Niining milabayng mga semana, tig-usa ka kaso sa pagpatay ug pagpanganyon ang nataho sa Negros Occidental, samtang 22 ka pamilya ang nagbakwit sa Surigao del Sur. Lima ka sibilyan usab ang giaresto sa Bohol, Laguna ug Agusan del Sur.

Pagpatay. Gipatay sa mga sundalo sa 3rd ID niadtong Hunyo 9 si Erming Pacheco, usa ka Tumandok, sa Sityo Dala-upon, Carabalan, Himamaylan City. Giakusahan siyang lambigit sa engkwentro tali sa militar ug mga Pulang manggugubat duul sa lugar.

Pagpanganyon. Sa parehong adlaw, gikanyon sa 3rd ID ang bukirong bahin sa Himamaylan City ug Binalbagan gikan alas-10 sa buntag hangtud alas-2 sa hapon. Nagresulta ang pagpanganyon og grabeng kahadlok ug pagkaguba sa umahan sa mga residente.

Pagbakwit. Sa Surigao del Sur, napugos nga magbakwit niadtong Hunyo 23 ang 22 ka pamilya (100 ka indibidwal) gikan sa Sityo Panukmoan ug Sityo Manluy-a, Barangay Diatagon, Lianga. Ang mga bakwit kababaryo sa tulo ka sibilyanng gimasaker sa 3rd Special Forces Battatlion niadtong Hunyo 15. Gihulga silang pagapatyon kung mag-estorya mahitungod sa masaker.

Iligal nga pag-aresto. Dungan nga gidakop sa 47th IB niadtong Hunyo 25 silang Carmilo Tabada, koordineytor sa Central Visayas Farmers Development Center sa Trinidad, Bohol ug si Rev. Nathaniel Vallente pastor sa United Church of Christ in the Philippines, sa San Jose, Mabini, Bohol. Pareho silang gitamnan og mga bala ug pusil ug gipasakahan og gama-gamang kaso. Sa wala pa kini, biktima sila sa red-tagging sa rehimen.

Giaresto sa mga pulis niadtong Hunyo 25 silang Dana Marie Marcellana ug Christian Relao sa San Diego, San Pablo, Laguna. Gipasakahan ang duha og gama-gamang kasong rebelyon ug illegal possession of firearms.

Sa Agusan del Sur, gidakop sa 8th Special Forces Company ang usa ka 12-anyos nga bata sa Sityo Marang, Barangay Mabuhay, Prosperidad niadtong Hunyo 4. Ayha niini, paturagas nga nagpabuto ang mga sundalo sa mga nagsanggi og mais sa umahan sa maong sityo kung asa duha ang nasamdan. Lakip sa mga nagsanggi ang 12 ka mga bata.

Pagpanghadlok. Iligal nga giutingkay sa mga sundalo ug pulis ang pito ka balay sa mga myembro sa Trinidad-Talibon Integrated Farmers Association sa Trinidad, Bohol niadtong Hunyo 27 ug Hunyo 28.