Ginpatuman sang isa ka tim sang Armando Sumayang, Jr. Command-New People’s Army (ASJC-NPA) Southwest Negros Guerrilla Front ang desisyon sang Rebolusyonaryo nga Korte sang Pumuluyo sa kay John Paul Sola sadtong Nobyembre 17, 2019 alas 5:00 sang hapon sa Purok Sta. Isabel, Barangay Camansi, Kabankalan City.

Si John Paul Sola halin sa pamilya Sola nga isa ka despotiko agalon mayduta sa sur nga bahin sang Negros. Apo man siya sang anay Mayor sang Kabankalan City nga si Pablo Sola nga napatay man sa ambush sadtong May 1982. Ang pamilya Sola may rekord sang pagpang-agaw duta, pagpamahug kag pagpaniplang sa mga pumuluyo. Gingamit ang pagka-agalon mayduta, ginsabwag ang indi makatarunganon kag kontra-pumuluyo nga binuhatan. Bangud sa personal nga interes nahimo ang pagpamatay nga ang biktima mga imol nga mangunguma.

Natapos na ang madugay nga pag-antus sang pumuluyo sa Sityo Lumbia, Brgy. Camansi kag kaiping nga mga sityo sa sakop sang Barangay Tampalon, Kabankalan City bunga sang pagkadespotiko ni John Paul Sola.

Madugay na nga ginademanda sang pumuluyo nga hatagan hustisya ang grabe nga pagpamintas sa ila kag nangin basehan sang rebolusyonaryo nga korte sa pagdesisyon. Ini amo ang mga masunod:

1. Pagpang-agaw sang duta sa sakop sang Sityo Lumbia sang Barangay Camansi; pila ka bahin sang Barangay Tampalon; sakop sang Sityo Basak kag Danlogon sang Barangay Tan-awan; Sityo Mansawin, Nabalikan, Pitgong, Sabra kag Bunyuron sang Barangay Oringao; kag iban pa nga bahin sang Kabankalan City sa katuyuan nga tamnan sang kahoy nga pang-export nga ginagamit sa pag-ubra sang goma. Pagpang-angkon sang duta nga iya sang mga pamilya sang mamumugon sang katubhan.

2. Ginpapriso ang pamilya Francisco kag Gatillas sa malawig nga panahon. May ginpapriso nga lima ka myembro (ang amay kag ang 4 ka bata) sa isa ka pamilya nga nagtuga sang daku nga perwisyo sa pamilya sang mga biktima.

3. Pagtiro sang isa ka mangunguma sa sakop sang Barangay Tampalon nga nagtapas sang kahoy sa iya nga uma nga gina-angkon ni John Paul Sola.

4. Paghupot sang goons kag mga RPA nga amo ang ginagamit sa pagpalupok sang armas-luthang, pagharas kag pagpamahog sa mga tawo para maghalin sa duta nga gina-angkon niya nga iya kag nagtuga sang grabe nga kakugmat sa pumuluyo.

5. Ang mga mangunguma nga nagapalapit sa iya compound nga nagapanguha sang kahoy-panggatong ginaharas kag ginapalukpan sang iya mga goons.

6. Sadtong 2014 may pagstraffing sa mga mangunguma nga nagadagyawanay sa Sityo Lumbia nga nag-igo sa isa ka pamatan-on sa dalunggan.

Bangud sang iya nga kapintas kag malain nga binuhatan, ginkilala si John Paul Sola nga kontra-pumuluyo bisan sang iya nga pamilya kag amo man ang kasubong niya nga sahi.

Ang rebolusyonaryo nga hublag nagapatuman sang matuod nga hustisya base sa ginasunod nga proseso sang pag-usisa kag counter-checking sa mga ginasampa nga kaso sang mga biktima kag mga saksi. Gani, paandam sa mga may kasubong nga kaso nga ang paghupot sang goons indi kaseguruhan sa pagprotehir sa kontra-pumuluyo nga interes. Ginapanawagan sang ASJC-NPA ang pagbag-o sang mga despotiko agalon mayduta kag ila pag-untat sa kontra-pumuluyo nga buhat – ang pagwasak sang pangabuhian sang pumuluyo kag pagpamatay.

Ipatuman ang matuod nga hustisya!
Ipatuman ang matuod nga reporma sa duta!

Reference:
Andrea Guerrero
ASJC-NPA Spokesperson
Southwest Negros Guerrilla Front