Pagsaka sa presyo sa lana, gikundena. Naglunsad og noise barrage ang grupong Gabriela sa Marikina Public Market; sa Baseco, Tondo; ug sa Tatalon ug Mega Q-Mart sa Quezon City niadtong Peberero 18 aron kundenahon ang padayon nga pagsaka sa presyo sa produktong lana gikan Enero. Ayha niini, aduna usay protesta niadtong Pebrero 14 ang mga drayber ug opereytor sa Commonwealth Avenue sa Quezon City.

Mag-uuma sa utan, nagkaraban sa Benguet. Nagkaraban ang 250 ka mag-uuma ug negosyante sa utan niadtong Pebrero 14 sa mayor nga kalsada sa La Trinidad, Benguet aron babagan ang walay hunong nga importasyon ug pag-ismagol sa utan ug uban pang produktong pang-agrikultura gikan China. Matud nila dili igo ang limitado ug temporaryong mga aksyon sa rehimen aron pugngan ang ismagling sa utan nga nagapatay sa ilang panginabuhian.

Protesta sa Hacienda Murcia. Hilum nga nagmartsa ang mga residente ug mag-uuma sa Purok Cojuangco sa Hacienda Murcia padulong sa munisipyo sa Concepcion, Tarlac niadtong Pebrero 4 aron babagan ang hulgang pagpalayas kanila. Matud nila, nakadawat sila og hulga sa pagpalayas ug pagbawal niadtong 2019 gikan sa pamilyang Cojuangco ug Landfactors, Inc. sa pamilyang Sy nga miilog sa ilang yuta. Gipasakahan sila og kasong trespasing ug pagsamoksamok dihang ilang giduso ang ilang katungod sa yuta. Pipila ka dekada na silang nag-uma sa lugar.

Motorcade ni Marcos Jr. sa Caloocan, gisurpresa. Nasurpresa ang motorcade sa Marcos-Duterte tandem sa Caloocan City niadtong Pebrero 19 dihang kalit nga midagsang sa giagian niini ang mga tawong adunay dalang dakung bandera nga may nakasulat nga “Ayaw iboto ang kawatan ug bakakon!” Giwarawara nila ang mga plakard nga may nakasulat nga “Never Again!” samtang miagi ang mismong gisakyan ni Marcos Jr.