Isip pagsaulog sa ika-57 nga anibersaryo sa New People’s Army, nagbitay ang KM Cebu og mga poster ug banner nga nag-ingon: “Rebolusyon ang sulbad sa krsisis” ug “Kabatan-onan, salmot sa NPA!”

Hingpit nga gisalikway sa KM Cebu ang imperyalistang gyera nga ginalunsad sa US ug Israel sa Iran, ug ang epekto niini sa nagkagrabeng krisis sa Pilipinas. Walay pagtagad sa tawhanong katungod nga ginabombahan sa US-Israel ang Iran para sa pakab-ot sa iyang imperyalistang interes nga kontrolon ang industriya sa lana. Usa kini ka desperadong lakang sa US para luwason ang kaugalingon sa nagkagrabeng krisis ug stagpalsyon nga siya mismo ang nagmugna.

Gisalikway usab sa KM Cebu ang padayon nga pagpaka-itoy sa rehimong Marcos sa Imperyalistang US. Padayon nga nagpaggamit si Marcos sa US pinaagi sa pagtugot sa mga EDCA site, pagtukod og mga baseng militar sa Pilipinas, ug pagkasa sa mga balikatan excercises isip kabahin sa “First Island Chain” nga estratehiya batok sa Tsina. Gipasagdan usab ni Marcos ang pagsabot-sabot sa mga kartel sa lana—sama sa Petron, Shell, ug Caltex—nga sakmiton ang gyera sa Iran para sa pagpaburot sa ilahang ginansya. Ang epekto niini, patong-patong nga gipas-an sa katawhang Pilipino ang pagsaka sa presyo sa lana ug mga palaliton. Mini ang tubag ni Marcos niini–dili paigo ang ayuda sa mga drivers, wala gihapon giwala ang excise tax ug VAT, ug nagtunhay gihapon ang Oil Deregulation Law.

Diri sa Sugbo, dili lang ang pagsaka sa presyo sa palaliton gumikan sa pagsaka sa presyo sa lana ang hulga—padayon ang hulga sa pribatisasyon sa Carbon Public Market. Ang Carbon Public Market nagtubag sa panginabuhian ug pagkaon sa liboan ka vendors ug consumers—dili lang gikan sa Sugbo, pero gikan pud sa kasikbit nga isla, probinsya, ug rehiyon. Kini nagpakita lamang nga padayong ginalimod sa estado ang batakang serbisyo ug padayon nga ginapaboran ang mga dagkong negosyo sama sa mga kartel sa lana ug ang SM-Megawide nga mao karon ang nagdumala sa merkado sa Carbon.

Nagpakita lamang kini nga ang estado nga nagtunhay wala nag-alagad sa katawhan, ug angay na kining alid-an og usa ka estado nga gidumalaan sa katawhan. Makab-ot lamang kini pinaagi sa usa ka rebolusyon. Walay laing sulbad ang krisis sa imperyalistang gyera, kirsis sa lana, ug pribatisasyon kung dili ang paglunsad sa Demokratikong Rebolusyon sa Katawhan. Kini usa ka rebolusyon nga nagtumong nga putlon ang kupot sa imperyalistang US, bungkagon ang mga galamay niini nga mga dagkong burgesyang komprador, agalong yutaan, ug mga burukrata kapitalista; tangtangon ang impluwensya sa kartel sa lana; ibalik ang batakang serbisyo gikan sa dakong pribadong pwersa; i-apod-apod ang yuta ngadto sa mga mag-uuma; ug tukuron ang nasudnong industriya aron sulbaron ang ugat sa krisis. Ang krisis sa kalibutan nagpakita lamang nga rebolusyon ang sulbad, apan walay dinalian nga rebolusyon, Maong sa ika-57 nga anibersaryo sa NPA, padayon nga nagsaludo ug nagasuporta ang KM Cebu sa rebolusyong gilunsad para malingkawas ang katawhang Pilipino. Hagit sa mga kabatn-onan nga musampa sa NPA, ang tinuod nga sundalo sa kabus!