Gintigayon sang mga Pulang hangaway sang Romeo Nanta Command-New People’s Army (RNC-NPA) ang silot kamatayon sa rapist kag lokal nga aset sang 94th IB nga si Jomy Pelarta sadtong Nobyembre 6, alas 7:00 sang gab-i, sa Sityo Sig-ang, Barangay Carabalan, Himamaylan City, Negros Occidental. Ginpapanaugan sang silot kamatayon si Pelarta sa korte sang pumuluyo bangud sa mabug-at nga mga kaso nga napamatud-an nga iya ginkomiter matapos ang id-id nga imbestigasyon.

Responsable si Pelarta sa pagpa-raid sa mga kaupod sadtong 2003 sang nagkampo ang mga Pulang hangaway lapit sa iya lugar. Liwat niya ini nga ginhimo sadtong Oktubre 6, 2022 nga nagtuga sang engkwentro sa tunga sang 94th IB kag mga NPA sa sina nga adlaw.

Dugang diri, imbolbado siya sa pagkapatay sang anay tagpamaba sa Apolinario Gatmaitan Command (AGC-NPA), Negros Island Regional Command nga si Ka Romeo Nanta ukon mas kilala nga si Ka Juanito Magbanua. Matapos ang nasambit nga engkwentro, si Pelarta mismo ang nag-giya sa amo gihapon nga tropa militar pakadto sa gintineran ni Ka Juaning kon diin ini nag-medical leave, kabaylo sang kwarta kag motor nga ginpromisa sang kaaway sa iya.

Magluwas sini, may ara man siya duha ka kaso sang rape nga may duha ka biktima kag ang isa sini isa man ka ‘Person with Disabilities’ ukon PWD. Dugang pa gid ang ‘attempted rape nga iya ginhimo sa isa ka kaupod samtang ara ini sa medical leave.

Ang pagpatuman sang desisyon sa korte sang pumuluyo, nagapakita sang sinsero kag seryoso nga pagtungod sang hilikuton sang RNC-NPA isip matuod nga soldado sang pumuluyo nga nagapangapin sang ila interes. Manipestasyon ini sa lubos nga pagkundenar sang RNC-NPA sa bisan ano nga porma sang pagpahimulos sang mga kababainhan kag nagaserbe man ini nga pangandam sa tanan nga mga malain nga elemento kag mga kontra-rebolusyonaryo nga may utang nga dugo kag boluntaryong nagapagamit sang mga kaaway.