Lubos nga ginapasidunggan kag ginahatagan sang pagsaludo sang Apolinario Gatmaitan Command -New People’s Army Negros Island (AGC-NPA) kag bug-os nga mga rebolusyonaryong pwersa ang paghalad sang kabuhi sang mga rebolusyonaryong martir sa nagluntad nga armadong inaway sadtong Abril 27, 2025, mga alas 5:30 sang kaagahon sa Barangay Tapi, Kabankalan City, Negros Occidental.

Ginakilala ang pagkabaganihan sang mga Pulang kumander kag hangaway sang NPA nga sanday Reniel “Ka Randy” Locsin Cellon, Mary Jane “Ka Shonie” Magquilat, Charity “Ka Mayang” Amacan, Johnrey “Ka Jai” Mejares, Glenda “Ka Glendyl” Tinio Mejares, Dee “Ka Dahlia” Supelanas kag Ka Pitong. Tatlo sa ila ang senior citizen na kag may ginabatyag medikal nga nangin rason sa kabudlayan sa paghulag apang wala sang pagpangduha-duha kag lubos panahon sa gihapon nga naga-alagad sa rebolusyonaryong kahublagan kag sa kaayuhan sang pumuluyo sa isla sang Negros.

Over-kill ang paggamit sang tuman kadaku nga pwersa sang tropa militar sa makasiligni nga operasyon kombat nga ginpatigayon sang uhaw sa dugo nga mga batalyon sang 11th, 15th kag 47th IB sa pagpamuno ni Brigadier General Joey A. Escanillas sang 302nd Brigade batok lamang sa pito ka mga hangaway sang banwa. Nagalaway ang mga upisyal sang militar sa pagkuha sang reward sang mga napatay nga mga Pulang hangaway, subong man ang pagpataas sang ranggo.

Desperado nga tikang sang rehimen US-Marcos Jr sa idalom sang kontra-insurhensya nga kampanya nga dugmukon ang rebolusyonaryong kahublagan sa isla sang Negros.Sa sini mahatagan dalan ang maki-dumuluong kag kontra-pumuluyo nga programa pang-ekonomiya nga magadislokar sa linibo ka pumuluyong Negrosanon. Ang maduguon nga aksyon militar ang ginagamit agud pahipuson kag punggan ang nagabalingaso nga pagbato sang pumuluyo batok sa garuk kag mahimuslanon nga estado.

Antes pa man gin-utas sang berdugong militar ang kabuhi sang Kabankalan 7, gintungdan nila ang bulawanon nga hilikuton sa padayon nga pagpa-uswag sang armadong paghimakas, pagpalapad sang baseng masa kag agraryong rebolusyon sa isla. Kabahin sa ila ginlunsar nga kampanya amo ang pagpamatok sa proyektong plantasyon sa oil palm sa banwa sang Candoni nga yara nahamtang sa mga barangay sang Gatuslao, Agboy kag Payawan nga ginpanag-iyahan sang pamilya Consunji. Daku ang kahangawa sang pumuluyo sa mga apektado nga lugar tungod pagasakupon sini ang 6,652 ka ektarya nga kalasangan Kon sa diin 4,000 ka ektarya ang kabahin sa dutang palanublion sang mga tumandok nga pagagamiton sang mga Consunji sa sulod sang 25 ka tuig ukon sobra pa.

Ang panindugan sang mga rebolusyonaryong martir para sa pagdampig sa masang pigos kag ginahimuslan agud maangkon ang kinamatarung sa duta, palangabuhian, kabuhi kag kalinong nga nasandig sa demokrasya ang nangin mabakud nga pundasyon sa pag-usoy sa banas sang armadong rebolusyon.

Mapatay man ang rebolusyonaryo apang ang rebolusyon magapadayon. Nautas man ang ila kabuhi apang ang ila nga mga rebolusyonaryong dugo ang magapabilin kag maga-usoy sa ugat sang madamo pa nga rebolusyonaryo nga magatubo halin sa kubay sang malapad nga katawhan nga magpasakop sa NPA agud pangapinan kag lubos nga alagaran ang pigos kag ginahimuslan nga pumuluyo tubtob sa katapusan nga pitik sang ila mga pulso.