Malampuson nga napahigayon sa usa ka yunit sa Leonardo Panaligan Command-New People’s Army (LPC-NPA) ang pagsunog sa usa ka dump truck, usa ka pison (road roller), ug duha ka backhoe, tanan gipanag-iyahan sa pamilyang Limkaichong, kagahapon, Pebrero 8, alas otso sa gabii, sa sakop sa Barangay Aya, La Libertad, Negros Oriental. Gibana-bana nga mokabat sa mas o menos sa ₱20,000,000 ang nahimong damage sa maong operasyon sa mga Pulang manggugubat.

Suno ni JB Regalado, tigpamaba sa LPC-NPA, ang mao nga mga ekwepo gigamit sa pag-construct sa mga farm-to-market road, nga kuno maghatag sa paspas nga pagbyahe sa mga produkto sa mga mangunguma. Apan sa tinuod, kini nga mga proyekto panugod sa pagpasulod sa mga dagkong korporasyon nga gipanag-iyahan sa mga langyaw nga kasosyo sa negosyo sa mga Limkaichong. Maghatag kini og dalan sa operasyon sa mga dagkong minahan, pagpatuman sa komersyal nga reforestation ilalum sa National Greening Program, mga plantasyon, ug uban pang proyektong makadaot sa kinaiyahan ug makadislokar sa mga lumulupyo sa apektadong komunidad sa kabukiran.

Gipunting usab ni Regalado nga mas mokuyanap pa ang militarisasyon sa sakop sa La Libertad ug kasikbit niini nga mga lungsod sa Occidental ug Oriental sa higayon nga mahuman na kini.

“Makita nga kung asa ang ekonomikanhong interes sa mga agalong yutaan ug dagkong komprador burgesya, anaa usab ang halapad ug dalagkung pagmilitarisa sa mga komunidad nga moresulta sa labing brutal nga mga pagpanglapas sa tawhanong katungod sa mga Negrosanon,” saysay ni Regalado.

Dugang niya, ang mga proyektong pang-imprastruktura ug konstruksyon sa kalsada gihimo usab nga gatasan sa pamilya Limkaichong. Dili limod sa publiko nga ang ilang nangunang negosyo mao ang construction firm.

Militanteng gi-awhag sa LPC-NPA ang mga residente sa maong lugar kag sa mga kasikbit niini nga dili magpailad sa mga programa ug mga palisiyang gipakanaog sa reaksyonaryong gobyerno nga kuno magdala ug kaayohan. Tataw nga sa reyalidad, naghatag lang kini og benepisyo sa mga adunahan ug dili sa mayoryang mangunguma.

Gani, kinahanglan nga magpakabana ang mga Negrosanon sa mga panghitabo sa katilingban isip pagpukaw ug pagpataas sa ilang politikanhong kaamguhan hilabina ang gipahimuslan ug linupigan nga sektor. Kadungan niini, importante nga adunay kolektibong pagpaningkamot ang mga Negrosanon nga bag-uhon ang makalolooy nga kahimtang ug magtukod og usa ka gawasnong katilingban nga may kaangayan para tanan. Ang pagbitbit og armas ang mahukmanon nga lakang para mahimo kini. Busa, nanawagan ang LPC-NPA nga musalmot ang katawhang Negrosanon sa pagpaasdang sa armadong rebolusyon.