Giparangalan sa Partido Komunista ng Pilipinas ug sa tibuok rebolusyonaryong kalihukan ang mga Pulang manggugubat sa Bagong Hukbong Bayan (BHB) nga nakalas sa Eastern Samar ug Negros Occidental niadtong Agosto samtang mipatuman sa ilang mga rebolusyonaryong gimbuhaton.

Gitawag sa Partido nga “pinakamaayong anak sa katawhan” ang 19 nga nakalas niadtong Agosto 16 sa walay puas nga pagpamomba sa militar sa Barangay Osmeña, Dolores, Eastern Samar. Kabahin ang mga martir sa Dolores sa 50-katawong yunit sa BHB nga nagalunsad og gimbuhaton sa pulitika, ekonomiya ug edukasyon sa masang mag-uuma sa maong erya. Langkob niini ang usa ka tim sa mga medik nga nakatakdang maghatag og treyning ug menor nga operasyon sa usa ka pasyente.

“Dakung kawad-on ang pagkamatay sa mga martir sa Dolores,” matud sa Partido. “Apan siguradong daghan pa ang mosulbong aron mohulip kanila isip bag-ong mga Pulang manggugubat sa mabayanihong hukbong bayan.”

Giparangalan usab sa Partido si Kerima Lorena Tariman (Ka Ella) nga gidakop ug gipatay sa militar niadtong Agosto 20 sa Barangay Kapitan Ramos, Silay City sa Negros Occidental. Kauban niyang napatay si Joery Dato-on Cocuba (Ka Pabling), usa ka Pulang manggugubat usab. Sa imbestigasyon sa BHB-Negros, gamay lang ang samad ni Ka Ella dihang madakop siya sa panagsangka apan gipatay gihapon siya sa mga sundalo.

Mibuhagay ang mga parangal kang Ka Ella, manggugubat ug kadre sa Partido, nga naila sa iyang mga tula ug sinulat nga naghulagway sa pag-antus, tinguha ug pakigbisog sa masang dinaugdaug. Tibuok kasingkasing ang pag-ila sa BHB-Negros sa mga tampo ni Ka Ella sa armadong rebolusyon sa isla. Naghatag usab og pasidungog ang Makibaka, Kabataang Makabayan ug mga yunit sa BHB ug Women’s Protection Units (YPJ) sa Kurdistan.

Gidumdum sa iyang kanhing mga organisasyon ang iyang pagpangulo ayha siya misampa sa BHB. Bantugan siyang magbabalak, manunulat ug aktibista alang sa mga mag-uuma. Usa ka dekada siyang nahimong kabahin sa Unyon ng mga Manggagawa sa Agrikultura. Una siyang naorganisa niadtong estudyante pa siya sa University of the Philippines.