Makatarunganon ang rebolusyonaryong korte nga ginapatuman sang rebolusyonaryong pwersa nga ginapangunahan sang Partido Komunista sang Pilipinas bangud wala sang iban nga dangpan ang mga pumuluyo sa mga inhustisya nga ginapaluntad sang reaksyunaryong gobyerno.

Ang Makabayang Kilusan ng Bagong Kababaihan (MAKIBAKA)-Negros lubos nga nagapati kag nagasuporta sa proseso nga ginapatuman sang rebolusyonaryong korte bangud ini ang nagaagi sa obhetibo nga mga basehan kag ma-id-id nga pagpaniyasat. 

Wala sang iban nga ginaserbihan ang korte sang reaksyunaryong gobyerno kon indi ang mga nagaharing sahi. Sa kamatuoran, malawig na nga indi patas ang gobyerno sang Pilipinas sa paghatag sang hustisya sang mga pumuluyong ginapigos kag ginahimuslan. Madugay nga malab-ot, kag sa kasagaran indi malab-ot, ang hustisya nga ginasinggitan sang mga pumuluyo ilabi na ang mga biktima sang paglapas sang tawhanon nga kinamatarung nga ginhimo sang armadong pwersa sang reaksyonaryong gubyerno.

Sa idalom sang macho-pyudal kag pasista nga sistema sang pungsod, bulnerable katama ang seguridad sang mga kababainhan. Kon sa diin manubo ang paglantaw sa mga kababainhan, nanari-sari ang mga inhustisya ang nagaka-ekperyensyahan nila. Halin sa pagpang-abuso sa sulod sang panimalay, pakadto sa nagkalain-lain nga porma sang pagpanghimulos nga maagum nila sa tagsa ka mga ulubrahan, bisan pa sa publiko bangud kapabayaan sang reaksyunaryong gobyerno nga hilway ang mga abusador.

Ang pagpadangat sang mga kababainhan sang ila eksperyensa sa mga nanari-sari nga bayolasyon, ilabi na sa sexual harassment, ang masami ginabalik pa ang pagbasul sa ila. Imbis nga mahatagan sang hustisya ang mga biktima, mas nagakadulaan sang pagsalig ang mga kababainhan nga magpadangat sang ila reklamo sa mga ahensya ilabi na sa korte sang Pilipinas. Nahimo nga kwestyunable ang kredibilidad sang korte sang Pilipinas para mahatagan sang matuod-tuod nga hustisya ang sektor sang kababainhan kag pumuluyo. 

Samtang padayon nga nagaserbe ang reaksyunaryong gobyerno sa interes sang mga nagaharing sahi, wala sang iban nga madangatan ang mga pumuluyo kon indi ang rebolusyonaryong korte.

Samtang padayon nga ginapintasan kag ginalupig sang armadong pwersa sang estado ang mga pumuluyo, labi nga kilalanon sang masa ang rebolusyonaryong korte. Padayon nga magaserbisyo ang rebolusyonaryong korte sang pumuluyo samtang nagaluntad ang pagpamigos kag inhustisya sa pungsod.