Giparepaso sa Senado sa Department of Energy ang sunod-sunod nga pagpalit sa kumpanya ni Dennis Uy nga Udenna Corporation sa Malampaya Deep Water Gas-To-Power Project gikan sa Royal Dutch Shell niining tuig ug sa Chevron Corporation niadtong 2019. Ang maong proyekto ang nag-inusarang operasyon sa pagmina sa natural gas sa nasud. Nahimutang kini sa kadagatan sa Palawan.

Gipalit ni Uy ang 45% bahin sa Shell sa proyekto sa kantidad nga ₱18.2 bilyon. Nakatakda siyang magbayad og dugang nga ₱3.8 bilyon sa 2022-2024. Samtang, napinal ang pagpalit niya sa 45% bahin sa Chevron sa kantidad nga ₱27.1 bilyon niadtong Marso 2020. Sa kinatibuk-an, kapin $1 bilyon o ₱48 bilyon ang gipalutaw ni Uy aron makontrol ang proyekto.

Gibuhian sa duha ka langyawng kumpanya ang ilang operasyon tungod kay hapit nang mahurot ang reserbang gas sa lugar. Gikan 2024 hangtud 2027, gibanabana nga hingpit nang mahurot ang nahabiling 859 ka milyong standard cubic feet sa natural gas sa lugar. Sa aktwal, ang ginapalit ni Uy dili ang nahabiling natural gas kundili ang karaang mga production well ug pipeline nga pagabyaan sa mga kumpanya.

Nagasuplay ang Malampaya Gas Project sa 35% sa kuryente sa Luzon. Ang gas nga nakuha sa proyekto ginaproseso sa First Gen Corporation ug ginabaligya ang kadaghanan niini (56%) sa Meralco nga nagasuplay sa kuryente sa Metro Manila.

Ang kapital nga gigamit ni Uy aron paliton ang 90% sa Malampaya pulus naggikan sa langyaw. Naggikan ang utang sa Australia and New Zealand Banking Group ug ING Bank. Sa kaso sa pagpalit sa bahin sa Shell, gidumalahan ang transaksyon sa Farallon Capital, usa sa pinakadakung hedge fund sa US.

Daghan ang natingala nga gipautang si Uy sa langyawng mga bangko aron paliton ang Malampaya Gas Project. Niadtong Abril lang, nabalita nga nalubong siya sa utang nga kapin $2 bilyon ug anaa siya proseso sa pagbaligya sa uban niyang katigayunan. Wala usay kasinatian ang kumpanya ni Uy sa mga operasyon sa pagmina sa natural gas.