Gikundena karong adlawa saPartido Komunista ng Pilipinas (PKP) ang Armed Forces of the Philippines (AFP) ug Philippine National Police (PNP) sa “lapas sa balaod nga pag-aresto ug dili makatarunganong detensyon” kang Dr. Natividad Silva Castro. “nakigduyog ang Partido hinanaling panawagan sa mga organisasyon sa tawhanong katungod, mga kauban ug mga higala ni Dr. Castro alang sa pagpagawas gilayon kaniya ug pagbasura sa tanang hinimuhimo nga mga kaso batok kaniya.”

“Si Dr. Si Castro usa ka biktima sa nagpadayong gubat sa terorismo batok sa katawhan sa rehimeng Duterte ug sa NTF-Elcac niini,” matud sa Information Officer sa PKP nga si Marco L. Valbuena. Pugsanon siyang gikuha kagahapon sa mga pasistang ahente sa pulis ug militar nga mireyd sa iyang balay sa San Juan City pinasikad sa warrant of arrest nga giisyu niadtong Enero 30, 2020 sa Regional Trial Court Branch 7 sa Bayugan City, Agusan del Sur. Gipasakaan siya og kasong kidnapping ug illegal detention.

Gitaho sa mga organisasyon sa tawhanong katungod nga wala siya makontak sa iyang ligal nga abogado o pamilya human sa pagdakop. Gisuportahan ni Valbuena ang mga hangyo nga mahatagan dayon siya og ligal nga representasyon ug tabang medikal tungod kay aduna siyay balatian nga hypertension ug diabetes. Giawhag niya ang tanang mga demokratikong pwersa sa paghimo og dinalian nga aksyon aron ihingusog ang pagpagawas kang Dr. Castro ug sa tanang bilanggong pulitikal.

Kanhing tsirman sa Karapatan-Caraga si Dr. Castro ug naila sa pagtabang sa pagtukod sa mga eskwelahan sa Lumad ug paghatag og serbisyong medikal ngadto sa kabanikanhan. Sumala sa mga balita, si Dr. Castro usa sa mga resource people (tigsaysay) nga namulong atubangan sa United Nations aron ipakita ang kundisyon ug kahimtang sa tawhanong katungod sa katawhang Lumad.

Matud ni Valbuena, ang pagdakop kang Dr. Castro kabahin sa padayong paningkamot sa pagpahilum sa katawhan, ilabina sa Mindanao, kung asa ang mga pwersa sa militar ug kapulisan naglunsad og walay hunong nga gubat sa pagpanumpo nga nagpakita sa kaylap nga pag-abuso ug paglapas sa tawhanong katungod. “Ang katawhan sa Mindanao, nga gihulagway isip balwarte ni Duterte, nag-antus sa nagkagrabeng mga porma sa pagpanumpo ug dili maagwanta nga katilingbanon ug ekonomikanhong g kahimtang .”

Giingon usab sa PKP nga ang pagdakop kang Dr. Castro mahimong malambigit sa mga plano sa pagpakusog sa mga pag-atake batok sa mga patriyotiko ug demokratikong pwersa aron pugngan sila sa epektibong pagpangampanya alang sa eleksyon sa Mayo ug sa pagpig-ot sa ilang mga tingog batok sa mga maniobra aron kawaton ang eleksyon pabor sa mga kandidato ni Duterte.

Giakusahan si Dr. Castro sa militar ug kapulisan nga usa ka “taas nga upisyal” sa CPP. Si Valbuena miingon nga ang “pagpang-red-tag sa militar batok sa mga tigpanalipud sa tawhanong katungod dili na bag-o ug balik-balik nga gigamit sa mga pwersa sa estado aron hatagag rason ang kampanya niini sa ekstrahudisyal nga pagpamatay, iligal nga pag-aresto, ug walay hunong nga pagpanghasi batok sa mga progresibong aktibista nga kritikal sa tiranikong paghari ni Duterte.”

Hangtud sa Disyembre 2021, 712 ka political prisoner ang padayong nag-antus sa prisohan, 489 niini ang giaresto ilalum sa administrasyong Duterte.