Usa ka mag-uuma ang gipatay ug 19 ka sibilyan ang giaresto sa lain-laing operasyong militar sa Bicol niining milabayng duha ka semana. Nakapailalum pa gihapon sa okupasyong militar ang daghang bahin sa rehiyon.

Gipusil ug napatay sa mga pwersa sa Regional Mobile Force Battalion si Alex Llabres, mag-uuma ug residente sa Barangay San Roque Heights, Bula, Camarines Sur, sa iyang balay niadtong Hunyo 24.

Sa Sorsogon, iligal nga giaresto sa 22nd IB ang 13 ka indibidwal, lakip ang unum ka menor de edad, sa Bulan niadtong Hunyo 28. Unang gidagit ang mag-uumang si Alvin Mapula kauban ang iyang mga pag-umangkon nga silang Althea Mapula, 2-anyos, ug Janrex Mapula, 13, mga residente sa Barangay Bulawan.

Iligal usab nga gipreso ang mga paryente nga nangita sa tulo. Hangtud karon, nakabilanggo pa gihapon silang Editha Mapula, 43; Mary Ann Mapula, 29; Angel Mapula, 12; Rey Mapula, 4; RJ Mapula, 7; Renz Guelas, 13; Sunny Preconcillo, 48; Emy Preconcillo, 39 ug Dante Bandola, 50.

Sa parehong adlaw, giaresto si Laurente Gestole, residente sa Barangay Cadandanan. Gihadlok ug gihulga usab sa mga berdugo silang Regine Graida ug Geraldine Gestole, mga residente sa Barangay Calpi. Sa lungsod sa Donsol, gipusil ug iligal nga giaresto si Jesus Macenas, usa ka mag-uuma, niadtong Hunyo 17.

Sa Masbate, giaresto silang Mariel Suson, 22, titser, Jennifer Dollison Nuñez, myembro sa Amihan Bicol ug Sano Arendain sa Kilusang Magbubukid ng Bicol niadtong Hunyo 22 ug 23 sa Barangay San Jose, Uson.

Niadtong Hunyo 18, gidakop sa 2nd IB silang Joseph Delara, 18, residente sa Candelaria, Uson ug si Jude Serafin sa Tuburan, Cawayan. Anaa pa sa kustodiya sa pulis si Serafin.

Samtang 23 sa 44 ka barangay sa Tinambac, tulo sa Lagonoy ug duha sa Goa, Camarines Sur ang giutingkay karon sa mga tropa sa 83rd IB. Niadtong Mayo pa nakakampo ang mga sundalo sa maong mga lungsod sa takuban sa Retooled Community Support Program.

Laraw sa pagkampo nga iandam ang lugar alang sa pagsulod sa higanteng mga kumpanya sa mina, quarry ug ekoturismo sa distrito nga gitawag og “Partido.” Nag-unang target niini nga kawkawon ang Tinambac nga nagsilbing pinakadakung water reservoir sa Camarines Sur. Adunahan sa mineral ug kahoy ang kabukiran sa lugar.