Wala napugngan sa pandemya ug sa diktaduryang militar ang pagdagsang sa kadalanan sa gatusan ka libong katawhan sa Myanmar. Halos kada adlaw silang nagaprotesta gikan Pebrero 5 aron ipanawagan ang pagpakanaog sa huntang militar nga miilog sa estado poder. Gipanawagan usab nila nga buhian ug ibalik ang gipili nga mga upisyal nga gipangulohan ni Aung San Suu Kyi.

Nagpahamtang sa hugot nga restriksyon ang Tatmadaw (tawag sa militar sa Myanmar) aron pugngan ang mga demonstrasyon. Kasagaran niining ginapabungkag ang mga protesta. Pipila ka hugna na niining giputol ang akses sa katawhan sa internet sa sulayng pugngan ang mga panagtapok. Kapin 500 na ang giaresto ug tulo ka raliyista na ang namatay human gipusil sa pulis.

Nagkudeta ang Tatmadaw ug gipreso ang mga sibilyang upisyal sa nasud niadtong Pebrero 1. Daghan ang nagtoo nga pinakatumong niini nga puuhon ang partido ni Suu Kyi ug permanenteng ibalik ang absolutong gahum sa militar sa nasud.