Ang wala-kaluoy nga atake sang pasista nga mga tropa sang 94th IB nadugangan na man sa ulihi nga semana sang Enero hasta sa unang semana sa Pebrero sa sini nga tuig. Gingamit sang Armed Forces of the Philippines (AFP) ang panahon sang pagpangampanya para sa eleksyon agud makapanghalit sa masang mangunguma kag tumandok sa bukiran nga bahin sa syudad sang Kabankalan kag Himamaylan, Negros Occidental. Kadungan ini sa ila operasyon militar sa mga barangay sang Carabalan, Buenavista, kag Mahalang sa Himamaylan City kag mga barangay sang Tan-awan, Carol-an, Orong, Oringao sa Kabankalan City sa ini man nga panahon kag tubtob subong.

Enero 30. Ginpahug kag ginbira ang isa ka menor-de-edad sa Sityo Amaga, Barangay Buenavista, Himamaylan City sa mga naga-operasyon nga tropa sang 94th IB. Wala ini nakadungog sa pagpanawag sa nasambit nga militar samtang nagapanglawig sang baka, bangud may problema sa pandungog.

Enero 31. Ginkastigo si Junior Batomalaque sa iya nga panimalay sa Sityo Danlugon, Barangay Tan-awan, Kabankalan City, bangud sa pasibangud nga siya isa ka ‘NPA supporter’. Sa kagrabe sa epekto sang pagpangastigo, na-ospital si Batomalaque bangud sa kabudlayan na sa pagpangihi. Pagkatapos sa pagpangastigo, ang iya anak gintiunan man sang pusil sang pasista nga militar.

Pebrero 2. Ginpahug kag ginkastigo si Piero Ariola sa Sityo Cabagal, Barangay Buenavista, Himamaylan City para paakuon nga nakakita ini sang NPA. Ginsulod man ang balay ni Virgilio Balasabas sa amo man nga lugar kag pilit nga ginkuha sa 94th IB ang iya anak nga si AJ. Hasta subong wala pa nahibal-an kon diin gindala si AJ.

Sa amo man nga adlaw, ginhold man sang nasambit nga militar si Johnny Camanso sa amo man nga sityo hasta alas 2:00 sang kaagahon bangud ginapilit nga pasugiron kon diin ang NPA.

Ginmaksimisa sang AFP ang mga surenderi nga traydor sa rebolusyon kag amo ang gipanghimo nga ido-ido nga nagapanghalit sa mga mangunguma. Ini ila taktika para mapilit ang mga surenderi nga makahimo sang sala sang rebolusyon kag indi na makabalik sa armadong paghimakas, para padayon nila nga himuon nga ulipon sa ila mga operasyon.

Pat-ud lang ang mga asud-asud nga krimen sang 94th IB nga ang deklarasyon sang 3rd ID nga “wala na sang NPA nga magasinabad sa eleksyon” nagaako lang nga mismo ang tropa sang reaksyunaryong gobyerno ang nagapanghalit kag nagatuga sang kagamo sang mga komunidad. Ang matuod nga terorista amo ang AFP.

Ginapanawagan ang mga grupo kag tagpangapin sang tawhanon nga kinamatarung, mga tawong simbahan, media, abogado, pulitiko kag iban pa nga mga peace-loving nga organisasyon kag indibidwal nga kundenahon ang mga krimen sang 94th IB batok sa pumuluyo, nga nagapakita lang nga ang AFP amo ang matuod nga nagapangatake sang mga inosenteng sibilyan.