Bakak ang ginasulti sa Task Force Bangon Marawi (TFBM) nga 65% na sa rekonstruksyon sa Marawi City ang “nahuman na.” Kini ang pamahayag ni Drieza Lininding sa Moro Consensus Group sa ikaupat nga anibersaryo sa pagpulbos sa rehimeng Duterte sa syudad sa Marawi niadtong Mayo 23. Sa maong adlaw, usa ka karaban sa mga residente ang gipahigayon padulong sa Maqbara Public Cemetery sa Barangay Papandayan sa syudad aron dumdumon ang unang adlaw sa pagpamomba. Dinhi gilubong ang mga patayng lawas sa 470 ka biktima sa halos 5 ka bulang pagpamomba sa AFP nga nagresulta sa dislokasyon sa 325,294 indibidwal niadtong 2017.

Human sa upat ka tuig, wala pa gihapon makabalik ang kadaghanan sa 27,000 ka pamilya sa 11,000 ka kabalayang gigun-ub sa pagpamomba sa AFP sa syudad. Wala pa nahuman ang mga kalsada. Wala pay mga kuryente ug sistema sa patubig. Gustuhon mang mobalik sa mga residente, wala silay pondo aron ayuhon o subling ipabarog ang nagun-ub nilang mga balay. Sa karon aduna lamang 113 ka pamilyang nakauli sa Tolali gikan sa 17,768 ka pamilya, ug 100 ka pamilya lamang ang anaa sa relokasyon sa Pagalatan, Saguiran. Samtang, 2,943 pa ka pamilya ang anaa sa Boganga Transitory Sites, ug mas daghan pa ang nakatag sa Baloi ug Rogongon, Iligan City, Poona Bayabao ug Piagapo sa Lanao del Sur, ug uban pang mga lugar.

Samtang nag-antus ang mga bakwit sa mga sentro sa ebakwasyon ug walay panginabuhian, walay interes si Duterte nga iduso sa Kongreso ang balaodnon nga maggahin og ₱30-₱50 bilyong pondong kumpensasyon alang sa mga bakwit.