Sa Bukidnon, sa milabay’ng barangay election talamak ang pinalitay sa buto. Propaganda lamang ang giingong “no vote buying” sa commission on election.

Subay sa monitor sa New People’s Army sa tibuok probinsya walay bisan usa ka baryo nga wala nagpahigayon og pinalitay sa buto.

Tungod kay ang barangay eleksyon, gigamhan sa mga dagkong politiko ug mga negosyante nga adunay dagkong interes sa ekonomikanhong bahandi sa probinsya.

Mihatag og pundo ang nagkadaiyang pundok sa politiko aron masiguro ang kadaugan sa ilang mga “manok” sa barangay level ug aron andamon ang ilang tagsa-tagsa ka mga makinarya karong umaabot nga midterm ug national eleksyon.

Busa minilyon ang ginahatag nga pundo sa matag barangay.

Gani, mokabat sa ₱700 ngadto sa ₱1,000 ang palit sa matag botante bugti sa buto sa kandidatong kapitan.

Ilang gisuportahan bisan ang mga notoryos nga kriminal sama sa pamilyang Delamance sa Cabanglasan kung asa tulo ka barangay ang padayong gikontrola nga mao ang Freedom, Dalacutan ug Silae. Bisan paman sa nagtapun-og nilang krimen sa katawhan sama sa pagpangulata, pagpangilog og yuta ug pagpamatay sa mga taong mosupak kanila.

Sa San Fernando, walay gihimong aksyon ang kapulisan ug sundalo sa gihimong pagpangsabwag og kalisang ni Nonong Salusad. Kung asa pugos siyang nangayo og ₱200,000 sa mga nidagan og kapitan didto sa Kibungkog, Palakpakan, Dao, Iglugsad, ug Bulalang.

Didto sa Kibungkog, gihold-up pa niya ang ₱750,000 nga kwarta sa duha ka kandidatong kapitan nga kalaban sa iyang gisuportahan. Wala pa siya nakontento bisan napildi na gipakulata pa niya kini.

Sa maong eleksyon, kasagaran wala midaog ang adunay kakayahan nga mangulo ug nasulayan na sa maayong serbisyo pinaagi sa pagduso sa interes sa katawhan tungod lamang kay wala silay kwarta.

Ang demokrasya sa pagpili sa katawhan sa mga pulitikong ilang maduolan ug moalagad kanila nahikawan tungod sa impluwensya sa kulturang korapsyon.

May kaso sa Quezon, Bukidnon nga ang mga tao mismo ni Mayor Pablo M. Lorenzo III ang deriktang nanginlabot og nangdaot sa mga mikandidatong aktibista aron hikawan sa buto ug dili padaugon sa eleksyon sa kahadlok nga mobalik og kusog ang kalihukang masa.

Dugang pa, naningkamot ang NTF-Elcac nga kuhaon ang simpatiya sa katawhan sa eleksyon. Gipadagan nila mismo ang mga traydor ug uban pang mga surenderi sama nilang Armando Dalunyag sa Malaybalay City, Chares Bitago ug Maykel Antihao sa Valencia City. Apan silang tanan napakyas.

Sa kasamtangan makita mismo nga ang mga nagdaog kasagaran mga dagko og yuta, negosyante, mga tig-pautang, protektado sa AFP ug PNP ug nakasandig sa pader sa mga politiko sa probinsya.

Ilalom sa sistemang burukrata-kapitalismo, tin-aw nga walay makab-ot nga kalinaw ug kalambuan ang katawhan tungod magpabiling ang molingkod sa gahum bisan sa barangay kanunay interes sa kaugalingon ang prayuridad.

Siguradong magpabilin ang kalisud sa katawhan labina ang mga mag-uuma, padayong ipihig ang mga lumad sa kabukiran, barato ang sweldo ug walay kasiguruhan sa trabaho ang mga mamumuo, ug walay libreng edukasyon ang kabatan-onang estudyante.

Busa, ang baruganan sa tibuok rebolusyonaryong pwersa:

Rebolusyon ang ultimong sulbad ug dili ang pekeng eleksyon. Tungod bisan pag makapila ka beses ipahigayon ang maong piniliay, magpabiling dunot ang sistema sa gobyerno.

Kanunay nga anaa sa hustong pagpangulo ang Partido Komunista sa Pilipinas ug anaa sa posisyon ang NPA alang sa pagdipensa sa katawhan batok sa mga madaugdaogon ug mapahimuslanon nga hut-ong.

Ibagsak ang Burukrata-kapitalismo!

Iasdang ang Demokratikong Rebolusyon sa Katawhan!