Samtang ginadebatehan sa Korte Suprema kung paunsa ginalapas sa Anti-Terror Law ang demokratikong mga katungod, walay-puas ang pagpangatake sa estado sa katawhan, ilabina sa mga lugar nga layo sa mata sa mga mahistrado ug midya. Duha ka bata ang nahimong biktima sa hugaw nga gyera sa rehimeng Duterte nga nagatarget sa mga sibilyan. Daghan sa mga biktima ang myembro sa mga organisasyong balik-balik nga gina-red-tag sa militar.

Pagyatak sa katungod sa mga bata. Namatay ang usa ka bulang bata nga si Baby Carlen, babayeng anak sa bilanggong pulitikal nga si Nona Espinosa niadtong Pebrero 14 tungod sa kumplikasyon sa baga ug dugo.

Tulo ka adlaw pa lamang ang bata dihang gibulag siya sa gibilanggo niyang inahan. Giaresto si Espinosa ug lain pang walo niadtong Setyembre 2020 sa Guihulngan City, Negros Oriental.

Sa Maguindanao, namatay ang batang si Saad Abdulkadir Tumbi niadtong Pebrero 14 tungod sa impeksyon sa mga samad tungod sa pagpamomba sa 6th ID. Tulog siya dihang naigo sa splinter sa mortar ang balay sa iyang pamilya sa Barangay Sambulawan, Datu Salibo, Maguindanao niadtong Disyembre 13, 2020. Upat pa ka sibilyan, lakip ang usa pa ka bata, ang nataho nga nasamdan sa pagpamomba.

Pulitikal nga pagpamatay. Gipusil-patay sa duha ka wala mailhing kriminal si Lucresia Tasic, konsehal sa barangay, sa iyang balay sa Hanopol Norte, Balilihan, Bohol niadtong Pebrero 16. Tigsuporta ug nangampanya si Tasic sa Anakpawis Party-list sa milabayng mga eleksyon.

Tulo ka mag-uuma ang gipatay sa mga elemento sa 90th ug 72nd IB sa Marinangao, Barangay Sarayan, Pres. Roxas, North Cotabato niadtong Pebrero 8.

Gipagawas sa mga pulis nga “misukol” silang Buenaventura Dawal, ang kauban niya sa balay nga istap sa usa ka lokal nga institusyon sa agrikultura ug si Dennis Nogollos nga opereytor sa makinang pang-ispray sa umahan sa baryo.

Pag-aresto. Giaresto sa mga pulis si Rogelio de Asis, lider sa Pamalakaya-Caraga ug myembro sa Promotion of Church People’s Response, sa iyang balay sa Barangay Matabao, Buenavista, Agusan del Norte niadtong Pebrero 11. Gipasakahan si de Asis sa ginama-gamang kasong pagpatay.

Giaresto sa mga pulis niadtong Pebrero 6 ang aktibistang si Vilma Dalangin-Yecyec, 72, sa Mainit, Surigao del Norte. Ang biktima usa ka mamumuo sa panglawas sa komunidad nga giakausahang myembro sa BHB.

Sa Baggao, Cagayan, giatake sa pulis ang balay ni Ruben Salvador, kapitan sa Barangay Agaman, niadtong Pebrero 8. Giutingkay ang iyang balay sa katumanan sa search warrant nga gipagula ni Judge Shiela Gacutan-Labuguen sa Baggao Municipal Trial Court. Gipagawas sa mga pulis nga nakakuha sila og armas ug eksplosibo.

Pagpamomba. Pipila ka hugna nga gibomba sa militar ang mga kasikbit nga komunidad sa Barangay Masaya, Buenavista, Quezon human makaengkwentro sa yunit niini ang usa ka yunit sa BHB niadtong Pebrero 5 sa kaadlawon sa maong barangay. Tungod niini, kapin 26,200 ka residente sa magkasikbit nga lungsod sa Buenavista, San Narciso, Catanauan ug Mulanay ang natugaw ug natroma. Sa karon, gipailalum sa mga sundalo ang 20 ka lungsod sa Lopez, Macalelon, General Luna ug Catanauan sa nakapokus nga mga operasyong militar.

Sa Mountain Province, duha ka helikopter ang namomba sa umahan ug pastulan sa mga residente sa Barangay Tamboan, Besao niadtong Pebrero 11. Gisundan kini sa paturagas nga pagpangistraping sa mga tropa sa 7th ID ug Philippine National Police-Cordillera.

Pagpamig-ot. Ginapalayas sa Bureau of Immigration sa nasud si Otto De Vries, usa ka misyunero gikan sa The Netherlands ug kasamtangang boluntir nga tigpanukiduki sa Ecumenical Institute for Labor Education & Research.

Demolisyon. Kapin 50 ka balay ang iligal nga gidemolis sa 150 ka ginsakpan ni Pablito Encarnacion, mangilugay og yuta, kaabag ang mga pulis, sa Barangay Liwayway, Sta. Rosa, Nueva Ecija niadtong Pebrero 17.

Walay permit o pagtugot ang mga pulis nga miatake sa komunidad.