Niadtong Disyembre 23, 2024, pasado alas 12 sa gabii, nahitabo ang pagpatay kang Konsehal Dennis Sadagnot sa Sityo Tuba, Barangay Tinayunan Hill, Guihulngan City, Negros Oriental. Sumala pa sa taho, gi-atangan si Sadagnot sa mga wala nailhan nga mga armadong lalaki sa dihang mopauli na siya sa ilaha gikan sa pagtambong sa Barangay Nights sa proper sang Guihulngan City. Gipakanaog siya sa gisakyang motor ug gipusil, hinungdan sa iyang kamatayon. Samtang, nasamdan usab ang iyang asawa nga kauban niya nianang higayona.

Si Sadagnot, tinuod nga adunay Standing Order sa rebolusyonaryong kalihukan. Dili ikalimod ang iyang mga binuhatan nga kontra-rebolusyonaryo ug kontra-katawhan hinungdan nga nag-atubang siya og daghang kaso sa kalihukan. Apan walay kalabtanan ang New People’s Army (NPA) sa nahitabong pagpatay sa konsehal, sukwahi sa gipakuyanap nga propaganda sa reaksyonaryong gobyerno. Mas dako pa ang posibilidad nga ang naghimo niini adunay personal o pamulitikal nga motibo.

Hugot nga gikundenar sa Leonardo Panaligan Command (LPC-NPA) ang pagpasangil niining insidente ngadto sa mga Pulang manggugubat.

Makita sa 56 na ka tuig nga kasinatian sa rebolusyonaryong kalihukan nga adunay gisunod nga demokratikong proseso ang korte sa katawhan gikan sa pagpasaka og kaso, pagpanguha og mga datus, hangtud sa pagpatuman sa desisyon nga nakab-ot sa rebolusyonaryong korte.

Gani, sa pagpatuman sa silot kamatayon nga konsekwensya sa mga bug-at nga kaso, hugot gihuptan sa mga Pulang manggubat ang mga rebolusyonaryong prinsipyo alang sa kaayuhan ug sa interes sa katawhan. Gihatagan nato og gibug-aton ang tawhanong katungod sa matag indibidwal ug gisiguro nga dili kini malapas sa bisan unsang desisyon nga atong ipatuman. Sa laktud nga pagka-istorya, gihimo kini para makab-ot ang hustisya ug dili para mudugang sa mga inhustisyang nagluntad sa katilingban. Kung kinsa lang ang may sala, mao lang ang manubag sa korte sa katawhan.

Ang asawa sa konsehal, walay rekord bisan usa nga kaso sa rebolusyonaryong gobyerno. Gikondenar usab sa LPC-NPA ang pag-angin sa iyang asawa sa maong hitabo.

Nagtangag usab og bug-at nga importansya ang pangutana kung diin ang mga militar ug kapulisan niining higayona nga aduna man untay detachments ug Regional Mobile Group sa PNP nga nahimutang sa duol nga bahin sa nasambit nga lugar. Kini nagpakita lang nga wala natapna sa mga instrumento sa reaksyonaryong gobyerno ang pagtaas sa krimen sa syudad sa Guihulngan nga mao man unta ang ilahang mandato. Apan dili na kini katingalahan tungod mumero unong kriminal sa mga kabukiran ug kasyudaran ang mga kapulisan ug militar nga bayaran sa mga dagkong kumprador burgesya, mga agalong yutaan, ug mga despotikong politiko.

Giawhag ang mga Negrosanon nga dili dayon mutuo sa mga gipakuyanap nga propaganda sa reaksyonaryong gobyerno nga dugay nang napamatud-an nga “fake news peddler.” Angay natong tukion ang bisan unsa nga mabasa og madunggan nato og dapat kitang magpabilin nga kritikal sa bisan unsang hisgutanan.