Sa una nga anibersaryo san ekstrahudisyal nga pagpatay san pasista nga AFP sa parag-uma nga si Ryan Arnesto, padayon nga gin-guguliat san masa nga parag-uma an hustisya kadungan an saad nga magkasarayo ngan atuhan an pasista nga terorismo san estado.

Sayo katuig na an inagi kundi waray pa gihapon napapagbaton sa pagdakop, pagpapakuri ngan waray kaluoy nga pagpatay san 74th “Unbeatable sa Pagtalapas sa Tawhanon nga Katungod” Infantry Battalion kan Arnesto sa Sityo Canonghan, Barangay Osmeña, Palapag. Ginkastigo siya san mga pasista nga tropa ngan gintudis-tudis an iya kahimo, braso ngan siki. Igin-gapos siya sa puno san lubi ngan ginposil. Waray pa makuntento, gindanas an iya patay nga lawas tubtub sa kaluyo nga barangay.

Antes patayon maiha na nga piniritay nga ginpapasurender san 74th IB ngan NTF-Elcac an pamilya ni Arnesto. Nahiuna na liwat nga ginhimo nga hostage an iya mga paryente agud pasurenderon sira bisan kun waray man kaso kontra sa ira. Ginpatay san 74th IB si Arnesto sa pinakamakarimadima nga pamaagi agud magserbe nga pahimatngon sa iba nga target san pagpapasurender, nga sugad liwat an matatabo sa ira kun diri umalagad sa karuyagon san mga pasista. An ginhihinambog san militar ngan NTF-Elcac nga ihap san mga “napasurender” resulta san dirudiretso nga pananarhug, panguwat, ngan panmatay sa mga parag-uma sugad kan Arnesto.

Waray pagluya lugod mas naggrabe an diri deklarado nga balaud militar sa kabaryuhan san Palapag ngan bug-os nga Northern Samar. Nagluya na kuno an rebolusyunaryo nga kagiusan kundi padayon an pagkakampo ngan paghahamlet sa mga komunidad. Gintatarhug ngan ginpapatay pa gihapon an mga parag-uma. Diri sira talwas nga makapanrabaho sa uma ngan mas naluludlod sira sa kakurian. Klarado pa sa sirak san sudang: buwa an kamurayawan san militar ngan NTF-Elcac. Nakikisarayo kami sa natikakusog nga panawagan nga bungkagon an NTF-Elcac, nga waray iba nga tuyo kundi puypuyon an katawhan.

Diri mahingangalimtan san masa nga parag-uma si Arnesto. Hasta sa iya kamatayon waray siya pagyukbo sa pasista nga 74th IB. Gintalapas niya an ira karuyagon nga igtraydor an igkasi niya parag-uma, mabuhag an ira pagkasarayo, padayon nga tamas-tamasan an ira mga katungod ngan magpabilin an ira kakablasan. Nanindugan siya para sa ira katungod nga mabuhi sin murayaw ngan abunda, diin natatagamtaman nira an bunga san ira paningkamot. Susbaranan ngan kaangayan nga pasidunggan an mga sugad sa iya.

Yana nga adlaw, aton pasidunggan si Arnesto ngan an ngatanan nga mabayanihon nga parag-uma nga padayon nga ginpapakyas an pasista nga terorismo san estado. An natikagrabe nga kakurian ngan kamadarahug nga ginkakaatubang san mga parag-uma mas nagduduso sa aton nga mapukaw sa aton kahimtang, magkasarayo ngan umato. Diri sadang nga humuyo la ngan antuson an pagtamay sa aton; diri maglulugaring nga gumikan an militar nga namemeste sa aton umhanan. Hasugon naton an dalan san demokratiko nga rebolusyon san katawhan, an kabatunan sa aton guliat para sa hustisya ngan amo an matangpos sa gatos-katuig naton nga pagkauripon!

Hustisya para kan Ryan Arnesto! Hustisya para sa ngatanan nga biktima san pasista nga AFP!

Mga parag-uma, magkasarayo, ayaw kahadlok! Umapi sa gerra san katawhan, atuhan an pasista nga terorismo san estado!