Namatay sa paturagas nga pagpamusil sa mga elemento sa 89th IB niadtong Agosto 19 si Veneranda Guinanao, myembro sa Amihan National Federation of Peasant Women sa Bukidnon. Nasamdan ang iyang asawa nga si Reynaldo Guinanao ug anak nga si Christian human giistraping ang ilang balay sa Purok 5, Musuan, Maramag, Bukidnon. Parehong myembro sa grupo sa mga mag-uuma sa Buffalo-Tamaraw-Limus (BTL) ang magtiayon. Lider usab sa KASAMA-Bukidnon si Reynaldo. Ang BTL usa ka lokal nga organisasyon sa mga mag-uuma nga nagabatok sa pagpangawkaw og yuta sa Central Mindanao University. Niadtong 2020, pugos nga gipasurender sa NTF-ELCAC ang mga myembro niini isip mga “Pulang manggugubat.”

Sa Misamis Oriental, gipusil patay si Gerald Ral, myembro sa Balingasag Farmers Association ug Hiniusang Mag-uuma sa Blanco sa lungsod sa Lagonglong niadtong Agosto 21. Magdeliber unta siya ug iyang igsuon og saging sa merkado dihang nahitabo ang pagpamusil. Kanhi nang ginapig-ot si Ral sa 58th IB ug ginaakusahang myembro sa Bagong Hukbong Bayan (BHB).

Sa Gamay ug Mapanas, Northern Samar, lima ka mag-uuma ang gipaulanan og bala sa Special Action Force niadtong Agosto 6 ug 15. Gituuhan kuno sa mga pulis nga mga Pulang manggugubat sila.

Sa Sorsogon, iligal nga giaresto ang mag-uumang si Ruel Habitan Escolano, 59, sa Barangay San Pascual, Casiguran niadtong Agosto 20 ug giakusahang myembro sa BHB. Gipasakahan siya og gama-gamang kasong pagpanglugos ug sulayng pagpatay.