Mahugot nga ginkukundenar han panrehiyon nga tsapter han Kabataang Makabayan (KM) ha Eastern Visayas an nagpapadayon nga pagpriso han pasista nga rehimen US-Marcos ha mamamahayag nga hi Frenchie Mae Cumpio, tawo ha singbahan nga hi Marielle Domequil ngan tagdepensa han tawhanon nga katungod nga hi Alexander Abinguna. Usa nga dako nga pagtamas-tamas ha hustisya an haros unom na katuig nira nga pagkakapriso basar ha hinimu-himo nga kaso han illegal possession of firearms and explosives. Dugang nga sangko pagpapagawas ha ira an desisyon nga “guilty” han Regional Trial Court Branch 45 ha kaso nga “financing terrorism” kontra kanda Domequil ngan Cumpio, nga basar man ta ha mga buaw nga testimonya han mga ahente militar ngan han National Task Force-Elcac.

Waray tinuod nga demokrasya o katalwasan ha ilarum ni Marcos. Gin-gagamit hini an mga balaud para gipiton ngan sirutan an mga sugad kanda Cumpio ngan Domequil — mga ordinaryo nga kabatan-unan nga nagdedepensa ngan nag-iinsister ha katungod han mga kablas pinaagi han kritikal nga peryodismo, aktibismo, ngan pag-oorganisa. Kahuman prisuhon an Tacloban 5, waray umundang an pasista nga estado ha pagpapamingaw ha mga organisado nga kabatan-unan ngan estudyante ha Eastern Visayas. Padayon nga ginpupuypoy han rehimen Marcos an ira maisugon nga pagbuksas ha kolonyal, komersyalisado ngan dunot nga sistema han edukasyon, pagbubuksas ha pasista nga terorismo han estado labina ha kabaryuhan, ngan pakikig-usa ha hiluag nga pakigbisog han katawhan para ha nasyunal nga demokrasya.

Darayawon an kadig-on ngan kaisog nga ginpakita nira Cumpio ngan Domequil ha masobra katunga kadekada nira nga diri makatadungan nga pagkakapriso. Gindadayaw namon hira komo igkasi nira kabatan-unan nga nakikigbisog para ha mas makatadungan nga kabubwason han amon Iroy nga Tuna. Samtang nakadetiner, imbes nga sumurender ngan magtraydor ha masa, ginpukaw ngan ginbuligan nira an mga igkasi nira priso. Hirayo gud hira ha mga hadto anay lider-kabatan-unan nga han madakop han kaaway gintraydor an katawhan ngan nagseserbe pa yana komo mga ahente militar ngan pikoy han NTF-Elcac.

Nag-iinop hi Marcos ngan an NTF-Elcac kun ginpipinsar nira nga an sentensya kanda Cumpio ngan Domequil magpupugong ha tikadamo pa nga kabatan-unan nga pukawon ngan organisahon an kalugaringon. Mas naaaghat kami nga diskubrehon an rason kun kay ano nga ginpipriso ngan gin-gigipit an amon igkasi kabatan-unan. Buhi nga pamatuod an kaso han Tacloban 5 nga pinaagi la han demokratiko nga rebolusyon han katawhan ngan madarahug nga pagpapabagsak ha naghahadi nga estado makakab-ot han kabatan-unan ngan katawhan Pilipino an tinuod nga katalwasan ngan demokrasya.

Pagawason hira Frenchie Mae Cumpio, Marielle Domequil ngan Alexander Abinguna! Pagawason an ngatanan nga priso pulitikal!
Hustisya para ha mga biktima han pasismo han estado!
Kabatan-unan, pagserbihan an katawhan! Umapi ha Bagong Hukbong Bayan!