Dili moubos sa disi-otso (18) ka kaswalti ang nahiagoman sa mga pwersa sa AFP ug PNP atol sa ilang gipahigayon nga dungan-dungan nga mga kombat operisyon sa upat (4) ka probinsya sa Caraga batok sa  Bagong Hukbong Bayan-North Eastern Mindanao Region (BHB-NEMR) ug katawhan sulod sa bulan sa Enero 2020. Bunga kini sa kusganong pagsukol sa mga Pulang manggugubat sa BHB  sa rehiyon nga milunsad sa dili momenos sa walo (8) ka aksyong militar  batok sa nanulong nga mga pasistang tropa sa kaaway.

Surigao del Norte

Gigaquit –  Niadtong Enero 12 sa alas 10 sa buntag giharas sa usa ka grupo sa BHB-Surigao del Norte (SdN)  ang mga pwersa sa 30^th IB ug SAF nga nag-operisyon sa Brgy. Camam-onan. Usa (1) ang klarong nasamdan sa panig sa kaaway.

Pagka-Enero 13, alas 10:30 sa buntag sa samang barangay, naunhan sa pagtira sa mga Pulang manggugubat ang kaaway nga Special Action Forces (SAF) nga ilang na-enkwentro. Sumala sa impormasyon nga gikan ra usab sa kaaway, usa (1) ang ilang patay ug duha (2) ang samaron.

Sa samang adlaw, sa may ala 1 sa hapon, napabuthan og command detonated explosive (CDX) sa BHB-SdN ang niatake nga mga tropa sa 30^th IB sa Brgy. Lahi. Gisundan kini sa pinusilay nga nikabat sa 30 minutos. Matod sa mga nakakita, tulo (3) ang patay ug usa (1) ang samaron sa kaaway. Usa sa kaswalti mao si Pfc. Dano.  Dayon pinataka nga nagbuhi og tulo (3) ka bala sa kanyon ang kaaway gikan sa Brgy. Siko-siko. Luwas usab nga nakawidro ang mga Pulang manggugubat.

Claver – Enero 17, alas 9:45 sa gabii, sa Brgy. Ladgaron, gipamusil ug gipabuthan og CDX sa usa ka grupo sa BHB-SdN ang nag-convoy nga upat (4) ka sakyanan nga gikargahan sa nanguli na nga mga tropa sa 30^th IB, SAF ug PPSC. Sumala sa impormasyong nakuha, pinakamenos duha (2) ang patay  ug usa (1) ang samaron sa kaaway nga si Pfc. Patrick Manlapas.

Agusan del Norte

Kitcharao – Niadtong Enero 16 sa alas 5 sa hapon nasangka sa usa ka grupo sa BHB-Agusan del Norte (AdN) sulod sa 30 minutos  ang mga pwersa sa  29^th IB sa Brgy. San Isidro. Matod sa mga nakakita nga mga tawo, usa (1) ang patay ug duha (2) ang samaron sa kaaway nga gipagawas didto sa baryo nianang gabie sa Enero 17.  Sa kadesperado sa AFP nagpataka kini sa pagpabuto sa lima (5) ka bala sa kanyon gikan sa Brgy. Bangonay, lungsod sa Jabonga, sa maong probinsya.

Butuan City – Niadtong Enero 18 naharas sa BHB-AdN ang nag-operisyon nga tropa sa AFP sa Brgy. Anticala. Gikompirma mismo ni Brig. General Licudine sa 402^nd Infantry Brigade nga duha (2) ang kaswalti sa 29^th IB.

Surigao del Sur

San Agustin – Niadtong Enero 20 gipamusil sa usa ka grupo sa BHB-Surigao del Sur (SS) ang nagtapok nga mga pwersa sa 3^rd SFB nga nag-operisyon sa Brgy. Buhisan. Wala matino kun pila ang kaswalti sa kaaway.

Marihatag – Enero 28, Brgy. San Isidro, giambus sa BHB-SDS ang mga pwersa sa 7^thSFcoy sa 3^rd SFB nga nagsakay og mga motor padulong sa ilang kampo. Patay ang usa (1) ka regular nga sundalo ug usa (1) ka membro sa CAFGU. Nasakmit sa maong aksyon ang duha (2) ka .45 kalibreng pistola, usa (1) ka Harris radio ug ubang kahimanang militar.

Sa tanang panagsangka nga nahisgutan sa ibabaw, pulos luwas nga nakaatras ang mga Pulang manggugubat.

Dugang pa, nagsugod ang operisyong militar sa mga tropa sa 30^th IBPA sa AFP ug SAF ug PPSB sa PNP niadtong Enero 4, 2020 diha sa mga lungsod sa Claver, Gigaquit, Bacuag, Tubod ug Alegria sa Surigao del Norte. Apan sa wala pa kini, naglunsad na og operisyong militar ang kaaway sa katapusang semana sa Disyembre 2019 niining maong mga lugar aron pugngan ang ipahigayon nga selebrasyon sa ika-51 nga anibersaryo sa Partido Komunista ng Pilipinas (PKP) taliwala nga adunay magkatugbang nga unilateral nga deklarasyon sa hunong buto (Disyembre 23, 2019 – Enero 7, 2020) tali sa GRP ug NDFP. Gisundan dayon kini sa langkob-rehiyon (SN, SS, AN, AS) nga mga operisyon sa tibuok bulan sa Enero; ug hangtud karon nagpadayon pa diha sa pila ka lungsod sa Surigao del Norte ug sa Tandag City, Surigao del Sur.

Ang dungan-dungan nga mga atake nga gilunsad sa AFP ug PNP batok sa katawhan ug BHB sa rehiyon sa unang bulan sa 2020 ug mismo atol sa panahon sa hunong buto nagpakita sa lunlon militaristang lakang sa mga tigsabotahe sa kalinaw sa han-ay sa gobyernong Duterte sa pagsulbad sa gamot- hinungdan sa gubat sibil sa Pilipinas. Walay laing tinguha niini gawas sa pagpasurender sa rebolusyonaryong kalihukan ug BHB ug ipailalom sa ilang malinglahong gambalay sa kalinaw.

Tataw nga dili seryoso ang rehimeng US-Duterte sa patas nga panaghisgot pangkalinaw ilabina sa hisgutanan sa Comprehensive Agreement on Socio-Economic Reforms (CASER) nga maoy yawe alang sa pagsulbad sa armadong panagbangi. Padayon nga nanghambog ang mga militaristang alipures ni Duterte nga mapuo nila ang BHB sulod sa iyang termino, nga bisan pa man nga  kanunay kining napakyas subay sa ilang gitakda sa  nanglabay nga mga tuig.

Dili mapuo ang BHB tungod kay ang nasudnon-demokratikong rebolusyon nagdala sa interes sa katawhang Pilipino ug ang BHB padayong nagtagamtam sa popular nga suporta gikan sa katawhan. Padayong moasdang ang armadong pakigbisog karon ug sa mosunod pang mga katuigan  ug bungkagon ang hinungdan sa kalisdanan sa katawhan, ang imperyalismo, pyudalismo ug burukrata kapitalismo.

(pinirmahan)
Ka Ariel Montero
Tigpamaba
Regional Operational Command