Duha ka konsultant sa National Democratic Front of the Philippines (NDFP) ug lima pa ka sibilyan ang gipatay sa armadong mga pwersa sa estado niining milabayng duha ka semana. Sa maong panahon usab, lima pa ang giaresto ug tulo ang gidagit, lakip ang usa ka bata.

Pagpatay. Magkadungan nga gipatay sa mga ahente sa reaksyunaryong estado silang Fr. Rustico Tan ug Reynaldo Bocala, mga konsultant sa panaghisgot kalinaw sa NDF alang sa Visayas niadtong Mayo 28 sa ilang mga balay sa Cebu ug Iloilo.

Gipusil sa mga pulis si Bocala, 75, sa NDF-Panay ug kauban niyang si Willy Arguelles Epago sa Barangay Balabag, Pavia, Iloilo. Gipagawas sa pulis nga “misukol” sila.

Sa parehong adlaw, gipusil usab si Tan, 80, samtang natulog atubangan sa iyang balay sa Pilar, Camotes Island. Nagsilbi siyang negosyador sa NDF-Cebu sa panaghisgot kalinaw niadtong 1987.

Tulo ka aktibista usab ang gimasaker ug usa ang gidagit sa reyd sa 202nd IBde ug Special Action Forces sa pulis sa Barangay Macabiling, Sta. Rosa, Laguna niadtong Mayo 21. Gipatay silang Christoper Boton, Cristina Estocado ug Rommel Riza samtang gidagit sa mga kriminal si Kemuel Ian Cometa, gradweyt sa University of the Philippines-Los Baños ug koordineytor sa Kabataan Partylist sa Laguna. Wala pa gipagawas sa militar si Cometa hangtud sa kasamtangan.

Sa Negros Occidental, gipatay sa mga sundalo sa 94th IB si Padoz Lozano sa Barangay Mahalang, Himamaylan City niadtong Mayo 13. Giatake usab sa mga sundalo ang tulo ka balay sa pamilyang Hilado sa Sityo Alulong, Barangay Buenavista.

Niadtong Marso 31, gipusil patay sa mga ginsakpan sa estado ang mga manghag-utay nga nailang “Greg” ug “Uno” sa San Miguel, Catanduanes. Managsuon ang mga biktima ug parehong residente sa Barangay Progreso sa maong lungsod.

Pag-aresto.  Gidakop sa 94th IB silang Robnie Ariola, Junjun Casilo ug Jonalyn Agaton, mga residente sa Sityo Bugo, Barangay Buenavista, Himamaylan City, Negros Occidental human gipagawas nga adunay nahitabong engkwentro tali sa Bagong Hukbong Bayan ug militar sa lugar niadtong Mayo 26. Gisunog usab sa mga sundalo ang balay sa residenteng si Gerard Ariola.

Sa Bicol, iligal nga giaresto sa pulisya si Elwin Mangampo, lider sa Lambat-Bicol, organisasyon sa mga mangingisda, niadtong Mayo 30 sa iyang balay sa Purok 2, Barangay 1, Pio Duran, Albay. Giutingkay ug gitamnan og granada ug pusil ang iyang balay. Dugay na nga gi-red-tag sa militar si Mangampo.

Giaresto usab si Rolando Obal, mag-uuma sa Barangay Macalamlam, Rosario, Batangas, niadtong Mayo 26. Gipasakahan siya og ginama-gamang kasong pagpatay ug illegal possession of explosives. Ginapagawas sa militar ug pulis nga nalambigit siya sa engkwentro tali sa militar ug BHB sa maong adlaw. Giaresto usab sa mga sundalo ang mag-uumang si Gilbert Orr. Wala pa gihapon siya gipakita.

Pagdagit. Sa Occidental Mindoro, gidagit sa 10 ka sundalo sa 203rd IBde si MJ, kwatro anyos nga anak sa bilanggong pulitikal nga si Emilia Marquez, niadtong Mayo 12 sa Sityo Ambuyan, Pitogo, Rizal.

Binuhatan na sa mga sundalo ang mangdagit og mga anak sa mga detenido aron ipresyur sila nga makigtinabangay sa militar.

Pagpamig-ot. Pugos nga gipaguba sa mga sundalo sa 72nd IB sa mga residente ang iskwelahang Lumad sa Sagundanon, Kitaotao, Bukidnon niadtong Hunyo 6. Gihulga ang mga residente nga pagakasuhan kung dili sila motuman.