Pagkahuman sa serye sa pagpanglapas sa tawhanong katungod sa South Central Negros, subling nilihok ang 62nd Infantry Battalion (IB) aron tugbangan ang pasismong gipakuyanap sa tropang militar sa mga syudad sa Himamaylan ug Kabankalan, Negros Ocicdental.

Pinkabag-o nga krimen sa 62nd IB ug sa lokal nga pagdumala ni Josy Limkaichong ang pagpatay sa usa ka mangunguma nga taga Sityo Mabato, Barangay Tala-on, La Libertad, Negros Oriental niadtong milaby’ng adlaw, Pebrero 10, alas-7:00 sa gabii. Giila ang biktima nga si Rogelio “Gamatoy” Tanillo, mga kwarentahon ang edad, ug minyo. Gipagawas sa mga militar nga engkwentro tali sa mga sakop sa New People’s Army (NPA) ug militar ang pagpatay kaniya. Dugang niini, paturagas nga nagpaulan og bala ang mga militar sa komunidad, nga nagtanom og kahadlok ug troma ngadto sa mga residente.

Nahitabo ang pagpatay kaniya human ang pagsunog sa mga kagamitang konstruksyon sa pamilyang Limkaichong sa maong lungsod. Dakong posibilidad nga ang maong pamilya ang nagpaluyo sa brutal nga krimen tungod makita man nga kusog ang kupot niini sa armadong pwersa sa estado. Gani, dili sekreto sa mga lumulupyo nga kini sila mga despotikong politiko nga nagahatag og bayad sa mga mersenaryong Armed Forces of the Philippines (AFP) kabaylo sa ilang serbisyo.

Sumala pa sa Leonardo Panaligan Command-(LPC-NPA), nagpamatuod lang ang maong insidente nga ang reaksyonaryong gobyerno ug ang iyang pasistang makinarya, ang AFP ug Philippine National Police (PNP), naglunsar og hugaw nga gyera batok sa rebolusyonaryong pwersa. Pipila na ka higayon nga mga sibilyan ang ilang ginabalikan tungod dili man sila makaigo sa mga yunit sa NPA.

Dugang niini, nataho usab ang iligal nga pag-aresto niadtong Enero 31 sa hapon, sa Sityo Taluto, Barangay Linantuyan, Guihulngan City, Negros Oriental. Gidakop nga walay igong basehanan ug wala nag-agi sa insaktong proseso ang mangunguma nga si Naring Remasog, 70 ang edad, samtang naa siya sa ilang balay. Hangtod karon, wala pa nahibal-an kung asa gidala si Remasog ug unsa ang iyang mga nasinating pagpamig-ot sa kamot sa mga militar.

Sa pikas bahin, iligal usab nga gidakop si Bobet Carillo, 38 anyos, minyo, ug adunay dos anyos nga anak, sa Sityo Mamhot, Barangay Santol, Binalbagan, Negros Occidental niadtong Enero 29. Gidakop siya sulod sa kaugalingon panimalay ug gidala sa Barangay Kansalungon, Isabela, Negros Occidental pagka alas-10:00 sa buntag. Samtang gipugos ang iyang asawa ug anak nga kubkubon ang yuta ilalom sa ilang balay kay kuno adunay gitaguan si Carillo nga armas didto. Apan, walay nakita nga armas sa maong lugar.

Si Carillo, kanhing NPA nga nagpahuway na niadtong 2022 pa. Bisan pa man nga dili na aktibo si Carillo sa kalihukan, gidaginot sa mga AFP ang pagdakop ug pagpasurender sa iya aron ingnon nga epektibo pa gihapon ang ilang mga programang gihimong gatasan sa kwarta sama sa E-CLIP ug Amnesty Program. Sa pagkakaron, pugos siyang gihimong giya sa operasyong militar sa mga barangay sa Santol ug Amontay, sakop sa Binalbagan ug sa mga barangay sa Talaon ug Aya sa La Libertad.

Kusganong gikondenar sa LPC-NPA ang sunod-sunod nga krimen nga gikomiter sa 62nd IB sa Central Negros. Ang mga walay kaluoy nga binuhatan niining mga pasista ug binayrang militar maoy dugang mosugnod sa kalayo sa kayugot sa katawhan ug mangita og hustisya sa ilang nahiaguman kadungan sa pagbarug alang sa ilang mga batakang katungod nga mabuhi nga malinawon.

Gipanawagan usab sa LPC-NPA ang mga organisasyon nga nagtuboy sa tawhanong katungod lakip ang mga tawong simbahan ug mga peace-loving people nga ma-imbestigahan ang mga krimen sa 62nd IB batok sa mga lumulupyo niining mga lugara.

Sa pikas bahin, mas dugang napamatud-an sa katawhan ang pagkamakatarunganon sa paglunsad og armadong rebolusyon nga gisulong sa NPA tungod kay kini lamang ang bugtong nga nagdala sa ilang interes ug naghatag og tinuod nga hustisya ug kagawasan para sa tanang mga gipahimuslan ug linupigang hut-ong sa katilingban.