Sa ngalan sang bug-os nga katapuan sang Partido Komunista sang Pilipinas, kag mga kumander kag hangaway sang Bagong Hukbong Bayan, taas-inumol nga nagahatag sang pagsaludo ang Komite Sentral kay Kaupod Amek (Reynalde Erecre), palangga nga tag-alagad sang masang mangunguma kag mamumugon sa uma sang Negros kag Bohol, isganan nga komunista kag baganihan sang sahing mamumugon kag pumuluyong Pilipino.

Ginbun-ag si Ka Amek sa banwa sang Maco, Davao de Oro (sadto Compostela Valley) sadtong 1974 halin sa manubo nga saray sang petiburgesya. Nagkuha siya sang kurso nga BS Education sa University of Mindanao sa Tagum City. Lima ka tuig siya nga nagtrabaho bilang mamumugon nga kontraktwal sa pabrika sang plywood para gastuhan ang iya pagtuon.

Sang pamatan-on pa siya nakabisita si Ka Amek sa isa ka kampo sang Bagong Hukbong Bayan. Tungod personal niya nga ginaantus ang kaimolon kag pagpamigos, madasig niya nga nahangpan kag ginhakos ang rebolusyonaryong kawsa. Wala nagdugay, nag-upod siya sa mga yunit sang hukbo sa hilikuton masa kag hilikuton militar.

Nagpatapo si Ka Amek sa Partido sadtong 1997, sa panahon sang liwat pagbaskog sini bunga sang Ikaduha nga Dungganon nga Kahublagan Panadlong. Tungod sa iya pagkahanas kag pagkatutom, pagkatapos sang duha ka tuig, ginpili siya sa Komite sa Larangan sa ginhiwat nga kumperensya sadtong 1999. Gintalana siya bilang vice platoon leader sang sentro de grabidad sang platun. Ginpili siya bilang kagawad sang Komite sa Rehiyon sang Partido sa Central Visayas sa ginpatigayon nga kumperensya sadtong 2002. Nangin political instructor sa gintukod nga platun sa southeast Negros sadtong 2004, kag sa tuig nga ini, ginpili siya nga kagawad sang Komiteng Tagpatuman sang Komite sa Rehiyon sang Central Visayas.

Dako ang gintungdan nga papel ni Ka Amek sa pagtukod kag pagpabaskog sang BHB sa Bohol kag Negros. Nangin kabahin si Ka Amek sa pwersa sang BHB nga naglunsar sang mga taktikal nga openisba sa Bohol, lakip ang reyd sa banwa sang Batuan nga nakakumpiskar sang masobra 80 ka armas. Sadtong 2013, nangin platun leader sa gintukod nga pangrehiyon nga sentro de grabidad sa idalum sang Komiteng Rehiyon sa Negros, kag pagkaligad sang tatlo ka tuig, ginpili nga kumander sang kumpanya sini. Sadtong 2019, gintalana si Ka Amek nga pangrehiyon nga kumander sang BHB sa Negros.

Bilang katapo kag lider sang Partido, pursigido nga nagtuon si Ka Amek sang Marxismo-Leninismo-Maoismo. Ginapaseguro niya nga magtalana sang panahon sa pagbasa sang mga klasiko nga mga sinulat sang mga dungganon nga komunistang mangin-alamon, kag pagtuon sang pilosopiya, teorya sang inaway banwa kag iban pa. Sadtong 2023, nagbulos si Ka Amek bilang sekretaryo sang Komite sa Rehiyon sang Partido sa Negros. Dako ang gintungdan ni Ka Amek sa pagdapat sang mga pagtulun-an sang kahublagan panadlong sa Negros. Paagi sa pagpanguna sa mga nagapamuno nga mga kadre sa Negros sa pagsaway sa kaugalingon, nahimo ni Ka Amek nga hugot nga konsolidahon ang Komite sa Rehiyon kag sa pagpanguna sini ang tayuyon nga pagpapagsik sang rebolusyonaryong kahublagan sa isla. Sadtong 2025, ginpili siya nga kagawad sang Komite Sentral sang Partido.

Sining Enero 30, samtang nagalakat sa mga tubuhan sa Barangay Bi-ao, Binalbagan, Negros Occidental, naka-engkwentro sang grupo sang mga Pulang hangaway nga ginalakipan ni Ka Amek ang mga pasistang tropa sang 94th Infantry Battalion sang AFP. Naseparar si Ka Amek sa yunit. Naghulag ang masa sa palibot agud sagupon siya, apang pagkaligad sang pila ka oras natultolan kag gindakop siya sang kaaway.

Imbes nga kilalahon ang iya mga kinamatarong bilang bihag sang inaway sa idalum sang layi sa inaway, ukon bisan sa idalum sang reaksyonaryong layi, si Ka Amek ginpaarakan sang luthang sang mga pasistang berdugo. Sa sobra-sobra nga bala nga gingamit sang kaaway, indi na makilal-an ang iya bangkay.

Nagaselebrar sa bangkay ni Ka Amek ang mga imperyalista, burges kumprador, mga dalagko nga agalon mayduta. Sa malawig nga panahon, si Ka Amek tunok sa tutunlan sang mga reaksyonaryong sahi. Sa pihak nga bahin, ang kamatayon niya ginatangis sang bug-os nga pumuluyo, kasubong kabug-at sang bukid sang Kanlaon nga nagapilpil sa taguipusoon sang mga mamumugon sa uma kag tanan nga nagaantus nga nagaagum sang pinakagrabe nga dagway sang pagpanghimulos kag pagpamigos. Lubos nga nagapakig-unong ang Partido kag bug-os nga rebolusyonaryong kahublagan sa asawa, mga anak kag utod ni Ka Amek.

Nagsayop ang mga pasista kag reaksyonaryo nga magdahom nga sa pagkadula sang kabuhi ni Ka Amek maga-untat ang pagbangon kag paghimakas sang masa sang pumuluyo. Kapid sang ila pagtangis, puno sang pagrebolusyon ang ila mga dughan. Ang dugo nga gin-ula ni Ka Amek labi pa nga magpatambok sa duta sang rebolusyon, kon diin maga-usbong ang mga bag-ong tubo nga anak sang banwa nga magapadayon sang wala pa natapos nga rebolusyon.

Lubos nga handa ang mga kadre sang Partido sa Negros nga tungdan ang mga katungdanan kag responsibilidad nga ginbayaan ni Ka Amek. Sa ubay sang Komite Sentral, determinado sila nga padayon nga pabaskugon ang Partido kag magtindog sa unahan sang mga paghimakas masa kag armadong paghimakas sa Negros. Kasubong sang pat-od nga matag-adlaw nga pagbutlak sang adlaw sa sidlangan, magatuhaw ang bag-ong mga kadre kag lider sang masa nga magapadayon sang rebolusyon sa Negros kag bug-os nga pungsod.

Tubtob katubtuban naton nga dumdumon ang ngalan kag mga nangin amot ni Ka Amek sa rebolusyon Pilipino. Kuhaan naton sang inspirasyon ang iya kabuhi nga wala sang pagkangilin nga pag-alagad sa masang ginapigos kag ginahimuslan, kag sa pagsulong sang demokratikong rebolusyon sang banwa agud lab-uton ang handum sang pumuluyo para sa pungsodnon nga kahilwayan kag sosyalistang buasdamlag.