Usa ka abugadong tigpanalipud sa tawhanong katungod ug usa ka Pulang manggugubat nga wala nay kapasidad nga mosukol ang gipatay sa mga armadong ahente sa estado sa milabayng semana.

Gipusil ug gipatay sa duha ka armadong lalaki si Atty. Juan Macababbad, ikaduhang presidente sa Union of Peoples’ Lawyers in Mindanao ug myembro sa National Union of Peoples’ Lawyers, atubangan sa iyang balay sa Surallah, South Cotabato niadtong Setyembre 15.

Abugado si Atty. Macababbad sa mga lumad, magtutudlo, bilanggong pulitikal ug uban pang sektor sa rehiyon. Myembro usab siya sa Bayan Muna.

Sa Camarines Sur, gitortyur ug gipatay niadtong Setyembre 12 sa mga pulis ug sundalo si Dioscorro L. Roma (Ka JR), usa ka manggugubat sa Bagong Hukbong Bayan (BHB) bisan wala nay kapasidad nga mosukol. Nadakpan si Roma gawas sa kampo sa BHB sa Tible, Lupi samtang nagakuha og suplay.

Matud sa pamilya, halos dili na maila ang patayng lawas ni Roma tungod sa kagrabe sa tortyur nga nasinati niya. Nabungkag ang iyang nawong, mga tudlo ug itlog ug nanglagum sa binun-ugan ang iyang tibuok lawas.

Samtang, giaresto sa Philippine National Police-Labo ang duha ka upisyal sa Barangay Dumagmang, Labo, Camarines Norte niadtong Agosto 30. Giakusahan silang Barangay Kagawad Angelita F. Talla ug Julieta Clores Dela Cruz, 65, sa pagkalambigit sa armadong aksyon sa BHB sa maong barangay niadtong milabayng Marso. Gipasakahan sila sa kasong direct assault ug frustrated murder.

Giaresto ug giakusahang myembro sa BHB ang mag-uumang si Toto Moreno, residente sa Sityo Uyangan, Barangay Budlasan, Canlaon City, Negros Oriental, sa mga sundalo sa 62nd IB niadtong Setyembre 14.