Mabaskog nga ginakundena sang NDF-Panay ang panibag-o nga kaso sang pagpamatay, iligal nga pag-aresto kag pagpasaka sang himo-himo nga kaso sang 61stIB kag 301st Brigade batuk sa mga inosente nga sibilyan sang Miag-ao, Iloilo kag Sibalom, Antique.

Sang kaagahon sang Abril 18, 2020, matapos mapaslawan ang mga naga-operasyon nga tropa sang 61st IB nga kibonon kag iguon ang isa ka yunit sang NPA sa sitio Anoy, Brgy Cabalaunan, Miag-ao, Iloilo, ila ginpaukpan ang mga sibilyan nga ara sa palibot sang amo nga lugar. Ila ginluthang si John Farochelien, 50 anyos kag ang isa ka mangunguma nga taga-Anoy kag gindakop ang 11 pa ka mga sibilyan nga nagapuyo sa mga barangay sang Igpanulong, Lupit at Bulalacao, tanan sakop ng Sibalom, Antique kalakip ang 5 ka minor-de-edad. Matapos sini, ginpabugal pa ni 61st IB commanding officer Lt Col Joel Benedict Batara sa mga lokal nga media nga NPA ang ila ginpatay kag ginpangdakop. Nagpresenta pa sila ng pila ka armas, eksplosibo kag mga dokumento nga kuno ila nakuha halin sa NPA agud kumpletuhon ang ila istorya sa media kag ang pagtanum ng ebidensya para pasakaan kaso ang ang mga inosente nga biktima.

Sa amon paghibalo si John ang isa ka aktibo nga lider sang ligal nga kahublagan sang mangunguma sa Miag-ao, isa ka amay nga solo nga naga-atipan sa 3 niya ka anak matapos napatay ang iya asawa sa isa ka aksidente sa pampasahero nga dyip sa Brgy. Igbita, Miag-ao sadtong 2018. Ang mga iligal nga gin-aresto naman ang halos pamatan-on nga mga mangunguma nga ara sa lugar para sa pagkuha sang dugos halin sa mga ginapuhag nga putyukan para ila ibaligya. Kinaandan na nila ini ginahimo sa kada pag-abot sang bulan sang Marso tubtob Mayo bilang pangdugang sa gamay nila nga kita halin sa pagpanguma.

Ang panibag-o nga terorismo nga ini sang 61st IB ang kasugpon lamang sang ila malaba nga rekord sa pagpamatay kag paglapas sa tawhanon nga kinamatarung sang mga sibilyan. Sampaton na Si Lt. Col. Batara sa paglubid sang kabutigan labi na sa mga hambalanon batuk sa rebolusyonaryong kahublagan. Madumduman nga sadtong Marso 26, 2020 iya man ginlibod sa media ang kuno encounter sang iya mga tropa batuk sa NPA sa Brgy Binolosan Pequeno, Calinog, Iloilo kadungan sa pagpresenta sang pila ka armas kag kagamitan na ila ìnakumpiskaî. Gilayon nga ginbuyagyag ini sang yunit sang NPA nga nagahulag sa nasambit nga lugar nga ini puro kabutigan ni Col Batara, kag sa dugang nga pagpangusisa nahibal-an nga isa ka misencounter ang natabo sa tunga sang 61st IB kag pila ka tropa sang CAFGU nga nagalagulag sa lugar.

Maintindihan pa namon kun wala untat ang pagbinutig kag pagpangguba ni Lt Col Batara at Col Sison ng 301st Bde batuk sa NPA sigun sa pungsudnon nga polisiya sang rehimeng US-Duterte batuk sa CPP-NPA-NDF sa idalum sang TF-ELCAC. Nangin desperado na ang AFP kag PNP bangud malapit na matapos ang termino sang ila pasista nga hepe apang nagapabilin nga ilusyon ang handum sini sa pagdugmok sa NPA. Ang pagpamatay, pagpamigos kag pagtapak sa kinamatarung sang mga sibilyan para sa amo nga katuyoan ang tuman ka makangilil-ad kag dapat sukton labi na sa panahon subong nga naga-agum ang bug-os nga pumuluyo sang malubha nga kaimulon bangud sang COVID 19, kapabayaan kag mapiguson nga ‘lockdowns’ sang reaksyonaryong estado.

Nagapanawagan kami sa mga tagsakdag sang tawhanon nga kinamatarung kag yara sa ligal nga propesyon nga buligan ang mga biktima agud gilayon nga mahilway 11 nga gin-aresto kag hatagan hustisya ang pagpatay kay John Farochelien. Nagaapela man kami sa mga katapu sang lokal nga media nga magbulig sa pagpapahayag sang kamatuoran nga simple nga sibilyan ang mga biktima. Daku nga bulig kun makuhaan man ninyo sang pahayag ang ila mga pamilya kag kasimaryo kag indi lang magsalig sa mga ginapagwa nga pahayag sang AFP kag PNP.