Mabaskog nga ginakondenar sang Leonardo Panaligan Command-New People’s Army (LPC-NPA) ang wala huya kag wala sang kabulusgan nga pagpangilkil kag pagpamahug sang mga sindikato kag kriminal nga grupo sa mga katapo sang media kag barangay officials sa syudad sang Bacolod kag sa bug-os nga isla.

Madumduman sang nagligad nga adlaw, gintawgan sang nagpakilala “Ka JV Regalado-CPP/NPA spokesperson” si Radyoman Donard Alimpolo, isa ka anchorman sang Patrol 747 daily radio program sang DYHB-Bacolod, subongman barangay kagawad sang Barangay Alangilan, Bacolod City agud magpangayo sang bulig. Sang gin-akomodar sang biktima paagi sa phone conversation, nagpasalig pa ini nga himuon nga barangay kapitan ang biktima sang Brgy Alangilan. Bangud iya gina-usisa sang biktima ang lokasyon sa nagpakilala nga “Ka JV”, ginhabuyan na ini sang indi maayo nga istorya kaangay sang “damo pa ka sat-sat” kag “mangayo ka man gihapon bulig sa amon sa ulihi.”

Ang ini nga kinaiya kag gawi, ang desperado kag wala man kinalis sa mga mersenaryo, korap kag pasistang Armed Forces of the Philippines (AFP) kag Philippine National Police (PNP) kag mga galamay sini nga mga grupong sindikato-kriminal. Indi na bag-o kundi daan na nga modus-operandi nga ginagamit sang pasistang makinaryas sang mapintas nga estado sang rehimeng US-Marcos Jr nga AFP-PNP kag paramilitar ang ngalan sang NPA sa ila mga kalakasan kaangay sang pagpangilkil kag iban pa nga kriminalidad para musingan ang Communist Party of the Philippines (CPP)-NPA kag bug-os nga rebolusyonaryong kahublagan.

Hugot kag lig-on nga gina-uyatan sang NPA ang mga sandigan nga prinsipyo, disiplina kag mga punto sa tagsa ka paghulag sa absoluto nga giya sang Marxismo-Leninismo-Maoismo sa CPP. Ang NPA, ang lubos gid naga-alagad sa masa ilabe na sa sahing ginahimuslan kag ginapigos. Wala nagapangtuy-tuya kag labaw sa tanan wala man sa bokabularyo sang NPA ang pagpangilkil kag pagpamahug. Respetado, organisado kag mahinalungon sa paghambal” ang tatak kag pagkilala sang masa sa ila nga Bag-ong Hukbo sang Banwa. Ginapahamtang sa kolektibo nga balayon kag rebolusyonaryong proseso ang tanan desisyon sa pagpatuman.

Hublasan ang sistematiko nga pagpatalang kag kabutigan sang AFP, PNP kag NTF-Elcac upod sa inutil, tuta kag korap nga rehimeng US-Marcos II!