Usa ka duktor, usa ka batan-ong aktibista ug tulo ka mag-uuma ang iligal nga giaresto sa mga sundalo ug pulis sa milabayng pipila ka adlaw.

Niadtong Pebero 18, giaresto sa mga pulis si Dra. Ma. Natividad Castro sa balay sa iyang igsuon sa San Juan City. Si Dra. Castro lakip sa mga mamumuo sa panglawas nga mitabang sa pagtukod sa mga community health center ug mga programang panglawas sa rehiyon sa Caraga sa Mindanao. Dugay usab siyang nagsilbi isip pangkinatibuk-ang kalihim sa Karapatan-Caraga.

Gipasakahan si Dra. Castro og gama-gamang kasong kidnapping ug illegal detention ug gilambigit sa opensiba sa Bagong Hukbong Bayan sa Sibagat, Agusan del Sur niadtong December 29, 2018. Kabahin ang pag-aresto kaniya sa walay pugong nga pagpangatake batok sa mga tigpanalipud sa tawhanong katungod ug katungod sa mga Lumad sa Mindanao aron paludhon ang katawhan sa isla ug mugnaon ang ilusyong balwarte kini sa pamilyang Duterte.

Bicol. Niadtong Pebrero 13, giaresto sa mga pulis si Allen Omanad, estudyante sa Catanduanes State University ug residente sa Viga, Catanduanes, human gitamnan og kalibre .38 nga pistola ug mga bala ang iyang balay. Matud sa ginikanan ni Omanad, gisulod ang ilang balay sa tulo ka lalaki ug gitamnan og usa ka pistola pipila ka minuto lamang ayha miabot ang mga nang-arestong pulis. Gigukod pa ni Omanad ang mga ningsulod apan wala na niya sila naabtan.

Giaresto niadtong Enero 21 sa 31st IB si Nora Garote, residente ug kagawad sa Barangay Sta. Lourdes, Sorsogon. Sa Legazpi, Albay, gidakop si Maricel Morilla niadtong Enero 20 ug gilambigit sa ambus sa hukbong bayan batok sa mga elemento sa 31st IB sa Barangay Banquerohan niadtong 2020.

Nakasinati usab og pagpanghasi ang municipal coordinator sa Anak‐pawis Partylist nga si Edwin Romero ug usa ka myembro sa Kabataan Partylist niadtong Pebrero 9 samtang naghulat sa Alice Bridge, Sorsogon City.

Samtang sa Masbate, gidagit ug gipatay sa PNP-Masbate ug 96th IB si Richard Mendoza, residente sa Esperanza, niadtong Pebrero 8 ug gipagawas nga myembro siya BHB nga namatay sa panagsangka.

Negros Occidental. Iligal nga giaresto si Harlyn Balora, myembro sa Anakbayan Negros niadtong Pebrero 19 sa Sityo Montara, Barangay Camang Camang, Isabela kung asa siya nagpuyo. Giatake usab sa 500 ka pwersa sa PNP ug AFP ang mga balay sa lugar. Kasamtangang nakadetine si Balora sa Isabela Police Station.

Samtang, gihadlok, gipig-ot ug gipailalum sa mga sundalo sa interogasyon ang mga residente sa Barangay Bi-ao, Binalbagan. Kini human silang giatake sa mga Pulang manggugubat niadtong Pebrero 13. Giransak sa mga sundalo ang usa ka balay ug giguba ang motor nga nakaparada dinhi. Samtang, usa ka 15-anyos nga batang lalaki ang nasamdan sa walay puas nga pagpamusil sa mga pulis nga nataranta dihang giambus sila sa Pulang hukbo.

Rizal. Gipaulanan og bala sa mga gwardya sa JMV Security Services ang mga residente sa Sityo Avatex, Barangay San Jose, Rodriguez, Rizal niadtong Pebrero 16 sa buntag. Grabe nga nasamdan sa insidente ang usa ka residente tungod sa pagpamusil.

Instrumento ang maong mga gwardya sa pagpalayas sa mga residente sa 148 ka ektaryang yuta nga ginaangkon sa JVH Real Property and Leasing.