Napulo’g pito ka armas, lakip ang 10 mataas kalibre nga armas, ang naagaw sang mga yunit sang Bagong Hukbong Bayan (BHB) sa Bicol sa tatlo ka separado nga aksyon.

Sang Marso 19, ginsalakay sang BHB-Camarines Norte ang outpost sang Philippine National Police (PNP) 2nd Provincial Mobile Force Company sa Purok 6, Barangay Dumagmang, Labo, Camarines Norte. Isa ka baby M60 machine gun, isa ka R4 carbine, anom nga Galil, kag anom nga pistolang Glock ang naagaw sang BHB.

Lima ang napatay, lakip si PCpl. Roger Estoy, kag duha ang pilason sa mga pulis. Sabat ang taktikal nga opensiba sa sunud-sunod nga pagpamatay kag pagpang-atake sang pulis kag militar sa mga residente sang Camarines Norte.

Sa Camarines Sur, gin-ambus sang BHB ang nagaoperasyon nga PNP Special Action Force kag mga suldado sa Barangay Tigman, Sipocot sang Marso 4. Duha ang napatay kag duha ang napilasan sa kubay sang kaaway.

Sang Pebrero 1, ginkumpiska sang BHB ang mga armas sang goons sang pamilya Villafuerte sa Barangay Villazar, Sipocot sa pareho nga probinsya. Naagaw ang isa ka ripleng M16, duha ka ripleng karbin kag mga bala. Madugay na nga ginareklamo sang mga residente sang barangay ang pagpamahog kag pagpang-ipit sang despotikong pamilya. Isa sila sa daku nga agalon nga mayduta kag nagahari-harian nga upisyal sang barangay.


Sa iban pang bahin sang pungsod

Ozamiz City.  Gin-ambusan sang BHB-Misamis Occidental ang mga tropa sang 10th IB sa Barangay Guimad sang Marso 6. Walo ang patay kag isa ang pilason sa mga suldado nga sadto nagalunsar sang operasyon kombat sa lugar. Pagkatapos sini, ginbomba sang Air Force ang lugar sang natabuan. Nagdulot ini sang pagkawasak sa kapalibutan kag mga ulumhan.

Quezon. Gin-ambus sang isa ka yunit sang BHB-Quezon ang nagaoperasyon nga tropa sang 201st IBde sa Sityo Colong, Barangay San Francisco B, Lopez sang Marso 5. Tatlo ang patay kag isa ang pilason nga suldado.

Occidental Mindoro. Gin-isnayp sang isa ka yunit sang BHB-Mindoro ang nagaoperasyon nga tropa sang 4th IB sa Barangay Manoot, Rizal sang Marso 3. Isa ka semana na nga nagapanglighot ang mga pasistang suldado sa magkatambi nga barangay.

Western Samar. Ginpaslaw sang isa ka yunit sang BHB-Western Samar ang atake sang masobra 100 nagaoperasyon nga tropa sang 46th IB sa Barangay Canlobo, Pinabacdao sang Pebrero 8. Duha ang nareport nga napatay sa 46th IB. Pagkatapos sang engkwentro, naghulog sang walo ka bomba halin sa kahanginan kag apat ka beses nga ginkanyon sang mga suldado ang natabuan sang inaway. Nang-istraping man ini sa sulod sang 45 minuto.

Panay. Anom ka opensiba ang ginlunsar sang BHB-Panay kontra sa militar kag pulis nga responsable sa masaker kag pagpang-aresto sang mga Tumandok sa nagligad nga mga bulan. Duha ang napatay kag lima ang napilasan sa mga berdugo.

Sang Marso 11, ginpalukpan sang BHB ang mga tropa sang 12th IB nga nagalunsar sang Retooled Community Support Program (RCSP) sa Barangay Panuran, Lambunao. Ginpalukpan man sini ang nagaresponder nga mga suldado sa Barangay Agcarope, Janiuay. Pagkasunod nga adlaw, ginpalukpan sang eksplosibo ang isa ka salakyan sang pulis sa Barangay Pughanan, Lambunao. Duha ang napilasan sa mga pulis.

Sang Marso 3, ginpalukpan man sang eksplosibo sang BHB ang salakyan sang mga pulis sa Barangay Canawili, Janiuay.

Sa Southern Iloilo, ginpalukpan sang BHB ang mga suldado sang 79th IB sa Barangay Iglilico, San Joaquin sang Pebrero 18. Duha ang nareport nga napatay kag tatlo ang pilason sa kubay sang militar.

Sa Capiz, ginpalukpan sadtong Pebrero 26 sang BHB ang mga tropa sang 12th IB nga nagalunsar sang RCSP sa Barangay Buri, Tapaz.