Padayon na ang imbestigasyon sa International Criminal Court (ICC) sa mga krimen batok sa katawhan ni Rodrigo Duterte. Gipaabot sa publiko ang desisyon sa mga huwes sa korte niadtong Setyembre 15. Langkob sa imbestigasyon ang mga ekstrahudisyal nga pagpamatay ni Duterte gikan 2011 hangtud 2019. Matud sa pamahayag sa mga huwes sa ICC, wala nila nakita isip “lehitimong operasyon” ang “gyera” ni Duterte batok sa iligal nga droga, ug ang mga pagpatay nga gipatuman sa ngalan niini isip “lehitimo o sobra lang sa mga lehitimong operasyon.” Kusog ang ebidensya, matud nila, nga ang malukpanon ug sistematikong pag-atake sa sibilyang populasyon palisiya sa estado.

Gipagula usab sa Investigate PH, usa ka internasyunal nga grupo nga gilangkuban sa kanhing myembro sa parlamento sa lain-laing nasud, ang ikatulo ug ulahing taho niini niadtong Setyembre 13. Nahisukip sa taho ang mga paglapas sa gubyerno ni Duterte sa mga katungod sa ekonomiya, katilingban ug kultura, mga katungod sa panginabuhian ug kalamboan, kaugalingong paghukum ug kalinaw. Nanawagan ang grupo sa United Nations Human Rights Council nga hinanaling maglunsad og bulag ug independyenteng imbestigasyon sa Pilipinas.