Sining nagligad nga mga semana, tig-isa kaso sang pagpatay kag pagpanganyon ang nareport sa Negros Occidental, samtang 22 pamilya ang nagbakwit sa Surigao del Sur. Lima ka sibilyan man ang gin-aresto sa Bohol, Laguna kag Agusan del Sur.

Pagpatay. Ginpatay sang mga suldado sang 3rd ID sang Hunyo 9 si Erming Pacheco, isa ka Tumandok, sa Sityo Dala-upon, Carabalan, Himamaylan City. Gin-akusar siya nga nadalahig sa engkwentro sa tunga sang militar kag mga Pulang hangaway malapit sa lugar.

Pagpanganyon. Sa pareho nga adlaw, ginkanyon sang 3rd ID ang mabukid nga bahin sang Himamaylan City kag Binalbagan halin alas-10 sang aga tubtob alas-2 sang hapon. Nagresulta ang pagpanganyon sa tuman nga kahadlok kag pagkawasak sa pangabuhian sang mga residente.

Pagpabakwit. Sa Surigao del Sur, napilitan nga magbakwit sang Hunyo 23 ang 22 pamilya (100 indibidwal) halin sa Sityo Panukmoan kag Sityo Manluy-a, Barangay Diatagon, Lianga. Ang mga bakwit kasimaryo sang tatlo ka sibilyan nga ginmasaker sang 3rd Special Forces Battalion sang Hunyo 15. Ginpahog sila nga patyon kon maghambal bahin sa masaker.

Iligal nga pag-aresto. Dungan nga gindakop sang 47th IB sang Hunyo 25 sanday Carmilo Tabada, koordineytor sang Central Visayas Farmers Development Center sa Trinidad, Bohol kag si Rev. Nathaniel Valente, pastor sang United Church of Christ in the Philippines, sa San Jose, Mabini, Bohol. Pareho sila nga gintamnan sang mga bala kag pusil kag ginpasakaan sang himu-himo nga kaso. Antes pa sini, biktima sila sang red-tagging sang rehimen.

Gin-aresto sang mga pulis sang Hunyo 25 sanday Dana Marie Marcellana kag Christian Relao sa San Diego, San Pablo, Laguna. Ginpasakaan ang duha sang himu-himo nga kaso nga rebelyon kag illegal possession of firearms.

Sa Agusan del Sur, gindakop sang 8th Special Forces Company ang isa ka 12-tuig nga bata sa Sityo Marang, Barangay Mabuhay, Prosperidad sang Hunyo 4. Antes sini, wala patugsiling nga ginpalukpan sang mga suldado ang mga nag-ani sang mais sa ulumhan sa amo nga sityo kon sa diin duha ang napilasan. Lakip sa mga nag-ani ang 12 bata.

Pagpamahog. Iligal nga ginhalughog sang mga suldado kag pulis ang pito ka balay sang mga katapo sang Trinidad-Talibon Integrated Farmers Association sa Trinidad, Bohol sang Hunyo 27 kag Hunyo 28.