Wala sang armadong engkwentro sa tunga sang mga tropa sang #DiMasaligan79IB kag mga Pulang hangaway sang Roselyn Jean Pelle Command-Northern Negros Guerilla Front sang New People’s Army (RJPC-NPA) sa nagligad Enero 15, 2024 sa Sityo Martesan, Barangay Cambayobo, sakop sang Calatrava, Negros Occidental. Wala sang presensya sang NPA sa amo nga lugar sa nasambit nga petsa.

Peke kag himu-himo lang ang ginpalayag sang #DiMasaligan79IB nga may presensya sang NPA amo nga nagkondukta sang operasyon nga nagresulta kuno sa engkwentro. Lubos nga kabutigan kag obra-obra lang ang ginpakita nga temporaryong besingan ukon gintiniran sang NPA kag ang mga armas, bala, dokumento kag iban pa nga personal nga kagamitan nga “narekober” matapos ang peke nga engkwentro.

Indi masaligan ang ila mga “ebidensya” ukon “rekoberi” nga bisan ang mga yunit sang Armed Forces of the Philippines (AFP) wala magkapareho ang mga gindeklara nga armas nga narekober diin ginsiling sa #DiMasaligan79IB nga isa ka Garand, isa ka Carbine kag isa ka .38 revolver ang narekober, apang suno sa AFP Visayas Command (VisCom), duha ka Garand kag isa ka .38 daw ang mga armas nga nakuha matapos ang ginpagwa nga “engkwentro.” Wala huya man ang #DiMasaligan79IB sa pagpagwa sang mga rebolusyonaryong dokumento nga recycled nga rekoberi kag pag-printa sang mga rebolusyonaryong pahayagan, pareho sang Ang Bayan kag Ang Paghimakas, para ipapati sa publiko nga lehitimo ang nasambit nga engkwentro.

Indi na bag-o ang iskema sang #DiMasaligan79IB kag AFP sa pagpagwa sang peke nga engkwentro. Sumugod nga gin-asayn diri sa Northern Negros ang #DiMasaligan79IB sadtong ulihi nga bahin sang 2017, ginhimo na nila ang amo nga pamaagi:

• Nobyembre 16, 2018 – ginpagwa nga peke nga engkwentro ang misencounter sang mga pasista nga armadong tropa sa Barangay Washington, Escalante City, Negros Occidental sa diin napatay ang duha nila ka tropa
• Pagka-bwas, Nobyembre 17, 2018 – ginpagwa nila nga engkwentro ang pagbalos nila nga pagpalupok sa mga kabataan nga gahampang sang boga panahon sang gidakop nila ang isa ka sibilyan sa Barangay Langub, Escalante City
• Gisundan ini sadtong Setyembre 19, 2019 sa Barangay Old Poblacion, Escalante City – gindakop ang duha ka sibilyan nga nagpahuway sa natabuan nga lugar
• Hunyo 21, 2021 – ginpagwa sang #DiMasaligan79IB nga engkwentro ang natabo sang ila ginpatay ang isa ka notoryus nga manugpangilkil sadtong Hunyo 21, 2021 sa Barangay Minapasuk, Calatrava, Negros Occidental
• Setyembre 30, 2021 – ginpagwa nila nga engkwentro ang ila brutal nga operasyon kontra sa apat ka mga hors de combat ukon nagmasakit nga mga Pulang hangaway sa Brgy. San Pablo, Manapla, Negros Occidental
• Disyembre 5, 2021 – gisundan gilayon kini sa ila patarasak nga pagpalupok kontra sa isa ka may deperensya sa pamensaron sa Brgy. Winaswasan, Calatrava.
• Hunyo 22, 2022 – madumduman man nga ginpagwa nila nga may engkwentro sa Barangay Minapasuk, Calatrava kag pugos nga ginpabakwit ang mga residente
• Pagdason bulan niini, Hulyo 6, 2022 – nagpatarasak sila sa pagpinalupok sa isa ka balay kag gindakop ang isa ka sibilyan sa Barangay Marcelo, Calatrava
• Oktubre 17, 2023 – nasaksihan sang pumuluyo ang kapintas sa #DiMasaligan79IB sang ginpatay nila ang duha ka sibilyan sa Barangay Canlusong, EB Magalona, Negros Occidental

Pabor tanan sa #DiMasaligan79IB kag AFP ang pagpabugal sang mga peke nga engkwentro, kabaylo sang seguridad kag kalinong sa pagpangabuhi sang pumuluyo. Indi mapilasan ukon mapatay ang ila mga tropa sa himu-himo nga mga engkwentro, kag gani, ginahingalitan para sa pagkilala kag promosyon. Tuburan man ini sang korapsyon sang mga matag-as nga opisyal sa pagreport sa gasto sang mga bala kag iban nga kagamitan militar. Ginapahug kag ginatiplang man sang Puting armado ang pumuluyo gamit ang ila himu-himo nga rekord sang mga rebolusyonaryong pwersa nga nakuha matapos ang peke engkwentro. Ginahimo man nga rason ang mga peke nga engkwentro para masakop sang mga abusador kag wala respeto nga mga elemento sang #DiMasaligan79IB kag AFP ang mga komunidad nga nakaapekto sa hilway nga paghulag sang pumuluyo.

Ang pasismo sang estado gamit ang mayor nga instrumento nga #DiMasaligan79IB kag AFP-PNP-NTF-Elcac, sa tunga sang grabe nga krisis nga ginaatubang sang bilog pumuluyo tuga sang pagdomina sang imperyalismo, upod ang burukrata kapitalismo kag lokal nga pyudalismo, ang nagaduso sa pumuluyo nga mag-usoy sa mabudlay nga dalan sang pungsudnon-demokratiko nga rebolusyon nga magahawan sa dalan sang sosyalismo, para malab-ot ang bug-os nga komunismo.##