Iligal nga gin-aresto sang mga katapo sang 94th Infantry Battalion si Dado Sanchez sadtong Enero 14, sa Sityo Palosais, Barangay Mahalang, Himamaylan City, Negros Occidental. Suno pa sa iya mga kaingod, nagkadto ang biktima sa iya ulingan kag wala na ini nakabalik. Si Sanchez ginpilit sang mga pasistang militar nga mag-giya sa ila operasyon sa mga sityo sang Barangay Mahalang.

Pilit man nga gindakop sang nasambit nga militar si Aira Gonzales kag Alfred Hilado sa Sityo Nahulop, Barangay San Antonio, Himamaylan City sadtong Enero 15. Si Hilado kag ang bana ni Aira nga si Joseph Gonzales, upod sa isa ka kaingod nila, ginkastigo man sang mga soldado samtang gintamnan sang .45 caliber nga armas, command-detonated explosive, kag mga rebolusyonaryong dokumento si Gonzales.

Antes ang panghitabo, si Gonzales naga-internal bleeding bangud sa iya sakit. Tubtob subong, wala pa nahibal-an sa mga kaingod kon diin na ang duha ka biktima.

Sa amo man nga adlaw, iligal man nga ginpangkuha ang mga cellphone sang mga pumuluyo sa Sityo Nahulop. Ginpahug sila kag ginpasibangdan nga may angot sa NPA.

Lubos nga ginakundenar sang RNC-NPA ang pagpanghalit sa 94th IB upod ang pila ka mga traydor sa rebolusyon, nga ginatarget ang mga sibilyan nga wala sang ikasarang nga magdepensa. Maathag ini nga paglapas sang Comprehensive Agreement on Respect for Human Rights and International Humanitarian Law (CARHRIHL).