Gipanawagan sa National Democratic Front of the Philippines (NDFP) ug sa Partido Komunista ng Pilipinas ang hinanali nga pagpagawas kang Loida Magpatoc, konsultant sa hinabing pangkalinaw tali sa NDFP ug gubyerno sa Pilipinas. Luwas dapat siya sa pag-aresto ug pagpamig-ot ilalum sa Joint Agreement on Safety ang Immunity Guarantees. Kinahanglang hinanali nga ibasura ang gama-gamang mga kasong gipasaka batok kaniya. Kinahanglan usab siyang hinanaling hatagan og ligal nga representasyon ug medikal nga atensyon.

Iligal nga gidakop si Magpatoc sa Barangay Paitan, Quezon, Bukidnon niadtong Setyembre 15. Gipasakahan siya sa gama-gamang kasong pagpatay ug pagguba sa kabtangan.

Niadtong Setyembre 16, gimando sa korte sa Quezon City ang hinanali nga pagpagawas kang Esterlita Suaybaguio, usa usab ka konsultant sa NDFP, human ibasura ang kaso sa illegal possession of firearms and explosives batok kaniya. Iligal siyang giaresto sa iyang gipuy-an sa Quezon City niadtong 2019.