Ginkundenar sang Armando Sumayang Jr Command-New People’s Army (ASJC-NPA) ang pagpatay sa isa ka person with disability (PWD) kag hors de combat nga si Rodney Lumanog (Ka Wanny), 52 anyos, sa hitabo nga aktibo nga depensa sadtong Enero 10, sa Sityo Cambogui-ot, Barangay Camindangan, Sipalay City, Negros Occidental.

Kabutigan ang ginpaguwa sang 15th IB sang Armed Forces of the Philippines (AFP) nga napatay si Ka Wanny sa isa ka engkwentro. Ang matuod, wala na sang ikasarang nga magbato si Ka Wanny sang gindakop siya sa mga berdugo nga AFP, gintortyur kag ginpatay. Si Ka Wanny, nakaagi na sang operasyon sa paa sadtong 1990’s kag nagresulta ini sa pagka-stainless sa iya nga isa ka paa. Napilitan siya nga magbalik sa NPA bangud nga ginalagas siya sa mga lunod-patay nga militar bisan sa iya nga kondisyon.

Ang kaso nga ini, indi hamulag sa ginatos ka mga biktima sa pagpatay sang AFP-PNP sa mga hors de combat. Paglapas ini sa Comprehesive Agreement on Respect for Human Rights and International Humanitarian Law (CARHRIHL) kag sang laye sa gyera.

Dugang ini sa madinuguon nga rekord sang AFP-PNP sa ila brutal nga gyera batok sa pumuluyo nga nakasandig sa kontra-insurhensiya nga programa mismo sang US.

Nagakaigo nga manabat kag silotan ang US, si Marcos Jr, ang idu-buang nga AFP-Philippine national Police (PNP) kag ila mga espiya sa mga krimen sa gyera kag sa pumuluyo.

Halin sa 1980’s tubtub subong

Si Ka Wanny, nabun-ag sadtong Nobyembre 20, 1970 sa Barangay Menchaca, Calatrava, Negros Occidental. Naghalin siya sa sahi nga mangunguma. Nagsaylo ang iya pamilya sa Barangay Camindangan, Sipalay City, Negros Occidental.

Ang iya pamilya impluwensyado sa rebolusyonaryo nga kahublagan sadtong 1980s. Sang pamatan-on pa, nangin katapo siya sa Kabataang Makabayan. Nangin katapo na siya sa NPA sadto pang 1990s.

Sa malawig niya nga pagserbisyo sa masa kag sa rebolusyonaryo nga kahublagan, nagakaangay nga kuhaan sang inspirasyon ang iya nga panindugan. Ginakaugtan man niya ang mga nagtraydor sa rebolusyon apang naintindihan niya nga amo pa ina ang nalab-ot sang ila kamuklatan. Nagtungod siya bilang food and logistics officer (FLO) sa yunit kag team leader.

Palakadlaw man siya kag mahilig sa pagluto. “Ginatinguhaan ko gid na nga masunod ang iya pagluto sang suman apang mas ginakuhaan ko gid sang inspirasyon ang iya panindugan sa rebolusyon. Hangkat ina sa aton nga mga kaupod,” suno sa isa ka kaupod.

Hustisya para kay Ka Wanny!