Ginkalipay sang mga pumuluyo sang Sityo Palasan kag Sityo Ban-ban Uno, tanan sang Barangay Guba, Vallehermoso, Negros Oriental ang pagpatuman sang Leonardo Panaligan Command- New People’s Army (LPC-NPA) sang silot-kamatayon kay Ronel Fuentes, 33 anyos sadtong Enero 22, 2024 ala 1:30 sang hapon.

Pursigido nga ginpatuman sang yunit sang LPC-NPA ang mando sang rebolusyonaryong korte sang pumuluyo agud hatagan hustisya ang mga biktima kag malikawan ang iban pa nga gusto biktimahon ni Fuentes.

Gross counts of incest-rape, child abuse and violence against women ang kaso nga ginpamatbat sang Rebolusyonaryong Korte sang Pumuluyo kay Ronel Fuentes sadtong Oktubre 2023 matapos nga napamatud-an sang korte nga iya ginkomiter ang pagpanghimulos/pagpanglugos sa kaugalingon sini nga kadugo.

Si Fuentes ang naghimulos kag nagkonsumo sa iya duha ka utod nga babaye sadtong tuig 2009. Samtang isa pa ka utod ni Ronel ang tuyo man sini nga himuslan.

Onse anyos pa lang ang isa ka utod sang ginkastigo antis ginhimuslan siya ni Fuentes sang makapila ka beses sa sulod lamang sang duha ka semana. Ang ikaduha nga utod , nga isa ka person with disability (PWD) (isa ka “apa”) ang ginlugos man ni Fuentes sa pila man ka beses diin nagresulta sang depresyon sa biktima tubtob nga nag-utas nalang ini sang iya kaugalingon nga kabuhi.

Masami nga ginapahug ni Fuentes ang ikatatlo ka utod nga patyon kon manugid matapos nga makighilawas sa iya. Sirkumstansya lang nga nakapalagyo ang biktima rason nga wala matigayon ang maitom nga handum ni Fuentes. Samtang masami naman nga ginakastigo ni Fuentes ang iya kaugalingon nga asawa sa tion nga may mga alawayon sila nga mag-asawa.

Ginapasalamatan gid sang LPC-NPA ang padayon nga suporta kag wala paghubas nga pagsalig sang mga pumuluyo sa rebolusyonaryong kahublagan ilabe na sa Communist Party of the Philippines (CPP)-NPA sa pagpaluntad sang matuod nga kalinong kag katawhay sa lugar.

Ginapanawagan sang LPC-NPA nga indi gid pagsundon ang binaboy nga gawi ni Ronel Fuentes. Samtang ang CPP-NPA ang may hugot nga angot sa malapad nga masa, indi ini malimdan sa mga kontra-pumuluyo nga mga kalakasan sang mga kontra-rebolusyon kag malain nga mga elemento sa sakop sang larangan gerilya. Ang NPA magahatag sang nagakaigo nga hustisya sa mga biktima batok sa mga mapamatud-an nga kriminal sandig sa kabug-aton sang kaso nga nakomiter.###