Isa ka mangunguma ang ginpatay kag 19 sibilyan ang gin-aresto sa nagkalainlain nga operasyon militar sa Bicol sining nagligad nga duha ka semana. Napaidalom pa gihapon sa okupasyon militar ang madamo nga bahin sang rehiyon.

Gintiro kag napatay sang mga pwersa sang Regional Mobile Force Battalion si Alex Llabres, mangunguma kag residente sang Barangay San Roque Heights, Bula, Camarines Sur, sa iya nga balay sang Hunyo 24.

Sa Sorsogon, iligal nga gin-aresto sang 22nd IB ang 13 ka indibidwal, lakip ang anom nga menor de edad, sa Bulan sang Hunyo 28. Una nga gindukot ang mangunguma nga si Alvin Mapula upod ang iya nga mga hinablos nga sanday Althea Mapula, 2-tuig ang edad kag Janrex Mapula, 13, mga residente sang Barangay Bulawan.

Iligal man nga ginhunong ang mga pamilya nga nagpangita sa tatlo. Tubtob subong, nakulong pa gihapon sanday Editha Mapula, 43; Mary Ann Mapula, 29; Angel Mapula, 12; Rey Mapula, 4; RJ Mapula, 7; Renz Guelas, 13; Sunny Preconcillo, 48; Emy Preconcillo, 39 kag Dante Bandola, 50.

Sa pareho nga adlaw, gin-aresto si Laurente Gestole, residente sang Barangay Cadandanan. Ginpahog kag ginpaandaman man sang mga berdugo sanday Regine Graida kag Geraldine Gestole, mga residente sang Barangay Calpi. Sa banwa sang Donsol, gintiro kag iligal nga gin-aresto si Jesus Macenas, isa ka mangunguma, sang Hunyo 17.

Sa Masbate, gin-aresto sanday Mariel Suson, 22, titser, Jennifer Dollison Nuñez, myembro sang Amihan Bicol kag Sano Arendain sang Kilusang Magbubukid Bicol sang Hunyo 22 kag 23 sa Barangay San Jose, Uson.

Sang Hunyo 18, gindakop sang 2nd IB sanday Joseph Delara, 18, residente sang Candelaria, Uson kag si Jude Serafin sang Tuburan, Cawayan. Ara sa kustodiya pa sang pulis si Serafin.

Samtang, 23 sa 44 barangay sa Tinambac, tatlo sa Lagonoy kag duha sa Goa, Camarines Sur ang ginalighot subong sang mga tropa sang 83rd IB. Umpisa pa Mayo nakakampo ang mga suldado sa mga banwa nga ini sa tabon sang Retooled Community Support Program.

Tuyo sang pagkampo nga ihanda ang lugar para sa pagsulod sang mga higante nga kumpanya sa pagmina, quarry kag ekoturismo sa distrito nga ginatawag nga “Partido”. Target pangunahon sang mga ini nga dambungon ang Tinambac nga nagaserbe nga pinakadaku nga water reservoir sa Camarines Sur. Manggaranon sa mineral kag kakahuyan ang kabukiran sang lugar.