pagpabiling atrasado sa nasud. Wala silay interes nga ipundar ang batakang mga industriya ug palambuon ang agrikultura, o ipromotar ang ekonomiyang independyente. Naghakop sila og bahandi gikan sa pagkaatrasado sa nasud.

Ang nagharing hut-ong ang nag-unang girepresentahan karon sa pasista ug papet nga rehimeng Marcos. Gipadumalahan niya ang estadong neokolonyal, nga ang nag-unang haligi mao ang Armed Forces of the Philippines (AFP) nga ginakontrol sa imperyalismong US. Atubangan sa nagkagrabeng panagbangi sa China sa milabayng dekada, labawng gipahugot sa imperyalismong US ang kontrol sa Pilipinas. Migrabe ang interbensyong militar sa US pinaagi sa nagkadakung Balikatan exercises, nga ginahimo ilalum sa Mutual Defense Treaty, Visiting Forces Agreement, Enhanced Defense Cooperation Agreement (EDCA) ug uban pang dili patas nga kasabutang militar sa US ug Pilipinas.

Ilalum ni Marcos, nagkadaku ang presensya sa mga tropa, mga sakyanan ug himang iggugubat sa US sa Pilipinas. Giablihan sa US ang dugang nga sikretong mga EDCA site aron magsilbing himpilan sa mga tropa ug tigtambag militar sa US, ug butngan og mga misayl ug uban pang armas sa US. Kasumpay kini sa nagkadakung presensyang militar sa US sa rehiyong Asia kakunsaba ang mga papet nga gubyerno sa Japan ug South Korea. Sagunson ang mga ehersisyong panggubat ug pagmaniobra sa mga pwersang militar sa US. Ginapahimuslan sa imperyalismong US ang bangi sa Pilipinas ug China sa South China Sea aron manghulhog og armadong panagbangi. Ginagamit niini ang maka-US nga grupong Akbayan isip sibilyang tigsulsol og gyera, ug tigpaypay sa Sinophobia o sentimyentong anti-China aron ihulagway ang US nga “alyado” o “tigpanalipud” sa soberanya sa Pilipinas.

Ginahulagway sa mga upisyal sa gubyernong US nga anaa sa “hyperdrive” o taas kaayong ang-ang sa “kooperasyon” sa US ug Pilipinas, atubangan sa walay kaparehong interbensyong militar niini sa nasud. Gitukod ning bag-o sa US ang Task Force Philippines aron labawng pahugton ang kontrol sa AFP, ug mas epektibong gamiton kini sa mga operasyong militar sa US sa Pilipinas. Human niini, giaprubahan sa Kongreso sa US ang Philippine Enhanced Resilience Act o PERA nga maggahin sa Pilipinas sa mokabat $500 milyong tinuig nga Foreign Military Financing o kinatibuk-ang $2.5 bilyon sa 2026–2030, kapin napulo ka pilo sa kasagarang ginagahin sa ayudang militar sa nasud.

Naglunang sa krisis sa pulitika ang neokolonyal nga estado atubangan sa grabeng panagbangi sa magkaribal nga paksyon sa nagharing hut-ong, ug paghimulag sa katawhan sa pasista ug notoryus sa korapsyon nga rehimeng Marcos. Nahimong tataw sa milabayng tuig ang pag-uyon ni Marcos sa pagdakop ug pagpriso sa kanhing tiranikong presidente nga si Rodrigo Duterte sa mga pasilidad sa International Criminal Court sa The Netherlands tungod sa mga kaso sa krimen batok sa katawhan kalabot sa dinaghang mga pagpatay sa mini nga “war on drugs.” Mikusog usab ang bangi sa naunsyaming impeachment ni Sara Duterte nga giduso sa lapad nga han-ay sa mga pwersang progresibo, kaabag ang mga karibal sa mga Duterte sa kongreso. Apan sa kahadlok nga siya ang isunod, giundang mismo ni Marcos ang pagtaral sa Senado, kakunsaba ang mga kaalyado ni Duterte.

Nahitabo ang usa sa pinakadunot nga reaksyunaryong eleksyon niadtong Mayo, diini nahimong dayag ang pagpanglimbong, pagbaha sa gikurakot nga kwarta aron ipalit og boto, kabangis, ug pulitikanhong akomodasyon nga giareglo sa mga opereytor sa US. Salamin kini sa dunot nga nagharing sistema sa pulitika. Sa pikas bahin, nahimong mabuluhanon ang pagsalmot sa mga progresibo ug patriyotikong partido sa eleksyon, bisan og gitarget sila sa pagpamig-ot sa mga armadong pwersa sa estado. Talagsaon ang ilang mga kandidato sa hugot nga pagdala sa mga reklamo sa masa, pagbutyag sa dunot nga eleksyon ug pagpanalipud sa nasudnon ug demokratikong tinguha sa katawhan.

Taliwala sa grabeng krisis sa ekonomiya ug pagtiurok sa panginabuhian sa lapad nga masa sa katawhan, miulbo ang lapad nga kasuko sa korapsyon ug pagkawkaw sa pondo sa katawhan. Nabutyag sa mga publikong imbestigasyon ang daku kaayong pondo sa katawhan nga gibulsa sa mga burukratang kapitalista sa maanomalya ug palpak sa proyektong flood-control, ug pagbulsa sa gatusan ka bilyong pisong kikbak sa mga upisyal sa Department of Public Works and Highways (DPWH), mga kongresman, senador, ug taas nga upisyal sa Malacañang.

Sukad Setyembre, pipila ka bulan nga misulbong ang kalihukang protestang anti-korapsyon, sa pagpanguna sa mga kabatan-onang estudyante, ang kasagarang gitawag og Generation Z o Gen-Z, sama sa mga protesta sa ubang nasud. Apan dili susama sa dalikyat ra nga pagsilaab sa protesta sa ubang nasud, nagpadayon ang protesta sa mga kabatan-onang estudyante sa Pilipinas, sa payong sa nasudnon-demokratikong mga pwersa. Miduyog kini ug mikuha og kusog sa protesta sa lain-laing demokratikong sektor.

Atubangan sa mga protesta, gibutyag sa kanhi kakunsabang kongresman ni Marcos nga mismong siya nagdawat sa ₱25 bilyong “SOP,” ug nga siya mismo ang utok sa pagsal-ot sa maanomalyang proyekto sa badyet sa iyang gubyerno. Aron luwason ang iyang kaugalingon, napwersa si Marcos nga isakripisyo ang suud niyang upisyal nga ginganlang lambigit sa pagpangawat, butang na nagmugna og mga siak ug nagpagrabe sa bangi tali sa magkaribal nga pundok sulod mismo sa Malacañang. Pinaagi sa kunuhay imbestigasyong gimando ni Marcos, pugos nga gitabunan ang iyang direktang tulubagon sa korapsyong sa mga proyektong flood-control nga iyang direktang gipondohan pinaagi sa “unprogrammed appropriations.”

Sa pagsulbong sa kalihukang protesta natukod ang lapad nga mga alyansang anti-korapsyon sa tibuok nasud. Mikusog ang singgit sa mga progresibo ug demokratikong grupo, ilabina sa mga kabatan-onan, alang sa pagpaluwat o pagpalagpot kang Marcos ug Duterte, bisan og gisulayan sa pseudo-progresibong grupong Akbayan nga ilihis ang kasuko sa katawhan kang Marcos. Ginaduso ang sugyot aron tukuron ang usa ka “national transition council” nga mopuli sa gubyernong Marcos-Duterte, iduso ang pagsiguro sa mga lakang aron panubagon ang mga nalambigit sa korapsyon, ug ipatuman ang mga kausaban sa sistema sa eleksyon ug panggamhanan. Bisan og anaa pa kini sa gambalay sa kasamtangang sistema, ug dili magresulta og pundamental nga kausaban sa sistema, ang ingon niining panawagan salamin sa lalum nga pagkadismaya ug kawalay pagsalig sa katawhan sa reaksyunaryong sistema ug sa mga nagharing hut-ong, atubangan sa balik-balik nga kaso sa korapsyon sa milabayng mga dekada.

Aron pugngan ang pagdaku sa mga lihok protesta sa kalsada, gigamit ni Marcos ang mga pwersa sa pulis ug militar sa pagsumpo sa mga demokratikong katungod. Niadtong Setyembre 21, sa ika-53 anibersaryo sa balaod militar, kapin 270 ang giaresto sa Mendiola dihang miulbo ang kumprontasyon tali sa mga pulis ug sa mga kabatan-onang maisugong misukol. Sa rali niadtong Nobyembre 30, gihimong daw garison ang Malacañang nga giliyukan sa liboan ka mga pulis para dili makaduul ug madungog ni Marcos ang mga singgit sa katawhan.

Ang nahimong pagsumpo sa mga rali usa ka bahin lamang sa nagkagrabeng pasistang pagpanumpo sa rehimeng Marcos. Gipagula ni Marcos karong tuiga ang National Action Plan for Unity, Peace and Development (NAP-UPD) nga karon nagsilbing plano sa malukpanong pagsumpo sa mga demokratikong katungod sa gambalay sa counter-insurgency. Ginagamit niini ang Anti-Terror Law ug Anti-Financing Terrorism Law aron pig-oton ang mga kahugpungang masa ug mga organisasyong civil society, isumpay kini sa rebolusyonaryong kalihukan, ug sumpuon ang ilang mga aktibidad.

Sa kasyudaran, ginahimo sa mga ahente sa estado ang sarbeylans, pagpamig-ot ug pagpanghadlok aron pugngan ang pag-unyon sa mga mamumuo ug pag-organisa sa mga kabatan-onan ug uban pang sektor. Ang mga iladong lider o tumatambong sa mga lihok protesta gitarget sa “pagbisita sa balay” sa mga pulis aron “kumbinsehon” sila nga motiwalag sa ilang mga organisasyon ug dili mosalmot sa mga protesta. Walag too ang pagpasaka og gama-gamang kaso, lakip ang hulgang pagkaso sa pulis sa kapin 90 ka lider-kabatan-onan ug mga tumatambong sa rali niadtong Setyembre 21 sa Mendiola.

Sa gambalay usab sa NAP-UPD, padayon nga ginapahamtang sa AFP, kakunsaba ang NTF-Elcac, ang de facto nga balaod militar sa gatusan ka barangay sa tibuok nasud. Ginapatuman ang mga lakang nga mapanumpuon ug madaugdaugon sa masang mag-uuma, lakip ang pagtakda og limitadong oras sa pagtrabaho sa mga mag-uuma sa iyang umahan, pagpa-logbook sa paggawas o pagsulod sa baryo, pagtakda sa limitadong gidaghanon sa bugas nga pwedeng paliton, pagpahamtang og karpyu, ug uban pang palisiya sa pagkontrol sa lihok sa mga tagabaryo. Ginadeploy ang mga grupo sa mga sundalo sa mga barangay o klaster sa mga baryo sa mga mag-uuma, ilabina ang mga gidudahan sa AFP nga tigsuporta sa rebolusyonaryong kalihukan, sa ngalan sa pagpugong sa pagsuporta sa Bagong Hukbong Bayan (BHB).

Ang imperyalismong US ang nag-unang tigtambag ug tighatag sa suportang pinansya ug materyal sa operasyong kontra-insurhensiya ni Marcos ug sa AFP. Walay hunong ang pagpangutingkay sa AFP sa mga baryo ug mga operasyon batok sa BHB. Padayon ang mga triad o tinagtulo nga operasyong saywar, intelidyens ug kombat, sa desperadong pagsulay nga pukanon ang hukbong bayan o pugngan ang mga pwersang gerilya nga maggimbuhatong masa sa mga baryo. Sa mga lugar nga gipailalum sa focused military operation sa mga dibisyon ug area command sa AFP, ginahimo ang lapad nga mga operasyon sa magkasikbit nga gidudahan niining mga sonang gerilya sa BHB. Binatalyon ang gigamit sa AFP aron gukdon ang mga gerilyang platun o iskwad sa hukbong bayan. Dungan niining gigamit ang pakanang amnestiya pangsaywar. Gikan 2023, gigamit ni Marcos ug sa iyang mga sugo ang sikretong pakighinabi sa NDFP sa pagsulay nga danihon kini sa pagsurender sa rebolusyonaryong kalihukan.

Nagdeploy usab kini og mga iskwad o grupo sa mga pasistang sundalo, usahay nagpakaaron-ingnong mga pwersang gerilya sa pagsulay nga linglahon ang masa. Nagagamit usab ang AFP og dautang elemento sa baryo aron isulod ang mga himang elektroniko (GPS tracker) sa pwesto sa mga yunit gerilya, aron targeton ang mga Pulang manggugubat sa pagpanganyon, istraping ug pagpamomba gikan sa ere gamit ang mga FA-50 jet fighter o Super Tucano.

Asaman ug kanus-aman ginahimo sa AFP ang mga operasyong kontra-gerilya, lakip sa target niini ang masang mag-uuma sa baryo. Sa panahong adunay armadong engkwentro, pugos nga gipabakwit ang masa sa ilang mga baryo isip pagsilot sa tagabaryo nga gituuhan sa mga pasistang upisyal sa AFP nga nagasuporta sa BHB. Sa milabayng tuig, kapin 7,600 mga mag-uuma ang biktima sa pugos nga pagbakwit.

Kabahin sila sa halos 240,000 nahimong biktima sa pasistang pagpanumpo ug pagpanghasi sa rehimeng US-Marcos gikan Disyembre 2024. Lakip dinhi ang 40 ka biktima sa pagpatay, 34 sa iligal nga pagdagit, ug kapin 300 sa pagtortyur. Nag-unang target sa pasistang rehimeng US-Marcos ang mga grupo o pwersang aktibo sa pagpanalipud sa katungod sa masang mag-uuma ug mamumuo, ug nagapromotar sa nasudnon ug demokratikong tinguha sa katawhan.

Sukwahi sa kasabutan sa reaksyunaryong gubyerno sa mga pwersang Moro nga nagaila sa nagkinaugalingong gubyerno sa Bangsamoro Autonomous Region of Muslim Mindanao, padayon ang interbensyon ni Marcos ug ginapahamtang ang iyang gahum sa mga internal nga isyu sa Bangsamoro Transition Authority, diin pipila ka beses nang natanggong ang pagpahigayon og eleksyon. Anaa karon sa risgo ang kasabutang pangkalinaw atubangan sa kapakyas ni Marcos nga tumanon ang mga obligasyon sa gubyernong Maynila taliwala sa pagsurender og armas sa liboan ka pwersa sa Bangsamoro Islamic Freedom Fighter sa Moro Islamic Liberation Front. Padayon ang reklamo sa masang Moro sa pagpangabuso sa mga pasistang pwersa sa AFP batok sa ilang mga katungod.

Sama sa subli-subling gipakita sa kasaysayan, wala unsamang pasistang pagpanumpo ang makapugong sa pagsukol sa katawhan. Gani, samatang nagkagrabe ug nagalapad ang pagpanumpo, labaw nga nagkagrabe ang pagtinguha sa katawhan nga manilipud ug mosukol.

Atubangan sa nagkalalum nga krisis sa semikolonyal ug semipyudal nga sistema sa Pilipinas, ug dungan niining paggrabe sa pag-antus ug kalisud sa katawhan, nagamugna sa labing haum nga kahimtang alang sa pag-abante sa demokratikong rebolusyon sa katawhan. Kinahanglang sakmiton sa Partido ang higayon aron dugang nga magpalapad ug magpalig-on sa gambalay sa pagpasubsub ug pagpalalum sa kalihukang pagtul-id. Kaabag sa tanang rebolusyonaryong pwersa, kinahanglang dugang magpakahanas sa gimbuhatong masa aron pukawon, organisahon ug palihukon ang milyun-milyong katawhan sa dalan sa rebolusyonaryong pakigbisog.

III. Kahimtang ug mga tahas aron dugang pakusgon ang Partido ug rebolusyonaryong kalihukan

Sa awhag ug giya sa kalihukang pagtul-id sa milabayng duha ka tuig, padayon nga kumprehensibong nagpakusog ang Partido sa ideolohiya, pulitika ug organisasyon. Determinado ang mga kadre sa tanang ang-ang sa Partido nga ilhon, sawayon ug patigbabawan ang mga nahimong kahuyangan ug kasaypanan sa miagi ug dalhon sa bag-ong ang-ang ang atong rebolusyonaryong praktika.

Tin-aw kaayon nga gipakita sa grabeng krisis sa semikolonyal ug semipyudal nga sistema sa nasud ug sa kalibutanong sistemang kapitalista nga nagpabiling husto, makatarunganon ug hinanali ang panginahanglang iasdang ang demokratikong rebolusyon sa katawhan sa Pilipinas. Kini lamang ang pamaagi aron hingpit nga malingkawas ang katawhang Pilipino sa pagpangdaugdaug sa imperyalismo, pyudalismo ug burukrata-kapitalismo, ug ipundar ang mahayag nga sosyalistang hinaharap.

Gikan sa nasinati nga mga pag-atras ug kadaut sa Partido ug rebolusyonaryong kalihukan, nakab-ot nato sa milabayng tuig ang gagmayng mga pag-abante sa lain-laing natad sa rebolusyonaryong gimbuhaton, bisan og adunay pipila ka bahin nga naulahi, ug may pipila nga nakahiagum og kadaut tungod sa wala pa hingpit nga natul-id ang mga kahuyangan ug atubangan sa walay puas nga pag-atake sa kaaway.

Kaabag ang tanang rebolusyonaryong pwersa, dugang nga nagpakusog ang Partido aron mangulo sa pagpaasdang sa demokratikong rebolusyon sa katawhan pinaagi sa malungtarong gubat sa katawhan. Anaa sa maayong pwesto ang Partido para pangulohan ang lapad nga masa sa katawhan sa tanang natad sa pakigbisog, nag-una sa natad sa armadong pakigbisog.

Labaw natong gipalig-on ang pundasyong sa ideolohiya sa Partido sukad nga gisugdan nato niadtong 2023 ang kalihukang pagtuon sa Marxismo-Leninismo-Maoismo ug sa mga batakang prinsipyo sa Partido. Tumong sa kalihukang pagtuon nga tul-iron, nag-una ang empirisismo, sekundaryo ang dogmatismo sa ideolohiya; tul-iron ang konserbatismo, liberalismo, buntotismo ug sektoralismo, sa pulitika; ug ang burukratismo ug ultra-demokrasya sa organisasyon. Pinaagi sa pagsaway ug pagsaway-sa-kaugalingon, dungan ang pagtul-id, dugang nga gipakusog ang panaghiusa sa mga kadre ug komite sa Partido.

Sa pagpanguna sa Komite Sentral, labaw nga ginapalalum ang kalihukang pagtul-id pinaagi sa pagsumada sa atong mga kasinatian. Nagakutlo kita og mga pagtulun-an sa una ug ikaduhang bantugang kalihukang pagtul-id, dungan sa atong pagbalik-lantaw sa kasaysayan sa pagtukod ug paglapad Partido sukad nga gitukod kini 57 ka tuig na ang milabay.

Padayon nga gipakusog ug gipalambo sa mga kadre ug komite sa Partido ang katilingbanong pagtuki ug pagsusi sa hut-ong (SICA o social investigation and class analysis) sa langkub sa ilang liderato. Tumong sa pagtibuok ug pagpalalum sa mga SICA mao ang ilhon ang mga nag-unang problema ug mga isyu nga giatubang sa lapad nga masa, ilabina ang mga porma sa pagpangdaugdaug ug pagpahimulos sa mga batakang hut-ong ug sektor, ug ang haum nga mga pamaagi o taktika aron himuon ang malukpanong pagpukaw, pag-organisa ug pagpalihok kanila. Sa basihan lamang sa paghimo og SICA matibuok ang hustong plano ug panawagan nga siguradong gakson sa masa ug magpalagsik sa ilang mga pakigbisog.

Isip tubag sa panawagan sa Partido, padayon nga ginapalapad ug ginapalagsik ang mga rebolusyonaryong organisasyong masa sa mga mamumuo, mag-uuma, kabatan-onan, kababayen-an, magtutudlo, mga artista, mamumuo sa panglawas, tawong-simbahan, syentista, abugado, katawhang minorya, migrante sa gawas sa nasud ug uban pa. Pinaagi sa mga rali ug lain-laing porma sa pagpropaganda, gipakusog nila ang panawagang iasdang ug mosalmot sa gubat sa katawhan.

Gitapok ug gikonsolida nila ang abanteng bahin sa masang misalmot sa mga pakigbisog sa masa. Nagsilbi silang tago nga dugukan sa lapad nga dayag nga kalihukang masa nga nagagiya aron dili malihis sa repormismo ang masa sa ilang mga pakigbisog. Sa kasyudaran, nagkakusog ang panawagan alang sa pagpalista, ilabina gikan sa han-ay sa mga petiburges nga intelektwal, aron moadto sa kabanikanhan alang sa temporaryo o dinugay nga deployment. Bililhon ang ilang nahimong tampo sa pagpalagsik sa gimbuhaton sa edukasyon, kultura ug uban pang aspeto sa gimbuhaton sa hukbong bayan.

Subay sa palisiya sa mapangahas nga pagpalapad nga walay ginapasulod ni usa ka dautang elemento, lig-on natong ginapalapad ang han-ay sa Partido pinaagi sa pagrekrut gikan sa bag-ong tumaw nga mga rebolusyonaryong sa kalihukang masa, pareho sa kasyudaran ug kabanikanhan. Nahimo kini tungod kay ang mga kadre ug myembro sa Partido anaa sa ubod sa mga pakigbisog sa masa ug kauban sa masa sa ilang mga paglihok. Nakasabwag sila sa tibuok nasud.

Diin adunay dili moubos sa tulo ka myembro, atong ginatukod ang sanga sa Partido isip batakan niining organisasyon. Ang pagpadaghan ug pagpakusog sa mga sanga ang sumbanan sa lapad ug lalum nga paggamot sa Partido sa masa, ug sa kapasidad niining pangulohan ang masa sa rebolusyonaryong dalan. Ang mga sanga sa Partido ang anaa sa ubod ug atubangan sa mga rebolusyonaryong organisasyong masa ug sa ilang mga nasudnon ug demokratikong mga pakigbisog.

Sa kasyudaran, ginatukod nato ang mga sanga sa mga pabrika ug lugar trabahoanan, sa mga kabus nga komunidad, sa mga eskwelahan, upisina, ug uban pang lugar. Sa kabanikanhan, ginatukod nato ang mga sanga sa Partido sa mga baryo o klaster sa mga baryo. Sa mga lugar nga nabungkag atubangan sa pagpanumpo sa kaaway o uba pang hinungdan, gipaningkamutan karon nga subli kining tukuron.

Partikular sa kabanikanhan, ang pagtukod og mga sanga ug komite sa Partido ang yawe aron pangulohan ang lapad nga masa sa ilang mga pakigbisog alang sa reporma sa yuta, ug sa armadong pakigbisog. Sa pagpangulo sa Partido, ginatukod ang mga Komiteng Rebolusyonaryo sa Baryo, o organo sa pulitikanhong gahum nga maoy nagkahiusang prente sa baryo, sa pundasyon sa mga batakang organisasyong masa sa mga mag-uuma, kabatan-onan, kababayen-an ug mga bata, ug mga mamumuong pangkultura, lakip ang rebolusyonaryong kahugpungan o alyansa sa mga hatungang pwersa sa baryo. Dugang dinhi, ginatukod sa Partido ang alyansa sa taumbaryo, sa masa ug hatungang pwersa sa mga syudad.

Ginaarmasan sa Partido ang masa. Atong ginatukod ug ginapalihok ang mga yunit sa milisyang bayan isip pormasyon sa Bagong Hukbong Bayan, kaabag ang mga kwerpong depensa-sa-kaugalingon sa mga organisasyong masa, aron iasdang ang lapad nga gerilyang pakiggubat. Asaman natukod, ang mga yunit sa milisyang bayan nagatabang sa pagpakusog sa mga pultaym nga yunit sa hukbong bayan kung asa adunay nakabarog, ug kung asa wala, boluntaryo ang mga bag-ong mga yunit gerilya sa hukbong bayan. Kung asa pwedeng tukuron, palapdon ug pakusgon ang mga pwersang gerilya sa BHB, ginatukod sa Partido ang mga sona ug larangang gerilya isip teatro sa armadong pakigbisog aron bahin-bahin nga pukanon ang kaaway.

Sa giya ug inspirasyon sa kalihukang pagtul-id, padayon nga ginapakyas sa Partido ang walay puas nga teroristang gyera ug saywar sa imperyalismong US ug pasistang rehimeng Marcos, sa deklaradong laraw niining puuhon ang Partido, ang Bagong Hukbong Bayan ug tibuok rebolusyonaryong kalihukan. Dili mabuntog ang Partido tungod kay naangkon niini ang tim-os nga kamatinud-anon sa proletaryong ideolohiya, prinsipyo ug kawsa, ug ang lig-ong determinasyon nga alagaran ang katawhan.

Padayon nga ginapakyas sa BHB ang mga “nakapokus nga operasyong militar” sa AFP pinaagi sa paghikaw dinhi og pokus o target. Adunay pipila nga naigo, nga sagad tungod sa internal nga mga kahuyangan. Ang padayon nga paningkamot sa BHB sa lain-laing rehiyon usa ka dakung tamparus sa pasistang si Marcos nga hambog kaayong nagdeklara niadtong Hulyo nga “wala nay grupong gerilya” sa nasud.

Gunit ang mga pagtulun-an sa kalihukang pagtul-id, gihimo ang pagpahapsay sa organisasyon ug kumand sa hukbong bayan aron malangkubon ug makalihok sa mas lapad nga erya, ug mas paspas ug mas tago nga makabalhin-balhin. Sa halos tanang bahin, atong napabiling bungol ug buta ang kaaway, mas nalikayan ang mga depensibong panagsangka, napreserba ang kusog ug hinay-hinay nga subling nakapalapad ang BHB. Nabawi o nabalikan niini ang kanhi niining mga base, samtang nakapalapad sa mga bag-ong erya. Sa determinasyong mosukol ug aktibong pagdepensa, nasagang ug napakgang sa BHB ang mga atake sa kaaway. Timaan sa rekoberi, adunay pipila ka mga yunit nga nakalunsad og ginagmayng taktikal nga opensiba. Adunay mga yunit nga mas abante ang kasinatian sa pagtul-id ug subling pagpakusog, samtang mas daghan pa ang nag-apas, ug aduna pay pipila nga naulahi.

Yawe niining tanan ang suud nga relasyon ug lalum nga pag-ugat sa BHB sa masa, ug ang paghaum sa organisasyon ug mga gerilyang taktika sa hukbo. Aron matuman kini, ginapalagsik sa mga Pulang manggugubat ang pagtabang sa masa sa produksyon, paghatag og serbisyong panglawas ug edukasyon, ug pagpakusog sa gimbuhaton sa kultura. Nagatabang ang BHB sa pagtukod ug pagpalalum sa mga SICA, paghugpong sa masa ug pagpataas sa ilang determinasyon nga panalipdan ug ipakigbisog ang ilang kaayuhan.

Padayon usab nga ginabatukan sa BHB ug mga rebolusyonaryong pwersa ang makanunayong mga operasyong intelidyens, saywar ug pagpasurender sa kaaway sa takuban sa “lokalisadong panaghisgot kalinaw.” Atong hingpit nga gibutyag nga bakak ang ipinangako sa AFP ug NTF-Elcac nga “maayong kinabuhi” nag-una na tungod sa wala niini ginasulbad ang batakang problema sa kawad-on sa yuta, ug ilabina tungod pulos pagpanglingla ang gipanghinambog nga mga programa sa “reintegrasyon.” Ginabutyag usab ang puno sa korapsyong mga mini na “proyekto alang sa kalambuan” nga gibubuan og binilyong piso, nga ginabulsa sa mga upisyal militar ug kakunsaba nga kontraktor. Labing mahinungdanon, ginabutyag niini nga ang tinuod nga laraw sa gisaad nga “kalinaw” mao ang pagsumpo sa masa aron gawasnong makasulod ang mga langyawng kapitalista ug kakunsabang mangingilog og yuta ug natural nga bahandi.

Sa milabayng mga tuig, adunay pipila ka elementong mitraydor sa Partido ug miluib sa masa. Labaw sila karong nahimulag sa masa ug hingpit nga gikasilagan. Daghan kanila ang gibasura ug gipasagdan na sa kaaway human mawad-ag bili sa saywar. Ang mga pinakalunod-patay nga nahimong kriminal nga aset sa kaaway gikasuhan sa hukumang bayan ug gipahamtangan og haum nga silot nga gipangayo sa masa, tugbang sa sala nga ilang nahimo.

Ang dakung mayorya, ang 99%, sa mga myembro sa Partido ug mga rebolusyonaryong organisasyong masa, nagpabiling matinud-anon sa mga prinsipyo ug kawsa sa Partido. Adunay mga napasibo tungod sa grabeng pasistang pagpanumpo. Apan paspas silang naawhag sila balik human matin-awan sa mga tahas nga angayang tumanon.

Pinaagi sa baruganan alang sa makatarunganon ug malahutayong kalinaw, padayon usab nga ginapakyas ang mga pagsulay sa rehimeng US-Marcos nga pugson ang National Democratic Front nga danihon sa pagsurender sa armadong rebolusyon. Sa milabayng duha ka tuig, walay nahimong mahinungdanong pag-uswag sa mga panaghisgot sa mga representante sa NDF ug sa Gubyerno sa Republika sa Pilipinas (GRP) aron subling buhion ang pormal nga panaghisgot kalinaw.

Nag-unang hinungdan sa pagtingga sa panaghisgot kalinaw mao ang pagpamugos ni Marcos nga ibasura ang tanang natibuok nga kasabutan sa milabayng kapin 30 ka tuig sa negosasyong NDFP-GRP, lakip ang The Hague Joint Declaration, ang Joint Agreement on Safety and Immunity Guarantees (JASIG), ang Comprehensive Agreement on Respect for Human Rights and International Humanitarian Law ug uban pa. Ginapakita ni Marcos nga dili niya kayang barugan ang pirma sa GRP, butang nga nakasugab sa pagsalig sa NDFP ug sa katawhan.

Ginapugos ni Marcos nga “sugdan balik” ang panaghisgot sa gambalay sa “demobilisasyon ug pagdidis-arma” sa BHB, nga wala ginasulbad ang mga batakang problema sa katawhan, nga maoy ugat sa gubat sibil sa nasud. Lig-ong mibarog ang delegasyon sa NDFP kontra sa maong pakana. Kung dili usabon sa rehimeng Marcos ang militaristang postura niini sa panaghisgot, andam ang mga rebolusyonaryong pwersa nga isuspinde ang pakighinabi sa GRP, hangtud mapulihan si Marcos sa unta mas abli ang hunahuna nga resolbahon ang mga batakang problema sa yuta ug kawalay hustisya. May panaghisgot kalinaw man sa GRP o wala, determinado ang Partido nga iasdang ang mga rebolusyonaryong pakigbisog alang sa nasudnon ug demokratikong tinguha sa katawhan.

Haum kaaya ang obhetibong sitwasyon sulod sa nasud ug sa tibuok kalibutan aron iasdang ang mga rebolusyonaryong pakigbisog. Masulti usab nga haum ang suhetibong sitwasyon—nga tungod sa kalihukang pagtul-id, ang Partido ug tanang rebolusyonaryong pwersa anaa karon sa mas pabor nga sitwasyon, kumpara sa milabayng duha ka tuig, aron sakmiton ang mga higayon para pangulohan ang malukpanong pag-abante sa demokratikong rebolusyon sa katawhan sa umalabot nga mga tuig. Ingonman, daku ang giatubang natong hagit ug bug-at ang tahas nga angay natong abagahon sa umalabot nga usa o duha ka tuig aron pakusgon ang Partido sa ideolohiya, pulitika ug organisasyon, aron mapataas ang kapasidad niining palihukon ang minilyong katawhan sa dalan sa demokratikong rebolusyon sa katawhan pinaagi sa malungtarong gubat sa katawhan.

Sa ideolohiya, kinahanglang padayong palalumon ug palapdon ang kalihukang pagtul-id sa pagsulod niini sa ikatulong tuig, nga adunay walo ka bahin o aspeto: usa ka Marxista-Leninista-Maoistang kampanyang pagtuon, usa ka kampanya alang sa lalum nga pagtuon sa konstitusyon ug programa sa Partido, usa ka kampanyang pagbalik-tuon sa mga dokumento sa Una ug Ikaduhang Bantugang Kalihukang Pagtul-id, usa ka kampanyang pagsumada, usa ka kampanya sa katilingbanong pagtuki ug pagkisusi sa hut-ong (SICA), usa ka kampanya sa pagsaway ug pagsaway-sa-kaugalingon, usa ka kampanya sa ebalwasyon ug promosyon sa mga kadre, ug usa ka nagpadayong kampanya aron siguruhon ang pagpatuman sa tulo ka ang-ang nga kurso sa edukasyon sa Partido.

Sama sa nahimong paghatag duut nato sa miagi, ang kalihukang pagtul-id, nag-una, usa ka kalihukang pagtuon, aron ipataas ang teoretikong kahibalo sa mga kadre ug myembro ug pahugton ang paggunit sa linyang pang-ideolohiya, mga prinsipyo ug palisiya sa Partido. Kini ang yawe aron atong mapataas ang rebolusyonaryong praktika. Kinahanglang palambuon ang pamaagi ug estilo sa pagtrabaho aron mapadaku ang ginakab-ot nga target, mapalalum ug matul-id ang panghunahuna ug mga pamaaging nahimong babag o bara sa mas dakung pag-abante. Magpadayon ang kalihukang pagtul-id hangtud mahukmanong naila, natul-id ug napatigbabawan ang mga nahimong kahuyangan ug kasaypanan sa miagi, ug makab-ot nato ang tinong direksyon sa paglapad ug pag-abante.

Labing hinanali ang panginahanglang iapas ang pagsumada sa tanang ang-ang ug natad sa gimbuhaton, ilabina sa milabayng 20–25 ka tuig gikan sa katapusan sa ikaduhang bantugang kalihukang pagtul-id. Ang pagsumada sa maong panahon ang maghatag kanato og mas lalum nga pagsabot sa pangkasaysayang gambalay sa mga nahimong kahuyangan nato sa milabayng mga tuig. Katungdanan sa Komite Sentral nga pangunahan ang pagsumada niini, kaabag ang tanang komiteng panrehiyon sa tibuok nasud.

Ginapangayo usab sa tanang komite sa Partido nga hatagan og prayoridad ang paghimo og SICA, nga nakapukos sa sistematikong pagpunting sa labing hinanaling mga katilingbanon ug ekonomikanhong isyu nga giatubang sa langkub ug ang-ang sa ilang liderato. Yawe ang paghimo og SICA sa pagpalagsik sa mga pakigbisog sa masa aron panalipdan ang ilang interes. Subay dinhi, kinahanglang tibuukon ang plano aron hugpungon ug palihukon ang lapad nga masa.

Kinahanglan usab nga ipatuman ang mga espesyal nga teoretikong pagtuon sa mga tataw nga isyu nga giatubang sa katawhan. Atubangan sa tataw nga isyu sa korapsyon ilalum sa rehimeng Marcos, kinahanglang kumprehensibong tun-an sa tanang myembro sa Partido ang burukrata-kapitalismo, sa giya sa teoretikong artikulo nga gipagula sa Komite Sentral. Ang mga artikulo sa Rebolusyon angay hustong tun-an sa tanang myembro sa Partido.

Sa organisasyon, mapangahas nga palapdon ang Partido nga dili magpasulod ni usa ka dautang elemento. Rekruton isip mga kandidatong myembro ang pinakaabanteng mga elemento gikan sa mga aktibistang masa nga dili moubos sa 18 anyos, andam nga dawaton ang Marxismo-Leninismo-Maoismo ug ang konstitusyon ug programa sa Partido, ug nagauyon nga hingpit nga magpatuman sa gimbuhaton sa asamang organisasyon sa Partido ug regular nga magbayad og butaw. Dawaton sila isip mga hingpit nga myembro human ang panahon sa kandidatura subay sa gitakda sa konstitusyon.

Kinahanglang padayon nga konsolidahon ug pakusgon ang Partido alinsunod sa demokratikong sentralismo, o demokrasyang gigiyahan sa sentral nga pagpangulo, ug sentralismong nakasubay sa demokrasya. Ipadayon ang hugot nga pagpatuman sa mga desisyon sa Komite Sentral ug sa mga nangulong komite sa Partido aron dungan-dungan ang pagmartsa pasulong.

Pakusgon ang sistemang komite pinaagi sa pagsiguro sa regular ug sistematikong panagtigum sa mga komite aron tibuk-on ang kolektibong desisyon sa mga giatubang nga isyu, ug aron kolektibong abagahon ang mga plano. Tukuron ang komiteng tigpatuman ug kalihiman sa mga nangulong komite alang sa adlaw-adlaw nga pagpangulo ug pagsubaybay sa mga gimbuhaton. Siguruhong hugot nga nasubaybayan sa kolektibo ang mga indibidwal sa pagpatuman sa mga tahas.

Padayon nga pakusgon ang sistema sa regular ug espesyal nga pagtaho ngadto sa nahataas nga organo ug paspas nga paggiya sa mga nahaubos nga komite. Padayong pakusgon ang lain-laing sistema o pamaagi sa pasahan sa komunikasyon.

Hugot nga ipatuman ang mga palisiya sa seguridad isip krusyal nga tahas sa organisasyon. Hugot nga ipatupad ang mga palisiya sa paggamit sa kompyuter, gadyet pang-komunikasyon ug himang elektroniko, sistema sa pagsirado ug pag-amping sa mga computer files, pagkoda sa mga rekord, ug pagputol sa linya sa mga fixed point, ilabina sa init ug nangulong kadre. Kinahanglang siguruhon sa mga yunit sa BHB ang tago nga gerilyang operasyon, paggamit sa mga sikretong ruta, pagrekisa sa mga gamit nga ginapasulod sa yunit, ug pagtudlo sa masa sa kalihukang tago.

Ilhon ug matngon nga bansayon ang ikaduha ug ikatulong han-ay sa mga namumunong kadre. Kinahanglang silang magpakahanas sa teorya ug sa kumprehensibong paggunit sa mga prinsipyo ug palisiya sa Partido. Kinahanglang nato silang bansayon isip mga mga propesyunal nga rebolusyonaryo nga gakson isip ilang karera sa tibuok kinabuhi ang pag-alagad sa Partido ug sa rebolusyon. Mapahangas silang hatagan og bag-ong mga mando ug tahas, ug ibutang sa mga bag-ong gimbuhaton sa ubang natad sa gimbuhaton o lugar.

Ipatuman ang palisiya sa “simpleng kinabuhi, pursigidong pakigbisog.” Hugot nga motuman sa mga nakatakdang mga istandard sa gasto sa mga komite ug indibidwal. Kinahanglang paningkamutan sa tanang komite sa Partido nga mosalig sa kaugalingon. Magpatumaw og gikinahanglang rekurso alang sa kaugalingong operasyon, ug himuon ang tanang paagi aro makatampo sa sentral nga pondo sa Partido.

Sa pulitika, kinahanglan natong labaw pang pakusgon ang Bagong Hukbong Bayan ug palagsikon ang rebolusyonaryong armadong pakigbisog, iasdang ang rebolusyonaryong kalihukang masa sa kasyudaran ug kabanikanhan, palapdon ang nasudnong nagkahiusang prente, ug palambuon ang gimbuhatong internasyunal.

Ang Bagong Hukbong Bayan ang nag-unang organisasyon nga anaa sa absulutong pagpangulo sa Partido. Kinahanglan nato kining dugang pakusgon arong iasdang ang rebolusyonaryong armadong pakigbisog isip nag-unang porma sa pakigbisog sa pag-abante sa malungtarong gubat sa katawhan.

Anaa sa paborableng kahimtang karon ang hukbong bayan aron dugang magpakusog. Kini human nato gipahapsay ang organisasyon ug operasyon niini nga nakapukos nag-una sa pagpalalum ug pagpalapad sa baseng masa, aron tabangan ang masa sa pagpaasdang sa ilang mga anti-pyudal ug anti-pasistang pakigbisog, ug pagpalagsik sa ilang pagsuporta ug pagsalmot sa armadong pakigbisog.

Pakusgon ug palapdon ang gimbuhatong masa sa mga yunit sa hukbong bayan ug tabangan ang masa nga palagsikon ug ipataas ang ang-ang sa ilang pagsukol. Dungan niini, ipataas ang kapasidad sa hukbong bayan sa paglunsad og gerilyang pakiggubat. Kusganong ipataas ang kahanas sa hukbong bayan sa paggamit sa taktika sa konsentrasyon, dispersal ug pagbalhinbalhin aron pirming huptan ang inisyatiba sa militar ug pulitika. Ipabiling buta ug bungol ang kaaway sa presensya ug lihok sa mga yunit gerilya. Batukan ug pakyason ang mga operasyong kombat, saywar ug intelidyens sa kaaway.

Kinahanglang ipabilin sa mga yunit sa BHB nga taas ang pulitikanhong kahimatngon, disiplinang militar ug masukulong diwa sa mga Pulang manggugubat. Hugot nga sundon ang mga lagda sa pagkampo, sa paglakaw ug sa paggimbuhatong masa.

Palihukon nato ang mga iskwad ug platun sa BHB aron ikatag ang armadong pakigbisog sa lapad nga kabanikanhan, kaabag ang mga yunit sa milisyang bayan ug mga kwerpo sa depensa-sa-kaugalingon. Pugson ang kaaway nga inatong sa nipis ang iyang kusog, aron magmugna og mas daghang oportunidad alang sa mga taktikal nga opensiba.

Ilunsad ang kayang ipadaug nga mga taktikal nga opensiba aron silutan ang mga lunod-patay nga pasistang kriminal, mga elementong paramilitar, ug mga nagpagamit nga elementong nagtraydor sa masa, ug kumpiskahon ang ilang mga armas. Ilunsad ang gikinahanglang armadong aksyon aron panalipdan ang interes ug kaayuhan sa masa batok sa mga nangilog og yuta, mga nangawkaw ug nagagun-ob sa kinaiyahan ug kriminal nga burukrata-kapitalistang kawatan sa pondo sa katawhan.

Kinahanglan natong idungan ang pag-abante sa rebolusyonaryong armadong pakigbisog sa pagpalapad ug pagpalagsik sa mga pakigbisog sa masang mag-uuma sa kabanikanhan. Madasigong iasdang ang mga anti-pyudal ug anti-pasistang pakigbisog, nga ginasumpay sa mga anti-imperyalistang pakigbisog. Kinahanglang pakusgon ang kalihukang mag-uuma alang sa reporma sa yuta, alinsunod sa minimum ug maksimum nga programa nga gitakda sa Rebolusyonaryong Giya para sa Reporma sa Yuta (RGRY) sa Partido.

Kinahanglang iasdang sa kabanikanhan ang malukpanong pakigbisog aron paubsan ang abang sa yuta, tangtangon ang usura ug ipataas ang suhulan sa mga mamumuong-panguma. Kinahanglang abton sa maong kampanya ang pinakalapad nga posibleng ihap sa mga mag-uuma. Mamahimong ipatuman ang maksimum nga programa sa pag-apud-apud sa yuta kung asa kaya kining panalipdan sa armadong kusog ug kung diin kaya kining dumalahan.

Uban sa pakigbisog alang sa reporma sa yuta, kinahanglang iasdang ang mga pakigbisog alang sa pagpanalipud sa yuta batok sa pagpangilog sa mga langyawng dagkung kumpanya, kakunsaba ang mga agalong yutaan ug dagkung burgesyang kumprador, ug batok sa kumbersyon sa mga umahan para sa pagpalapad sa mga minahan, plantasyon, mga proyektong ekoturismo, real estate, “renewable energy,” dam, ug uban pa. Ang maong mga palisiya nagpaantus sa masang mag-uuma ug naghikaw kanila og panginabuhian, samtang ginadaut usab ang produksyong agrikultural ug kapasidad sa nasud nga magmugna og igong pagkaon alang sa katawhan.

Dungan niini, kinahanglang iasdang ang lapad nga pakigbisog alang sa makatarunganong presyo sa mga humay, sibuyas, ahos, mga utan ug uban pang mga produkto sa mga mag-uuma, ug pagbatok sa liberalisasyon sa importasyon sa mga produktong agrikultural. Kinahanglang tukuron ang lapad nga kahugpungan sa masang mag-uuma sa lain-laing linya sa pananum. Kinahanglan usab nga makanunayong ibutyag ug suklan ang mini nga reporma sa yuta ug uban pang programa sa estado, nga nagpadali ug ginahimong ligal ang pagpangilog og yuta, lakip ang SPLIT program sa World Bank, ug “new emancipation law” ni Marcos.

Sa rebolusyonaryong kalihukang masa sa kasyudaran, atong hatagag prayoridad ang dugang pagpakusog sa pag-organisa ug pagpalihok sa han-ay sa masang mamumuo, sa semi-proletaryado ug mga kabatan-onang estudyante. Pakusgon ang pag-organisa sa han-ay sa mga mamumuong industriyal sa pinakadakung empresa sa nasudnong sentrong lungsod ug uban pang dagkung syudad sa lain-laing bahin sa nasud. Dungan niini, pakusgon ang pag-organisa sa mga mamumuo ug semi-proletaryado sa mga kabus nga komunidad sa kasyudaran. Dugang pakusgon ang pag-organisa sa mga kabatan-onang estudyante sa mga mayor nga syudad sa tibuok nasud.

Kinahanglang pakusgon ang mga pangsektor, pang-ekonomiya ug mga lokal na pakigbisog, dungan ang mga anti-imperyalista, anti-burukrata kapitalista ug antipasistang pakigbisog, ug pagsuporta sa mga pakigbisog sa mag-uuma sa kabanikanhan. Kinahanglang paningkamutang ibwelong balik sa pagsulod sa bag-ong tuig ang kalihukang protesta batok sa korapsyon aron papanubagon si Marcos ug Duterte isip hari ug reyna sa korapsyon, ug ipanawagan ang ilang pagluwat o pagpalagpot.

Ibutyag ang pagsuporta sa imperyalismong US sa korap nga rehimeng Marcos. Dungan niini, ipatuman ang lapad nga kampanyang propaganda batok sa nagkadakung presensya sa mga tropang Amerikano sa Pilipinas, pagbutang og mga himang iggugubat, pagtukod og dugang nga mga base ug pasilidad militar, walay katapusang mga pagbansay sa gyera, ug ang dala niining nagkadakung hulga nga moulbo ang gubat nga moamong sa nasud. Ibutyag ang papel sa US ug sa mga lunud-patayng maka-US nga grupong ginagamit niini sa paghulhog og mga panagbangi sa South China Sea.

Padayong pakusgon ang mga tago nga rebolusyonaryong organisasyong masa, pakusgon ang propaganda ug panawagan alang demokratikong rebolusyon sa katawhan, taliwala sa pag-abante sa lapad nga dayag nga kalihukang masa. Awhagon ang pinakadaghan nga sumuporta o mosalmot sa armadong pakigbisog ug mga pakigbisog sa mag-uuma sa kabanikanhan.

Sa pagpangulo sa hut-ong mamumuo pinaagi sa Partido, dapat padayong pakusgon ang nasudnong nagkahiusang prente aron palapdon ang suporta alang sa nasudnon ug demokratikong pakigbisog sa katawhan. Kinahanglan natong hugpungon ang lapad nga katawhan batok sa imperyalismo, pyudalismo ug burukrata-kapitalismo. Kinahanglan kining tukuron sa lig-ong pundasyon sa batakang rebolusyonaryong alyansa sa hut-ong mamumuo ug hut-ong mag-uuma, nag-una na sa kongkretong porma sa Bagong Hukbong Bayan, usa ka hukbong mag-uuma nga anaa nagpailalum sa absolutong pagpangulo sa hut-ong mamumuo, ug uban pang porma sa alyansa o paghugpong sa kalihukang mamumuo gikan sa kasyudaran ngadto sa kalihukang mag-uuma sa kabanikanhan.

Sa pundasyon sa batakang rebolusyonaryong alyansa matukod ang progresibong alyansa sa masang anakpawis ug sa petiburgesyang lungsod; ug ang mas lapad nga patriyotikong alyansa sa mga progresibong pwersa ug sa nasudnong burgesya. Matukod usab sa Partido ang mga temporaryong alyansa sa mga dili lig-on ug dili masaligang alyado, sagad sa usa o pipila ka bahin sa nagharing hut-ong batok sa pinakareaksyunaryo, pinakapasista ug pinakaitoy sa imperyalismong US.

Yawe sa pagtukod sa nasudnong nagkahiusang prente ang pagbaton og kusog nga batakang rebolusyonaryong alyansa. Kinahanglang matngon nga magbantay sa Toong oportunistang tendensya nga mabira o mahulog sa repormismo o legalismo; o sa “Walang” oportunistang tendensyang magsirado sa pultahan sa dili masaligan o di lig-ong pwersa nga makatampo sa pagpaasdang sa nasudnon-demokratikong kalihukan, sa direkta o dili direktang pamaagi.

Sa hinanaling umalabot, kinahanglang paningkamutang tukuron ang pinakalapad nga nagkahiusang prente batok nilang Marcos ug Duterte, nga karon parehong nagrepresenta sa pinakareaksyunaryo ug pinakapasistang paksyon sa nagharing hut-ong, aron hingpit nga ihimulag, batukan ug palagputon ang nagharing rehimen.

Sa basihan sa kusog sa kalihukan sa masang anakpawis ug petiburgesya sa kasyudaran sa pagsukol sa rehimeng US-Marcos, kinahanglang awhagon ang maalyadong pwersa, ilabina ang mga institusyon sa kultura sama sa mga simbahan ug eskwelahan, ug mga anaa sa serbisyong sibil, nga aktibong ibutyag ug batikuson ang korapsyon ug dunot nga sistema. Kinahanglan silang awhagon nga modapig sa rebolusyonaryong nagkahiusang prente.

Kinahanglang ibutyag ug makmakon ang mga ahente sa imperyalismong US ug ikog sa nagharing hut-ong nga grupo sama sa Akbayan sa pagpanglingla sa masa ug paglihis sa ilang pakigbisog.

Kinahanglang padayon nga pakusgon sa Partido ang rebolusyonaryong gimbuhaton sa ubang nasud, sa pag-organisa sa mga migranteng mamumuong Pilipino, pagtukod sa internasyunal nga nagkahiusang prenteng anti-imperyalista ug pagpakusog sa kalibutanong proletaryong pakighiusa.

Kinahanglang hugot nga hugpungon ang mga migranteng Pilipino sa mga nasud kung asa sila giempleyo upang batukan ang lain-laing porma pagpangdaugdaug ug diskriminasyon sa ilang mga langyawng amo, ingonman ang mga paantus nga palisiya ug pagpamig-ot sa reaksyunaryong gubyerno sa Pilipinas. Kinahanglan silang pukawon aron isumpay ang ilang mga pagsukol sa nasudnon-demokratikong pakigbisog sa nasud, ug awhagon silang mouli ug mosalmot sa rebolusyonaryong kalihukan.

Tukuron ang pinakalapad nga kutay sa pakigsuud sa tanang katawhan sa tanang bahin sa kalibutan para suportahan sa tanang pamaagi ang rebolusyonaryong pakigbisog sa katawhang Pilipino. Tukuron sa ilang han-ay ang pinakadaghang grupong nagasuporta ug organisasyong nakigsuud, ug awhagon silang motampo sa nasudnon ug demokratikong mga pakigbisog sa katawhang Pilipino.

Katungdanan sa Partido nga motampo sa padayong pagpakusog sa kalibutanong nagkahiusang prenteng anti-imperyalista. Kinahanglang iduso sa Partido ang pagtukod o pagpakusog sa internasyunal nga alyansang anti-imperyalista ug mga kampanya batok sa imperyalismong US, nga karon maoy numero unong imperyalista nga nanulsol ug nanghulhog og mga armadong panagbangi sa lain-laing bahin sa kalibutan.

Kinahanglang padayon nga pakusgon sa Partido ang pakighiusa sa lain-laing mga pwersang proletaryo sa lain-laing nasud, aron iasdang ug ipakaylap ang Marxismo-Leninismo-Maoismo ug gamiton kini sa praktikal nga aplikasyon sa lain-laing nasud. Samtang wala pay basihan aron tukuron ang usa ka sentrong internasyunal, ginasuportahan sa Partido ang mga teoretikal nga diskusyon, dayalogo, ug praktikal nga kooperasyon sa mga partido ug pwersang komunista sa tinguhang awhagon ang pagtukod ug pagpakusog sa partido komunista isip taliba sa mga bag-ong demokratiko o sosyalistang rebolusyon sa lain-laing nasud.

Nagpabiling pinakadakung tampo sa Partido sa kalibutanong kalihukang komunista ang pagpaasdang sa demokratikong rebolusyon sa katawhan sa Pilipinas. Matag lakang paabante ug kadaugan nga nakab-ot sa Partido sa pag-abante sa rebolusyong Pilipino tamparus sa imperyalismong US, usa ka tampo ug inspirasyon sa tanang proletaryong pwersa sa tanang bahin sa kalibutan.

Determinado ang Partido Komunista sa Pilipinas, uban ang tanang rebolusyonaryong pwersa sa Pilipinas, nga iasdang ang demokratikong rebolusyon sa katawhan. Atubangan sa haum kaayong sitwasyon, ug sa hustong pagpangulo sa Partido, nalantaw sa Komite Sentral nga magmartsa paabante ang malungtarong gubat sa katawhan ngadto sa hingpit nga kadaugan .

Huptan ug ipraktika ang Marxismo-Leninismo-Maoismo!

Tapuson ang imperyalismo, pyudalismo ug burukrata-kapitalismo!

Ibayaw ang Pulang bandera sa demokratikong rebolusyon sa katawhan!

Iasdang ang malungtarong gubat sa katawhan!

Mabuhi ang proletaryo ug katawhang Pilipino!

Mabuhi ang Partido Komunista ng Pilipinas!